އއ. މާޅޮހުގައި، ނިދާފައި އޮތް އުމުރުން ދޮށީ މީހަކު ވަރަށް އަނިޔާވެރިކޮށް، މަރައިލައިފިއެވެ. މި ހާދިސާ ހިނގާފައި ވަނީ ރޭ ދަންވަރުގެ ވަގުތެއްގައެވެ.
ފުލުހުން ބުނީ، އއ. މާޅޮހުގެ ގެއެއްގައި ނިދާފައި އޮތް އުމުރުން ދޮށީ މީހަކަށް ބޮޑެތި އަނިޔާތަކެއް ދީ ޒަޚަމްކޮށްލާފައިވާ ކަމަށް ރޭ ދަންވަރު 01:50 ކަންހާއިރު ރިޕޯޓް ކޮށްފައިވާ ކަމަށެވެ.
އަދި އެ މީހާ މާޅޮހު ސިއްހީ މަރުކަޒަށް ގެންގޮސް ފަރުވާ ދެމުންދަނިކޮށް ފަތިހުގެ ވަގުތެއްގައި ނިޔާވެފައިވާ ކަމަށްވެސް ބުންޏެވެ.
މި ހާދިސާގައި މަރުވެފައިވަނީ އއ. މާޅޮސް / އޯކިޑްމާގެ، ޢަބްދުއްރަޙްމާން އާދަމް (65އ) އެވެ.
ފުލުހުން ބުނެފައިވަނީ މި މައްސަލަ މިހާރު ތަހުގީގު ކުރަމުންދާ ކަމަށެވެ.
އަދި މި މައްސަލަ ތަހުގީގު ކުރުމަށްޓަކައި މާލެއިން ތަހުގީގީ ޓީމެއް މިހާރު އެ ރަށަށް ދަތުރު ފަށާފައިވާ ކަމަށްވެސް ބުނެފައިވެއެވެ.
މާޅޮހުން ”ވޮއިސް“ އަށް މައުލޫމާތު ދިން މީހަކު ބުނެފައިވާގޮތުން، ޒަޚަމްކޮށްލައިގެން މަރާލި މީހާ ދިރިއުޅުނު ގޭގައި އެމީހާގެ އިތުރުން އޭނާގެ އަނބިމީހާވެސް ދިރިއުޅެއެވެ. ނަމަވެސް ހަމަލާ ދިން ވަގުތު އަންހެން ވީ ތަނެއް، އަދި ހާދިސާ ރިޕޯޓް ކުރި މީހެއް އަދި ސާފު ނުވާކަމަށް އޭނާ ބުންޏެވެ.
Advertisement
This content is created and paid for by advertisers and does not involve Voice Journalists
