ނިމިގެން މިދާ 2018 ވަނަ އަހަރު ވެގެންގޮސްފައިވަނީ ސިޔާސީ ގޮތުން ހަލަބޮލިވެގެންދިޔަ އަހަރެއްގެ ގޮތުގައެވެ.

ވޮއިސްއިން މި އާއަހަރުގެ ފުރަތަމަ މަސް މި ޙާއްސަ ކުރަނީ 2018 ވަނައަހަރުގެ އެންމެ ފާހަގަކުރެވުނު ޝަހުސިއްޔަތުތަކަށެވެ.

އެގޮތުން މާދަމާގެ "ވޮއިސް" އިން ފަށާމިސެގްމަންޓުގެ ފުރަތަމަ ޝަހުސިއްޔަތެއްގޮތުން ގެނެސްދިނުމަށް ހަމަ ޖެހިފައިވަނީ ރިޔާސީ އިންތިޚާބުން ބަލިވެގެންދިޔަ ކުރީގެ ރައީސް އަބްދުﷲ ޔާމީން އަބްދުލްގައްޔޫމެވެ.

ރައީސް ޔާމީންއަކީ އެއްބައެއްގެ ހީރޯއެވެ. އަނެއްބަޔެއްގެ ޒީރޯއެވެ. ސިޔާސީ މައިދާނުގެ ކޮންމެ ފަޅިއަކުން ހާލަތަށް ނަޒަރު ހިންގައި ފިކުރުކޮށްލިޔަސް ކުރީގެ ރައީސް ޔާމީން ވެގެންދާނީ އަހަރުގެ އެންމެ މުހިންމު އެއް ޝަޚުސިއްޔަތެކެވެ. ސިޔާސީ މައިދާނުގައި އެމަނިކުފާނުގެ ތާސްބައި އަތުރާލައްވައި ރަނގަޅަށް ޑިގު ކުޅުއްވަމުން ގެންދެވިކަމަށް އެމަނިކުފާނަށް ހީކުރެއްވުނަސް އާޚިރުގައި އެމަނިކުފާނު ހަނދާން ނެތުނު ކަމަކީ ސިޔާސީ މައިދާނަކީ ރާޒުވާގެ މައިދާނެއްކަމެވެ. ތާސްބައި މައިދާނެއް ނޫންކަމެވެ.

އަޅުގަނޑުމެން މާދަމާ އާ އަހަރަށް މަރުހަބާ ކިޔާހިނދު، ރައީސް ޔާމީންގެ ވާހަކަތައް ހަނދާންކޮށްލުން ވެގެންދާނީ މުހިންމުކަމަށެވެ. އިންތިޚާބުން ބޮޑު ނަތީޖާއަކުން ބަލިވެ ވަޑައިގަތުމަށްފަހު މީޑިޔާއަކާއި ވަކީން ވާހަކަފުޅު ނުދައްކަވައި ހުންނެވުމަށްފަހު ރައީސް ޔާމީން ވަނީ އެމަނިކުފާނުގެ ދައުރު ފުރިހަމަކުރެއްވުމަށްފަހު ރާއްޖޭގެ މީޑިޔާއަކަށް ދެއްވި ފުރަތަމަ އިންޓަރވިއު، ވޮއިސްއަށް ދެއްވާފައެވެ.

މި އިންޓަރވިއުގައި ރައީސް ޔާމީން ވަނީ މީގެ ކުރިން މީޑިޔާތަކަށް ހިއްސާކުރައްވާފައިނުވާ މުހިންމު ބައެއް ވާހަކަތައް ވޮއިސްގެ ޓީމާއި ހިއްސާކުރައްވާފައެވެ. އެގޮތުން ފިނިފެންމާ ލޯންޗްގެ ވާހަކައާއި، އެމަނިކުފާނުގެ ކުރީގެ ތަރުޖަމާނު އިބްރާހިމް މުއާޒް އަލީގެ ވާހަކަތަކަށް ރައްދުދެއްވުމާއި، އަދީބްއާއި ނާޒިމްގެ ކޯޅުމުގެ ވާހަކަފުޅު ވަނީ ދައްކަވާފައެވެ.

އަދި އެހެންމެ އެމަނިކުފާނާއި ކުރީގެ ރައީސް މައުމޫން އަބްދުލްގައްޔޫމާއި ދެމެދު އުފެދުނު ނުތަނަވަސްކަމާއި، ދިއްގަރު ދާއިރާގެ މެންބަރު އަހުމަދު ފާރިސް މައުމޫްން ނައިބު ރައީސްކަމަށް ގެންނަން އުޅުނު ވާހަކަތަކުގައި އެމަނިކުފާނުގެ ވާހަކަތައް ވާނީ ގެނެސްދީފައެވެ.

މި އިންޓަރވިއު މާދަމާ ހެނދުނުގެ ވަގުތެއްގައި ވޮއިސްގެ ވެބްސައިޓުގައި ޝާއިއުކުރެވިގެންދާނެއެވެ. މިއީ2019 ވަނަ އަހަރުގައި ވޮއިސްއިން ކޮންމެ ހުކުރު ދުވަހަކު ގެނެސްދޭ ޚާއްސަ ސެގްމަންޓްގެ ބައެއްގެ ގޮތުގައި ގެނެސްދެވޭ ފުރަތަމަ އިންޓަރވިއުއެވެ. މި ސެގްމަންޓްގައި ދިވެހިރާއްޖޭގެ އެކި އެކިމައިދާންތަކުން ފާހަގަކޮށްލެވޭ ފަރާތްތަކުގެ މީގެ ކުރިން ނޭނގޭ ވާހަކަތައް ގެނެސްދެވޭނެއެވެ.

އެހެންކަމުން އާ އަހަރު، މިދިޔަ އަހަރު އެންމެ ގިނަ ދިވެހިން އެފަރާތަކާއި ދެކޮަޅަށް ވޯޓުލީ ފަރާތުގެ ވާހަކަތަކުން، ތަފާތު ގޮތަކަށް ވޮއިސްއާއި އެކު ފައްޓަވާށެވެ!