ނިމިދިޔަ ރިޔާސީ އިންތިޚާބުގައި ރަށްރަށަށް ވަޑައިގެން މޯލްޑިވިއަން ޑިމޮކްރެޓިކް ޕާޓީ(އެމްޑީޕީ) އިން ވީ ވައުދުތަކުގެ ތެރެއިން މެނިފެސްޓޯގައި ލިޔެވިފައިވާ ވައުދުތައް ނޫން އެހެން ވައުދުތަކުގެ ޒިންމާ އެ ޕާޓީއިން ނަގަން ނުޖެހޭނަކަން ދޭހަވާ ގޮތަށް އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވާހަކަފުޅު ދައްކަވައިފިއެވެ.
ރައީސް ނަޝީދު މި މޭރުމުން ވާހަކަފުޅު ދައްކަވާފައިވަނީ ޕްލޭނިން މިނިސްޓަރު އަސްލަމް މަޖިލީހަށް ހާޒިރުކޮށް، ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ކުރެއްވި ސުވާލަކަށް ޖަވާބުދެއްވަމުން ދަނިކޮށް މެދުގަނޑާލެއްވުމަށްފަހުގައެވެ.
މަހިބަދޫ ދާއިރާގެ މެމްބަރު ތާރިގު ވަނީ ކުނބުރުދޫގެ ނަރުދަމާ ނިޒާމު ގާއިމްކޮށްދެއްވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވައުދުވެވަޑައިގެންކަން މިނިސްޓަރަށް އެނގިލިއްވާތޯ އައްސަވާފައެވެ. އަދި ވައުދުތަކަކީ ފުއްދަން ޖެހޭ އެއްޗެއް ނޫން ތޯ ވެސް އައްސަވާފައެވެ.
އެ ސުވާލަށް ޖަވާބުދެއްވަން ފައްޓަވުން މިނިސްޓަރު އަސްލަމް ވިދާޅުވީ މަހިބަދޫ ދާއިރާގެ މެމްބަރު ތާރިގުގެ އެ ސުވާލަކީ ސިޔާސީ ސުވާލެއްކަމަށެވެ. ސިޔާސީ ހުރިހާ ބޭފުޅުންވެސް ވައުދުވާކަމަށް އަސްލަމް ވިދާޅުވިއެވެ.
އަސްލަމް މިފަދައިން ވިދާޅުވުމާއި އޭނާގެ ވާހަކަ މެދުކަނޑާލެއްވުމަށްފަހު ރިޔާސަތުގައި އިންނަވާ ނަޝީދު ވަނީ އެމްޑީޕީގެ ވައުދުތަކާއި ގުޅިގެން ވާހަކަފުޅު ފައްޓަވާފައެވެ.
އެގޮތުން ނަޝީދު ވިދާޅުވީ ވައުދުތަކާއި ގުޅިގެން ދެ ގޮތަކަށް ވާހަކަ ދެކެވޭކަމަށެވެ. އެގޮތުން ވައުދުތަކަކީ ފޮތިގަނޑުގައި ތައްގަނޑުޖަހަން އުޅުނު ކުދިން ލިޔުނު އެއްޗެއްކަމަށް ވާހަކަދެކެވޭކަމަށެވެ. އޭގެ އިތުރުން އެއީ މެނިފެސްޓޯ ލިޔުނު ކުދިން ލިޔެފައިވާ އެއްޗެއްކަމަށްވެސް ބުނަމުންދާކަމަށް ނަޝީދު ވިދާޅުވިއެވެ.
"ދެ ގޮތަކަށް މި ވާހަކަ ދެކެވިފައި އޮތީ، އެއްބަޔަކު ވިދާޅުވަނީ މިއީ ފޮތިގަނޑުގައި ތައްގަނޑު ޖެހިކުދިން ޖެހި އެއްޗެކޭ. އަނެއް ބަޔަކު ބުނަނީ އެއީ މެނިފެސްޓޯ އެކުލަވާލެވުނުއިރުގައި ލިޔަން އިން ކުއްޖާ ލިޔުނު އެއްޗެކޭ" ނަޝީދު ވިދާޅުވިއެވެ.
އެހެން ވިދާޅުވުމަށްފަހު ނަޝީދު ވިދާޅުވީ ވައުދެއްކަމުގައި ބަލާނީ މެނިފެސްޓޯގައި ލިޔެވިފައި ހުރި ވައުދުތައްކަމަށެވެ.
ނަޝީދުގެ އެ ވާހަކަފުޅަށް ބަލާއިރު ރަށްރަށަށް ވަޑައިގެން ވަކިކަމެއް އެ ރަށުގެ ރައްޔިތުންނަށް ކޮށްދެއްވާނެކަމަށް ވިދާޅުވި ނަމަވެސް މެނިފެސްޓޯގައި އެކަން ހިމަނާފައި ނުވާނަމަ އެއީ ވައުދެއްކަމުގައި ނުބެލެވޭނެއެވެ. އަދި އެ ވާހަކަފުޅަށް ޒިންމާ ނަންގަވާކަށްވެސް ޖެހިވަޑައިއެއް ނުގަންނަވާނެއެވެ.
އެއާއެކުވެސް 2018 ވަނަ އަހަރުގެ ރިޔާސީ އިންތިޚާބުގެ ކެމްޕޭނުގެ ތެރޭގައި ރަށްރަށަށް ވަޑައިގެން ރަށްތަކަށް އެކި ކަންކަން ކޮށްދެއްވާނެކަމުގެ ވައުދު އެމްޑީޕީގެ އިސްވެރިން ވެވަޑައިގަންނަވާފައިވެއެވެ.
Advertisement
This content is created and paid for by advertisers and does not involve Voice Journalists
