ނުކުޅެދުންތެރިކަން ހުންނަ ފަރާތްތަކަށް ދޭ އިތުރުފަރުވާ ހޯދަން މިވަގުތަށް ލުއިދެވެން ނެތް ކަމަށް ރައީސް އޮފީހުގެ ތަރުޖަމާނު މުޙައްމަދު މަބްރޫކް ޢަޒީޒު ވިދާޅުވެއްޖެއެވެ.
މަބްރޫކް މިހެން ވިދާޅުވެފައިވަނީ ކޮވިޑް-19 އާއި ގުޅިގެން މަޢުލޫމާތު ހިއްސާކުރައްވަމުން މިވަގުތު ހެލްތު އިމަރޖެންސީ އޮޕަރޭޝަންސް ސެންޓަރުން ކުރިއަށް ގެންދާ ނޫސްވެރިންގެ ބައްދަލުވުމެއްގައި "ވޮއިސް" އިން ކުރި ސުވާލަކަށް ޖަވާބު ދެއްވަމުންނެވެ.
މަބްރޫކް ވިދާޅުވީ، ނުކުޅެދުންތެރިކަން ހުންނަ ފަރާތްތަކަށް ބޭނުންވާ އިތުރު ފަރުވާއަކީ ކޮންމެ ލޮކްޑައުންއެއްގައިވެސް އެންމެ ބޮޑަށް ވިސްނަންޖެހޭ އެއްކަންތައް ކަމަށެވެ.
އެގޮތުން މިހާރު އަޅާފައިވާ ފިޔަވަޅުތަކުގެ ތެރެއިން އަންނަ ހަފުތާގައި ލުއިދެވޭނީ ކޮންކޮން ކަންތައްތަކަކަށްތޯ މަޝްވަރާކުރުމުގެ މަސައްކަތް ކުރަމުން އަންނަ ކަމަށް މަބްރޫކު ވިދާޅުވިއެވެ.
"މިހަފުތާ ނިމޭއިރުގަ ތިބޭފުޅުންނަށް އެނގިވަޑައިގަންނަވާނެ އިތުރު ތަފާތުތަކެއް މިފިޔަވަޅުތަކަށް ގެނެވޭ. އެހެން ނަމަވެސް މިވަގުތު ވަކިން ސީދާ މިވެނި ކަމެކޭ ދެންނެވެން އަޅުގަނޑަކަށް ނެތް." މަބްރޫކް ވިދާޅުވިއެވެ.
މަބްރޫކް މިހެން ވިދާޅުވެފައިވާއިރު، މިހާރު އަޅާފައިވާ ފިޔަވަޅުތަކުގެ ސަބަބުން މާލޭގައި ދިރިއުޅޭ ނުކުޅެދުންތެރިކަން ހުންނަ ފަރާތްތަކަށް ޚާއްޞަކޮށް އިތުރު ތެރަޕީ ބޭނުންވާ ފަރާތްތަކަށް ނުހަނު ބޮޑެތި އުނދަގޫތަކާ ދަނީ ކުރިމަތިވަމުންނެވެ.
Advertisement
This content is created and paid for by advertisers and does not involve Voice Journalists
