އާ އަހަރު ސަރުކާރުގެ އަމާޒަކީ ޤައުމު އަލުން އާރާސްތުކުރުން: ރައީސް ޞާލިހް
2021 ވަނަ އަހަރާ ސަރުކާރުން މި ކުރިމަތިލަނީ ޤައުމު އަލުން އާރާސްތުކުރުމުގެ ވަރަށް މަތިވެރި ޢަޒުމަކާއި އިތުރު ހިތްވަރަކާ އެކުގައި ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ، މި ފެށުނު 2021 ވަނަ އަހަރުގެ މުނާސަބަތުގައި ދިވެހި ރައްޔިތުންނަށް ފޮނުއްވި ތަހުނިޔާގެ ޚިޠާބުގައެވެ.
މި ޚިޠާބުގައި، އައު އަހަރުގެ ތަހުނިޔާއާއި ހެޔޮއެދުންތައް ރާއްޖޭގެ ލޮބުވެތި ރައްޔިތުންނަށް އަރިސްކުރައްވައި، އައު އަހަރަކީ ދިވެހި ރައްޔިތުންނާއި މުޅި ޤައުމަށް ވެސް ފާގަތި އަދި ތިޔާގި އަހަރެއް ކަމުގައި ލެއްވުން އެދި އެ މަނިކުފާނު ދުޢާ ދަންނަވާފައިވެއެވެ.
ރައީސްގެ ޚިތާބުގައި، އިޤްތިޞާދު އާރާސްތުކޮށް، މުޖުތަމަޢަށް ކުރިމަތިވެފައިވާ އެކިއެކި އިޖްތިމާޢީ މައްސަލަތައް ހައްލުކުރުމަށް ސަރުކާރުން ކުރަމުންދާ ބުރަ މަސައްކަތުގައި ޢާއިލީ އަދި ފަރުދީ ފެންވަރުގައި ބައިވެރިވެ، އެކަކު އަނެކަކަށް އޯގާތެރިވެ އެހީތެރިވެދިނުމަށް އެމަނިކުފާނުވަނީ އިލްތިމާސްކުރައްވާފައެވެ.
އަދި، އާމްދަނީ އިތުރުކުރުމާއި، އިޤްތިޞާދީ ދުވެލި ހަލުވިކުރުމުގައި މުޅި ޤައުމު އެކުގައި އެއް ޢަޒުމެއްގައި ގަދައަޅައި މަސައްކަތް ކޮށްދެއްވުމަށް އެ މަނިކުފާނު އެދިވަޑައިގެންނެވިއެވެ.
ރައީސުލްޖުމްހޫރިއްޔާގެ ޚިޠާބު ނިންމަވައިލެއްވީ މި ފެށުނު އައު އަހަރަކީ ހުރިހާ ގޮތަކުން ވެސް ދިވެހިންނަށާއި، ދިވެހިރާއްޖެއަށް ކުރިއެރުމާއި ތަރައްޤީ ޙާޞިލްވާނެ އަހަރެއް ކަމުގައި ލައްވައި، އިޤްތިޞާދު ކޮޅަށް ޖަހައި، ލާމަރުކަޒީ ނިޒާމުން ރާއްޖެ ތަރައްޤީ ކުރުމަށް ސަރުކާރުން ކުރަމުންދާ މަސައްކަތުގައި ބަރަކާތް ލައްވައި، ކާމިޔާބީ މިންވަރުކުރެއްވުން އެދި ދުޢާ ދަންނަވަމުންނެވެ.
Advertisement
This content is created and paid for by advertisers and does not involve Voice Journalists