ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ޓިކެޓުގައި މާލެ ސިޓީގެ މޭޔަރު ކަމަށް ވާދަކުރައްވާ ޑރ.މުޙައްމަދު މުޢިއްޒު، އެމްޑީޕީގެ ކުރީގެ ރައީސް އިބްރާހީމް އިސްމާޢީލް (އިބްރާ)އާއި ބައްދަލުކުރައްވައި، މަޝްވަރާ ކުރައްވައިފިއެވެ.
އިބްރާ ކުރެއްވި ޓްވީޓެއްގައި މިކަން ހިއްސާ ކުރައްވައި ވިދާޅުވީ، އެދެބޭފުޅުން ބައްދަލު ކުރެއްވީ، ޑރ. މުޢިއްޒުގެ އެދިވަޑައިގަތުމަކަށް ކަަމަށެވެ. އެދެބޭފުޅުން ދިވެހިރާއްޖޭގެ ސިޔާސީ މަސްރަހާއި ގުޅޭގޮތުން މަޝްވަރާ ކުރެއްވި ކަމަށްވެސް އިބްރާ ވިދާޅުވިއެވެ.
"ކަމެއްގައި ޚިޔާލެއް ދެވޭނީ ބޭނުން ވެގެން އައި މީހަކަށް، އަދި ވަޑައިގަތީ މުޢިއްޒު" އިބްރާ ވިދާޅުވިއެވެ.
އިބްރާއާއި ބައްދަލުކުރައްވައި ޑރ.މުޢިއްޒު ދެއްކެވި ބައެއް ވާހަކަތައް ހިއްސާ ކުރައްވައި އޭނާ ވިދާޅުވީ، އަންނަ ހޮނިހިރު ދުވަހު ބާއްވާ ލޯކަލް ކައުންސިލްތަކުގެ އިންތިޚާބު ކާމިޔާބު ކުރެވިއްޖެނަމަ، އެކި ކަންކަމުގައި އޭނާގެ އެހީތެރިކަން ބޭނުންވާނެ ކަމަށް ޑރ.މުޢިއްޒު ވިދާޅުވި ކަމަށެވެ.
"ކޮންމެ ބޭފުޅަކު ހުންނެވިޔަސް، ރައްޔިތުންގެ ހިދުމަތުގައި ދެވެން އޮތް ހިދުމަތެއް ދޭނެ ވާހަކަ ދެންނެވިން" އިބްރާ ވިދާޅުވިއެވެ.
އިބްރާގެ ޓްވީޓުގައި، މިފަހަރުގެ އިންތިޚާބުގައި ޑރ.މުޢިއްޒުއަށް ތާއިދު ކުރައްވާނެކަން ނުވަތަ ނޫން ކަމެއް އިބްރާ ހާމައެއް ނުކުރައްވައެވެ. އިބްރާ އަކީ ޕީޕީއެމްއާ ވާދަވެރި އެމްޑީޕީ އުފެއްދުުގައި އެންމެ އިސްކޮށް އުޅުއްވި އެއް ބޭފުޅާއެވެ. އެހެންނަމަވެސް ފަހަކަށް އައިސް އިބްރާ ގެންދަވަނީ ސަރުކާރުގެ އެކި ސިޔާސަތުތަކަށް ފާޑުވިދާޅުވަމުންނެވެ.
Advertisement
This content is created and paid for by advertisers and does not involve Voice Journalists
