މީސްތަކުންނަށްވާ ހިދާޔަތެއްގެ ގޮތުގައި އެކިފަހަރު މަތިން ބާވާލައްވަމުން އައި ﷲ سُبْحَانَهُ وَتَعَالَى ގެ މަތިވެރި ކަލާމްފުޅު ތޭވީސް އަހަރުގެ ތެރޭގައި މި އުއްމަތުގެ މާތް ނަބިއްޔާ صَلَّى اللهُ عَلَيهِ وَسَلَّم ގެ މައްޗަށް އެއްކޮށް ބާވާލެއްވުނެވެ. އަމާނާތްތެރި ވަޙީގެ މަލާއިކަތާ ޖިބްރީލް عَلَيهِ السَّلام މެދުވެރި ކުރައްވައެވެ.

އެންމެ ހެޔޮވެގެންވި އުއްމަތަށް ބާވާލެއްވުނު އެންމެފަހު އާޔަތަކީ ގިނަ ޢިލްމުވެރިން ދެކެވަޑައިގަންނަވާ ގޮތުގައި ބަޤަރާ ސޫރަތުގެ 281 ވަނަ އާޔަތެވެ. އެ އާޔަތުގައި އެކަލާނގެ ވަޙީކުރައްވާފައިވެއެވެ. ((وَاتَّقُوا يَوْمًا تُرْجَعُونَ فِيهِ إِلَى اللَّهِ ثُمَّ تُوَفَّىٰ كُلُّ نَفْسٍ مَّا كَسَبَتْ وَهُمْ لَا يُظْلَمُونَ(( (البقرة: 281) މާނައީ: "އެދުވަހެއްގައި، ﷲ ގެ ޙަޟްރަތަށް ތިޔަބައިމީހުން ރުޖޫޢަކުރައްވާނޭ ދުވަހަކަށް، ތިޔަބައިމީހުން ރައްކާތެރިވެ ބިރުވެތިވާށެވެ! ދެން، ކޮންމެ ނަފްސަކަށްމެ، އެ ނަފްސެއް ހޯދި ކަމެއްގެ ޖަޒާ (އެދުވަހުން) ލިބޭނެތެވެ. އަދި، އެބައިމީހުންނަށް ބޭއިންސާފެއް ނުކުރައްވާ ހުށްޓެވެ." ރިވާޔަތްތަކުގައިވާގޮތުން މި އާޔަތް ބާވާލެއްވުނުތާ ކުޑަދުވަސްކޮޅެއްގެ ތެރޭގައި މި އުއްމަތުގެ ނަބިއްޔާ صَلَّى اللهُ عَلَيهِ وَسَلَّم މި ދުނޔެއާ އަލްވަދާޢު ކިޔުއްވިއެވެ.

ލޮބުވެތި އަޚުންނާއި އުޚްތުންނޭވެ! މި މަތިވެރި އާޔަތާމެދު ފުންކޮށް ވިސްނަވާލައްވާށެވެ! މި އާޔަތުން ކީރިތި ޤުރްއާން ބާވާލެއްވުން ނިންމަވާލެއްވުމުގެ ޙިކުމަތަކީ ކޮބައިބާއެވެ؟ މި އާޔަތުގައި މިވަނީ ކޮން ވާހަކައެއް ބާއެވެ؟ ފުންކޮށް ވިސްނާލައިފިނަމަ މަތިވެރި ފިލާވަޅުތަކެއް ލިބޭނެއެވެ.މި އާޔަތުގައި މާތްﷲ އެވަނީ އެންމެހާ މީސްތަކުންނަށް ނަޞޭޙަތެއް ދެއްވާފައެވެ. އަދި ހަމައެހެންމެ އިންޒާރުވެސް ކުރައްވާފައެވެ.

Advertisement

މިގޮތުން މި އާޔަތް ފައްޓަވާފައި އެވަނީ އަމުރެއް ކުރައްވަމުންނެވެ. އެއީ ބޮޑުވެގެންވާ ދުވަހަކާމެދު ބިރުވެތިވުމަށް އަމުރުކުރައްވަމުންނެވެ. އެ ދުވަހަކީ އެންމެހާ މީސްތަކުން އެބައިމީހުންގެ ވެރި ރަސްކަލާނގެ ޙަޟްރަތަށް އެއްކުރެވި ޖަމާކުރެވޭ ދުވަހެވެ. އަހުރެންނާއި ތިބާވެސް މެއެވެ. އެފަދަ ބިރުވެރިދުވަހެއް ދެކެފަނުވާވަރުގެ ބިރުވެރި ދުވަހެކެވެ. އެ ދުވަހުގެ ބިރުވެރިކަމުން މީސްތަކުންގެ ލޯތައް ހުއްޓި، ބިރުވެރިކަން ވަށާލާފައިވާނެ ދުވަހެކެވެ.

އެއްބަޔަކު ތިމަންމެން ފަނާވެ ވެއްޔަށް ވާނެނަމައޭ ހިތަށް އަރާނެ ދުވަހެކެވެ. އަނެއްބަޔަކު ތިމަންގެ ނަފްސޭ ތިމަންގެ ނަފްސޭ ގޮވައި، ލޯބިވީހާ ބައެއްގެ މަތިން ހަނދާންނެތިދާ ދުވަހެކެވެ. އެހެންކަމުން، މި ބިރުވެރިދުވަހާމެދު ދުނިޔެމަތީގައި ޙަޤީޤަތުގައި ބިރުވެތިވެ، އެދުވަހަށް ތައްޔާރުވުމަށް އެކަލާނގެ އެވަނީ އިންޒާރު ކުރައްވާފައެވެ.ދެން އަންގަވާފައި އެވަނީ އެދުވަހުން ކޮންމެ މީހަކުމެ ދުނިޔެމަތީގައި ހޯދައިގަތްކަމެއްގެ ޖަޒާ ޢަދުލުވެރިކަމާއެކު ދެއްވާނެ ވާހަކައެވެ. ޒައްރެއްގެ މިންވަރު ހެޔޮ ޢަމަލުކުރިޔަސް އެ ހެޔޮކަމެއްގެ ޖަޒާ ދެއްވޭނެއެވެ. އަދި ޒައްރެއްގެ މިންވަރު ނުބައި ޢަމަލެއްކުރިނަމަވެސް އެކަމުގެ ޖަޒާވެސް ދެއްވޭނެއެވެ.

ދުނިޔެމަތީގައި ކުރާ ކޮންމެ ޢަމަލެއް އަދި ބުނާ ކޮންމެ ބަހެއް ފަތްތަކެއްގައި ލިޔުއްވެއެވެ. އެކަމަށްޓަކައި މާތް ﷲ ވަނީ މަލާއިކަތުން ޢައްޔަނުކުރައްވާފައެވެ. ތިބާ ކިތަންމެ ފާޅުކޮށް އަދި ކިތަންމެ ސިއްރުން ކަމެއް ކުރިއަސްމެއެވެ. ތިބާގެ ނަފްސަށްޓަކައި ތިބާ ކުރާ ހެޔޮކަމުގެ ފައިދާވާނީ ތިބާއަށް ކަމުގައި އެކަލާނގެ އެވަނީ ބަޔާންކުރައްވާފައެވެ. އަދި ތިބާ ކުރާ ނުބައިކަމެއްގެ ނުބައިކަންވެސް ލިބޭނީ ހަމަ ތިބާއަށްކަންވެސް އެވަނީ ބަޔާންކުރައްވާފައެވެ. ތިބާގެ ޢަމަލުތަކުގެ ސަބަބުން މާތް ﷲއަށް ކޮށްދެވޭނެ އެއްވެސް މަންފާއެއް އަދި ގެއްލުމެއް ނޯންނާނެއެވެ.

އެކަލާނގެއީ ޙަމްދު ލިބިވޮޑިގެންވާ ފުދިވޮޑިގެންވާ ފަރާތެކެވެ. އެހެންކަމުން، ތިބާގެ ފަލާޙާއި ކާމިޔާބަށްޓަކައި އެދުވަހަށް ބިރުވެތިވާށެވެ! ދުނިޔޭގެ ދިރިއުޅުން ތިބާ ހެއްލުންތެރިކުރިޔަ ނުދޭށެވެ! ނަފްސަށްޓަކައި ހެޔޮކަންކަން އިސްކުރާށެވެ! ހެޔޮކަންކަން ކުރުމުގައި ހީވާގިވާށެވެ! މާތް ﷲއަށް ކިޔަމަންތެރި އަޅަކަށްވާށެވެ! އިސާހިތަކު ދުނިޔޭގެ ދަންފަޅި ހަމަކުރުމަށްފަހު މި ދުނިޔެއިން ލޯ މަރާލަންޖެހޭނެއެވެ. އެއިރުން ލަހެއްފަހެއް ނެތި އޮންނާނީ އެ ބިރުވެރި ދުވަހާ ބައްދަލުކުރަން ޖެހިފައެވެ. ކާމިޔަބުވެރިންނަކީ އެދުވަހާމެދު މާތް ﷲ އަންގަވާފައިވާ ފަދައިން ބިރުވެތިވެ، އެދުވަހަށް ތައްޔާރުވި ބައެކެވެ. އެބައެއްގެ ނަފްސަށްޓަކައި ހެޔޮޢަމަލު އިސްކުޅަ ބައެކެވެ.