މަހާރީތަށް 100 އަހަރު، މައުމޫންގެ ފަރާތްޕުޅުން ހަދިޔާއެއް
މެލޭޝިޔާގެ ކުރީގެ ބޮޑުވަޒީރު, ޑރ. މަހާތީރު މުހައްމަދުގެ އުމުރުފުޅުން 100 އަހަރުފުރޭ ތާރީހީ މުނާސަބަތާއި ދިމާކޮށް ކުރީގެ ރައީސް މައުމޫން އަބްދުލްގައްޔޫމް އެމަނިކުފާނަށް ހާއްސަ ހަދިޔާއެއް ދެއްވައިފި އެވެ. ޑރ. މަހާތީރުގެ 100 ވަނަ އުފަން ދުވަހަކީ މާދަމާ އެވެ.
ދެ ލީޑަރުންގެ މެދުގައި ހާއްސަ އެކުވެރި ގުޅުމެއް އޮވެ އެވެ.
މައުމޫން ފައުންޑޭޝަނުން ބުނީ ރައީސް މައުމޫން, ޑރ. މަހާތީރާ ބައްދަލު ކުރައްވާ 100 ވަނަ އުފަން ދުވަހުގެ ހެޔޮ ތަހުނިޔާ ފޮނުއްވާފައިވާ ކަމަށެވެ. ދެ ބޭފުޅުން ބައްދަލު ކުރެއްވީ މެލޭޝިޔާގައި މިހާރު ކުރިއަށްދާ ފޯރަމެއްގެ ހަވާސާގަ އެވެ.
ބޭސްފަރުވާގެ ކަންކަމަށް ރައީސް މައުމޫނާއި އެމަނިކުފާނުގެ އަނބިކަނބަލުން ނަސްރީނާ އިބްރާހިމް އަދި ދަރިކަލުން ފާރިސް މައުމޫނާއި ދަރިކަނބަލުން ޔިމްނާ މައުމޫން މިވަގުތު ތިއްބެވީ މެލޭޝިޔާގަ އެވެ.
މައުމޫން ފައުންޑޭޝަނުން ބުނީ ދެ ލީޑަރުންގެ ބައްދަލްވުމުގައި ޑރ. މަހާތީރުގެ އުފަންދުވަހާއި ގުޅުވާ ހާއްސަ ހަދިޔާއެއް ދެއްވާފައިވާ ކަމަށެވެ. މައުމޫންގެ ފަރާތްޕުޅުން ދެއްވީ ދިވެހީންގެ ފަހުރެއް ކަމުގައިވާ މާލޭ ހުކުރު މިސްކިތު މުންނާރުގެ މޮޑެލް އެކެވެ.
އޭގެ ފަހުން ދެ ބޭފުޅުން ބައްދަލު ކުރައްވާ މަޝްވަރާ ކުރެއްވި ކަމަށް މައުމޫން ފައުންޑޭޝަނުން ބުންޏެވެ. މި ބައްދަލްވުމުގައި އިސްލާމީ ގައުމުތަކުގެ ހާލަތާއިމެދު ދެ ބޭފުޅުން ވާހަކަފުޅު ދެއްކެވި އެވެ. ހާއްސަކޮށް ފަލަސްތީނުގެ މައްސަލަ ހައްލު ކުރުމަށް އިސްލާމީ ގައުމުތަކުން އެެކަށީގެންވާ މަސައްކަތްތަކެއް ނުކުރައްވާތީ އެކަމުގެ ކަންބޮޑުވުން ފާޅު ކުރައްވާފައިވެ އެވެ.
Advertisement
This content is created and paid for by advertisers and does not involve Voice Journalists
