ޕީޕީއެމާއި ޓެރަރިސްޓުންނާއި އޮތީ ކޮން ގުޅުމެއްތޯ ބަލަންޖެހޭ: އިލްޔާސް ލަބީބު

ޕީޕީއެމާއި ޓެރަރިސްޓުންނާއި އޮތީ ކޮން ގުޅުމެއްތޯ ބަލަންޖެހޭކަމަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު ވިދާޅުވެއްޖެ އެވެ.

ޓެރަރިޒަމް މަނާކުރުމުގެ ޤާނޫނަށް އިސްލާހު ގެނައުމާއިމެދު ކުރިއަށް ގެންދިޔަ ބަހުސްގައި ވާހަކަ ދައްކަވަމުން އިލްޔާސް ލަބީބް ވިދާޅުވީ ޕީޕީއެމް ޕީއެންސީ ބޭފުޅުން މިކަހަލަ ބިލެއް އައިމަ ކަންބޮޑުވާނެ ކަމަށާއި، ޕީޕީއެމްގެ ވެރިކަމުގައި ރައީސް ނަޝީދު ޖަލަށްލީ ޓެރަރިސްޓަކަށް ހަދާފައިކަމަށެވެ.

އިލްޔާސް ލަބީބްގެ މިވާހަކަތަކާއި ގުޅިގެން ނައިފަރު ދާއިރާގެ މެންބަރު ޝިޔާމް ނިޒާމީ ނުކުތާ ނަންގަވާ ވިދާޅުވީ ޕީޕީއެމް ޓެރަރިސްޓުންނާއި ގުޅުވައިން ވާހަކަ ދައްކާތީ ހިތާމަކުރައްވާ ކަމަށެވެ. އަދި ރައީސް ނަޝީދަށް ދެވުނު ހަމަލާއާއި ގުޅިގެން އެންމެބޮޑަށް ވަކާލާތު ކުރައްވަނީވެސް ޕީޕީއެމް މެންބަރުންކަމަށް ޝިޔާމްވަނީ ވިދާޅުވެފައެވެ.

މިއާއި އެކު އިލްޔާސް ލަބީބު ވިދާޅުވީ އެއްގޮތަކަށްވެސް ޕީޕީއެމާއި ޓެރަރިސްޓުންނާއި ގުޅުވާފައި ނުވާނެކަމަށެވެ. އެހެންނަމަވެސް އިލްޔާސް ލަބީބް ވަނީ ޕީޕީއެމުން ޓެރަރިސްޓުންނާއި އޮތީ ކޮން ގުޅުމެއްތޯ ބަލަންޖެހޭކަމަށް ވިދާޅުވެފައެވެ.

"އަޅުގަނޑު ޕީޕީއެމް ޕީއެންސީއަށް ކަންބޮޑުވާންޖެހޭ އެހެން ސަބަބެއް އެބައޮތް. މިބޭފުޅުން ވެރިކަމުގަ ދީނާއި ޚިލާފު އެތައްކަމެއް ކުރިއިރު ޓެރަރިސްޓުންގެ ގޮތުގައި ދީނީ ހެޓު އަޅައިންތިބޭ ބޭފުޅުންކުރާ އެއްވެސް ކަމަކާ އަޅައެއްނުލައްވާ. މިބޭފުޅުންނާއި އެމީހުންނާއި އޮތީ ކޮން ގުޅުމެއްތޯ އަޅުގަނޑުމެން ބަލާ ވިސްނަންޖެހޭ" އިލްޔާސް ވިދާޅުވިއެވެ.

އަދި ޤައުމު ސަލާމަތް ކުރެވޭނީ ޕީޕީއެމް ޕީއެންސީއިން ޓެރަރިސްޓުންނާއި ދުރުވެގެން ކަމަށާއި އެބޭފުޅުންނަށް ހިތްވަރުނުދީ ކުރިއަށްގޮސްގެން ކަމަށްވެސް އިލްޔާސް ލަބީބް ވިދާޅުވިއެވެ.

މެންބަރު އިލްޔާސް ލަބީބު ދެއްކެވި ވާހަކަތަކާއި ގުޅިގެން މަޖިލީހުގެ ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަތީފްވެސް ވަނީ ރައްދު ދެއްވާފައެވެ. އޭނާ ވިދާޅުވީ އިލްޔާސް ލަބީބް ދެއްކެވީ ވަރަށް ޒިންމާދާރުކަންކުޑަ ވާހަކަ ތަކެއް ކަމަށާއި ޕީޕީއެމް ޕީއެންސީން ދުވަހަކުވެސް މިފަދަ ޢަމަލުތަކަށް ހިތްވަރުދީ ވާހަކަ ދައްކާފައި ނުވާނެކަމަށެވެ.

އަދި ޕީޕީއެމްގެ މުޒާހަރަތަކުގައިވެސް ދުވަހަކުވެސް ދިވެހި ރައްޔިތެއްގެ ބޮލުގައި އެއްވެސް މީހެއްގެ މަރުގެ ތުހުމަތެއް އަޅުވާ ނުވަތަ މަރަންގޮވާލާފައި ނުވާނެ ކަމަށާއި ނަމަވެސް އެމްޑީޕީގެ މުޒާހަރާ ތަކުގައި އެފަދަ ވާހަކަތައް އެ މޭރުމުން ގޮވާފައިވާކަމަށް ސެންބެ ވިދާޅުވިއެވެ.