ޔޫރޯ 2020: ތުރުކީ ބަލިކޮށް އިޓަލީއަށް ރަނގަޅު ފެށުމެއް
ތުރުކީ އަތުން 3-0 އިން މޮޅުވެ ޔޫރޯ ފުޓުބޯޅަ މުބާރާތުގައި އިޓަލީން ފެށުން ރަނގަޅުކޮށްފިއެވެ.
އިޓަލީގެ ވެރިރަށް ރޯމްގެ ސްޓޭޑިއޯ އޮލިމްޕިކޯ ގައި ކުޅުނު މި މެޗުގައި ހޯދި މި މޮޅާއެކު މިއީ އިޓަލީއަށް ތާރީޚީ ކާމިޔާބެކެވެ.
މެޗުގެ ފުރަތަމަ ހާފުގައި ދެ ޓީމުންކުރެ ޓީމަކުން ލަނޑެއް ކާމިޔާބެއް ނުކުރެއެވެ. ނަމަވެސް އިޓަލީން ވަނީ ގިނަވަގުތު ބޯޅަ ހިފަހައްޓައިގެން ރަނގަޅު ހަމަލާތަކެއް އުފައްދާފައެވެ.
އިޓަލީގެ ފުރަތަމަ ލަނޑު ފެނިގެންދިޔައީ މެޗުގެ 53 ވަނަ މިނެޓުގައެވެ. މި ގޯލަކީ ތުރުކީގެ ޑިފެންޑަރު މެރިހް ޑެމީރާލް އަތުން ބައިކޮޅަށް ވަތް ގޯލެކެވެ. މިއީ ޔޫރޯގެ ތާރީޚުގައި ވެސް ބައިކޮޅަށް ވަން ގޯލަކުން މުބާރާތް ފެށި ފުރަތަމަ ފަހަރެވެ.
ތުރުކީގެ ޑިފެންސްލައިނަށް ބާރުބޮޑުކުރުމުގެ ނަތީޖާއެއްގެ ގޮތުން މެޗުގެ 66 ވަނަ މިނެޓްގައި ސިރޯ އިމޯބިލޭ ވަނީ އިޓަލީގެ ދެވަނަ ގޯލު ކާމިޔާބުކޮށްދީފައެވެ. އިޓަލީގެ ތިންވަނަ ލަނޑު މެޗުގެ 79 ވަނަ މިނެޓްގައި އިމޯބިލޭ ދިން ޕާހަކުން ކާމިޔާބުކުރީ ލޮރެންޒޭ އިންސިންޔޭ އެވެ.
މިއީ އިޓަލީގެ ތާރީޚުގައި ޔޫރޯގެ މެޗަކުން ތިން ގޯލުގެ ފަރަގަކުން މޮޅުވި ފުރަތަމަ ފަހަރުކަން ފާހަގަކޮށްލެވެއެވެ. އިޓަލީ ހިމެނޭ ގްރޫޕް އޭގައި ދެން އެ ޓީމު ބައްދަލުކުރާނީ ސްވިޒަލޭންޑާއެވެ. އަދި ތުރުކީ ނުކުންނާނީ ވޭލްސްއާއެވެ.
މި މުބާރާތުގައި މާދަމާ ތިން މެޗު ކުޅޭނެއެވެ.
Advertisement
This content is created and paid for by advertisers and does not involve Voice Journalists