ފަގީރުންނާއި މިސްކީނުންނަށް މިހާތަނަށް 14.2 މިލިއަން ރުފިޔާ ހޭދަކޮށްފައިވާކަމަށް ދިވެހިރާއްޖޭގެ ޒަކާތު ހައުސްއިން ބުނެފިއެވެ.

ޒަކާތު ހައުސްއިން ނެރެފައިވާ ހުސްވި ޖޫންމަހުގެ ޒަކާތު ރިޕޯޓަށް ބަލާއިރު، ފަގީރުންނާއި މިސްކީނުންގެ ބޭސްފަރުވާއަށް މިދިޔަ މަހު 104 މީހަކަށް ވަނީ ހޭދަކޮށްފައެވެ. ރިޕޯޓަށް ބަލާއިރު މިހާތަނަށް އެންމެބޮޑަށް ހޭދަކޮށްފައި ބޭސްފަރުވާގެ ކަންކަމަށެވެ. އެގޮތުން ބޭސްފަރުވާގެ ކަންކަމަށް އަހަރުގެ މިހާތަނަށް 8.4 މިލިއަން ރުފިޔާ ވަނީ ހޭދަކޮށްފައެވެ. 

ޒަކާތު ރިޕޯޓަށް ބަލާއިރު ހުސްވި ޖޫންމަހު އެންމެ ގިނައިން އެހީދީފައިވަނީ، ޓްރާންސްޕްލާންޓް ކުރުމަށާއި، ކެންސަރުބަލީގެ މީހުންނަށެވެ.

- ޓްރާންސްޕްލާންޓް: 796،443

- ކެންސަރު: 245،949

- ކިޑްނީ ބަލިތަކަށް: 38،164.50

- ހިތުގެ ބަލިތައް؛ 21،202.50

- ސިކުނޑީގެ ބަލިތައް: 46،645.50

ގުރުއާން ހިތުދަސްކުރުމާއި، ގުރުއާނުގެ އިލްމު ފެތުރުމަށް ޖޫންމަހު ޒަކާތު ފަންޑުން 568،260.92 ރުފިޔާ ހޭދަކޮށްފައިވައިރު، މަތީ ތައުލީމަށް ވަނީ، 60،488.76 ރުފިޔާ ހޭދަކޮށްފައެވެ.

ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީގެ ތަފާސްހިސާބުތަކަށް ބަލާއިރު، މިއަހަރުގެ މެއިމަހުގެ ނިޔަލަށް ޒަކާތުގެ ގޮތުގައި 50.9 މިލިއަން ރުފިޔާ ވަނީ ލިބިފައެވެ. މިދިޔަ އަހަރުގެ މި މުއްދަތުގެ ތެރޭގައި މޒަކާތު ފަންޑަށް ލިބުނީ 46.4 މިލިއަން ރުފިޔާއެވެ.