2021ވަނަ އަހަރުގެ ރަމަޟާން މަހާއި ދިމާކޮށް "ވޮއިސް"ގެ ކިޔުންތެރިންނަށް ޚާއްޞަ ކުރުވާހަކަ ސީރީސެއް ގެނެސްދޭން ފަށައިފިއެވެ.

ޖުމްލަ 15 ވާހަކަ ހިމެނޭ މި ކުރުވާހަކަ ސީރީސްގެ ލިޔުންތެރިއަކީ ސާފިރާ މޫސާއެވެ. ސާފިރާއަކީ މި ނޫހުގެ ގިނަ ކިޔުންތެރިންތަކެއްގެ މެދުގައި މަޤުބޫލުކަން ހޯދާފައިވާ ސިލްސިލާ ދިގު ވާހަކަތަކެއް ލިޔެފައިވާ ލިޔުންތެރިޔާއެވެ.

ރަމަޟާން މަހުގެ ކުރުވާހަކަ ސީރީސްގެ ބައެއް ވާހަކަތައް މިހާރުވެސް ވާނީ ޝާއިއުކުރެވިފައެވެ.

ސްކޫލު ދައުރުން ފެށިގެންވެސް ލިޔުންތެރިކަމާއި، އަދަބިއްޔާތައް އަހައްމިއްޔަތުކަމެއް ދޭ ސާފިރާ އަކީ މީގެ ކުރިން ނޫސްވެރިކަމުގެ ދާއިރާގައި، އެކި ޓީވީ ޗެނަލްތަކުގައި މަސައްކަތްކޮށްފައިވާ ކުޅަދާނަ ނޫސްވެރިއެކެވެ. އަދި މޮޅު ޕްރެޒެންޓަރެކެވެ. ސާފިރާ ބުނީ ނޫސްވެރިކަމުގެ ގަލަމުން އަތް ދޫކޮށްލި ނަމަވެސް، ވާހަކަ ލިޔުމަށް އަބަދުވެސް ޝައުގުވެރިވާ ކަމަށާއި، ސްކޫލުގައިވެސް ވާހަކައާއި މަޒުމޫނުގެ ތެރެއިން އަބަދުވެސް އިޚުތިޔާރު ކުރަނީ ވާހަކަ ލިޔުންކަމަށެވެ.

ސިކުނޑީގައި ކުރަހާލާ ޚިޔާލުތަކަށް ވާހަކައެއް ލިޔެލާ ތައްޔާރުކޮށްލުމަކީ ބުރަ އަދި އެކަމަކަށް ވަގުތު ހޭދަވާ ކަމެކެވެ. ހަމަ އެއާއެކު، ޙަޤީޤީ ހާދިސާތަކުގެ މައްޗަށް ވާހަކައެއް ލިޔާނަމަ، އެ ހާދިސާއެއް ދިރާސާކޮށް ކަން ހިނގާފައިވާ ގޮތުގެ އަސްލު ނުގެއްލޭ ގޮތަށް ބަޔަކަށް އެ ވާހަކަތައް ކިޔައިދިނުމަކީ ވެސް ކުޑަ ކަމެއް ނޫނެވެ. ވާހަކަ އެއް ލިޔަން ފެށުމުގެ ކުރިން ލިޔަން ބޭނުންވާ ވާހަކައާއި ގުޅޭގޮތުން ރަނގަޅަށް ދިރާސާކޮށް މަޢުލޫމާތު ހޯދާ، އެކަންކަން ކިޔުންތެރިންގެ ސިކުނޑިއަށް ނަގައިގަނެވޭ ވަރަށް ސިފަކޮށްދޭން ސާފިރާގެ ވާހަތަކުގައި ވަރަށް ބޮޑު އިސްކަމެއް ދޭކަން އޭނާގެ ވާހަކަތަކުން ފާހަގަވެއެވެ. އަދި މިކަން ވޮއިސް އަށް ލިޔެފައިވާ ވާހަކައަށް ކޮށްފައިވާ ދިރާސާއާއި މަސައްކަތުން ހާމަވެގެން ގޮސްފައިވެއެވެ.

ސާފިރާ ވޮއިސް އޮންލައިންގައި ޝާއިޢުކުރާ ވާހަކަތަކާއި، އަދި އޭނާ ލިޔެފައިހުރި އިތުރު ވާހަކަތައް އެއް ތަނަކުން ކިޔާލަން ބޭނުންވާ ކިޔުންތެރިންނަށް އޭނާގެ ފޭސްބުކް ޕޭޖް "ސާފިރާ މޫސާ" އިން ފެންނާނެއެވެ.

ބިންމާ އިބްރާހީމް ވަހީދު، ސައިކުރާ އިބްރާހީމް ނައީމް ފަދަ މަޝްހޫރު ލިޔުންތެރިން އިންސްޕިރޭޝަނަކަށް ބަލައިގެން ވާހަކަ ލިޔަންފެށި ސާފިރާ ބުނީ، ލިޔަން ބޭނުންވާ ކޮންމެ ކުއްޖަކަށްވެސް ހިތްވަރާއި، ޝައުޤުވެރިކަމާއެކު، އާ ކަންތައްތަކެއް ދަސްކުރުމުގެ ނިޔަތުގައި އެކަމަށް ވަގުތު ހުސްކޮށްގެން ލިޔަން ފެށުމުން ލިޔެވޭނެ ކަމަށެވެ.