ހިޔާ ފްލެޓް ދާއިމީ ލިސްޓުގައި ރަށްރަށުގައި ދިރިއުޅެމުންދާ އެތައްބައެއް!

19 Feb 2021 | 15:30

ފެބުރުއަރީ 9 ވަނަ ދުވަހު ފްލެޓް ކޮމިޓީން އިޢުލާންކޮށްފައިވާ "ހިޔާ" މަޝްރޫއުގެ ދާއިމީ ލިސްޓުގައި ރަށްރަށުގައި ދިރިއުޅެމުން އަންނަ ގިނަ ފަރާތްތަކެއް ހިމެނިފައިވާކަން ހާމަވެއްޖެއެވެ.

ފްލެޓް މައްސަލާގައި ޙަރަކާތްތެރިވަމުން އަންނަ އާންމުއެކުވެރިންގެ ޖަމިއްޔާއާއި ވޮއިސް ގުޅިގެން ހިންގަމުން އަންނަ ކޮތަރުކޮށި ވައިބަރ ގްރޫޕް މެދުވެރިކޮށް ވޮއިސް އަށް މިފަދަ އެތައް ކޭހެއްގެ މަޢުލޫމާތު މިހާތަނަށް ލިބިފައިވާ އިރު ގިނަ ފަރާތްތަކަކީ ރަށުގައި ދިރިއުޅުމުގެ އިތުރުން ވަޒީފާވެސް ރަށުގައި އަދާކުރާ ފަރާތްތައްކަން ފާހަގަކޮށްލަންޖެހެއެވެ.

ވޮއިސް އިން ބެލި ބެލިލުމުގައި މިހާތަނަށް ގއ. ނިލަންދޫ، ލ. ފޮނަދޫ، ލ. ގަން، ގއ. ވިލިގިލީގައި ދިރިއުޅޭ ފަރާތްތަކަކަށް ފްލެޓް ވަނީ ލިބިފައެވެ.

ރަށްރަށުގައި ދިރިއުޅެމުން އަންނަ ފަރާތްތަކަށް ފްލެޓް ދީފައިވާ މައްސަލާގައި ބައެއް ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.

ސަރުކާރުން އިޢުލާނުކޮށްފައިވާ ފްލެޓް ދާއިމީ ލިސްޓުން ވަނީ މާލޭގައި ގިނަ ދުވަސްވަންދެން ދިރިއުޅެފައިވާ ފަރާތްތައް ޙާލަތު ބަލަން ފްލެޓް ކޮމިޓީން ހަދާފައިވާ އުޞޫލުގެ ސަބަބުން ކަޓާފައެވެ. އޭގެ ތެރޭގައި މާލޭގައި ސާޅީސް އަހަރާއި، ތިރީސް އަހަރާއި އަދި ވިހި އަހަރުވަންދެން ދިރިއުޅެފައިވާ ފަރާތްތައް ހިމެނެއެވެ.

އިބްރާހީމް މުޙައްމަދު ޞާލިޙްގެ ސަރުކާރުން މިހާތަނަށްވެސް ބުނަމުން އަންނަނީ މިއީ އެންމެ އިންސާފުވެރިކޮށް ފްލެޓް ދެވިފައިވާ ފަހަރުކަމަށާއި، ފްލެޓް އެންމެނަށް ނުލިބުނީ އެޢަދަދަށް ފްލެޓް ނެތުމުންކަމަށެވެ.

Advertisement

ކޮމެންޓް