ސަރުކާރުން ކުރާ ކަންކަން އަނބުރާ ބަދަލުކުރަންޖެހޭކަމަށް ވިދާޅުވެ، ދެން އެންމެ ރަނގަޅުވާނީ ރައްޔިތުންނަށްޓަކައި ވެރިކަމުން ދުރަށްޖެހުލުންކަމަށް އެމްޑީޕީގެ ޗެއާޕާސަން، ފައްޔާޒް އިސްމާއިލް ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ރައީސް ޑރ.މުހައްމަދު މުއިއްޒުއަށް ނިސްބަތްކުރައްވައި ފައްޔާޒު ވިދާޅުވީ ޤައުމުގެ ކަންކަން މިހާ ހިސާބަށް ދިޔައީމާ ތިމަންނާއަށް މިކަން ވާނެބާއޭ އަމިއްލަ ނަފްސާ ސުވާލުކޮށްލަން ޖެހޭކަމަށެވެ. ސަރުކާރުން ކުރާ ކޮންމެ ކަމެއް ފަހުން ބަދަލުކުރަން ޖެހުމުން "އުނބަށް ޖެހީޔޭ" ރައްޔިތުން ބުނާނެކަން ފާހަގަކުރައްވައި ފައްޔާޒް ވިދާޅުވީ، ސަރުކާރުން ގޯސްކޮށް ކޮންމެ ކަމެއް ކޮށްފައި ބޮޑެތި ގެއްލުންތަކެއް ގައުމަށްލިބޭ ފަހުން މަޖުބޫރުވެގެން ވެސް ރަނގަޅު ކުރާކަން އެއީ ވަރަށް ބޮޑު ނަސީބެއްކަމަށެވެ.

އެގޮތުން ގައުމާއި ރައްޔިތުން ދެކެ އެއްވެސް ވަރެއްގެ ލޯތްބެއް އޮތްނަމަ ހިތާހިތުން އެ ސުވާލު ކޮށްލުމަށްފަހު، އިއާދަނުކުރެވޭ ހިސާބަށް ކަންކަން ދިއުމުގެ ކުރިން ގައުމާއި ރައްޔިތުންނަށް ޓަކައި ދުރަށް ޖެހިލުން އެއީ އެންމެ ފައިދާ ހުރި ގޮތްކަމަށް ފައްޔާޒު ވަނީ ރައީސް މުއިއްޒުއަށް ނިސްބަތްކުރައްވައި ވިދާޅުވެފައެވެ.

ނިމިގެންދިޔަ ރިޔާސީ އިންތިހާބު ރައީސް ޑރ.މުހައްމަދު މުއިއްޒަށް ކާމިޔާބުކުރެވުނު ހަމައިން، ފައްޔާޒު ފާހަގަކުރެވުނީ ސީދާ ގޮތެއްގައި އައު ސަރުކާރަށް އެންމެފުރަތަމަ ފާޑުވިދާޅުވާން ފެއްޓެވި ސިޔާސީ ލީޑަރުގެ ގޮތުގައެވެ.

ފައްޔާޒު މިފަހަރު ފާޑުވިދާޅުވެފައިވަނީ، ބިންވެރިޔާ ސްކީމުން ގޯތި ލިބުނު މީހުންނަށް އައު އެއްބަސްވުމުގައި ސޮއިކުރުމަށް ނިންމުމާ ގުޅިގެންނެވެ. އައު ގޯތިތަކާ ގުޅޭގޮތުން މި ސަރުކާރުން އާއްމުކުރި އުސޫލްތަކަށް ބައެއް ފަރާތްތަކުން ކަންބޮޑުވާކަން ހާމަކުރި ނަމަވެސް ސަރުކާރުން ނިންމާފައިވަނީ އައު އެއްބަސްވުމުގައި ސޮއިކުރުމުގެ ކަންކަން ކުރިއަށްގެންދާނޭ ކަމަށެވެ.