ލާމަރުކަޒީ ނިޒާމެއްގެ ތެރެއިން ރައްޔިތުންނަށް ލުއި ފަސޭހަކަމާއެކު، ކަރަންޓުގެ ޚިދުމަތް ފޯރުކޮށްދިނުމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުއަށް އިތުރު ދައުރެއް ދެއްވުމަށް ސްޓެލްކޯގެ މެނޭޖިން ޑިރެކްޓަރ އަހުމަދު ޝަރީފު އެދިވަޑައިގަންނަވައިފިއެވެ. 

ޝަރީފު މިފަދައިން އެދިވަޑައިގަންނަވާފައި ވަނީ ސްޓެލްކޯއާއި އއ. އަތޮޅު ރަސްދޫއާއި، ތޮއްޑޫއާއި އުކުޅަހުގެ ރަށު ކައުންސިލާއެކު ފަހުމު ނާމާއެއްގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. 

ޝަރީފު ވިދާޅުވީ ލާމަރުކަޒީ ނިޒާމުގެ ތެރެއިން ރައްޔިތުންނަށް ޚިދުމަތް ފޯރުކޮށްދިނުމަކީ ރައީސް ސޯލިހު ވަރަށް ބޮޑަށް އެދިވަޑައިގަންނަވާކަމެއްކަމަށެވެ. 

"ރައީސުލްޖުމްހޫރިއްޔާގެ ލާމަރުކަޒީ ސިޔާސަތުގެ ތެރެއިން ވަރަށް މުހިންމުކަމެއް، އެކަމަކީ ސަރުކާރުގެ ހިއްސާވާ ކުންފުނިތަކުން ދިވެހިރާއްޖޭގެ ރައްޔިތުންނަށް ދޭ ޚިދުމަތް ވީހާވެސް ރައޔިތުންނަށް ލުއި ފަސޭހަ ގޮތަކަށް ކައިރިން ދެވޭނެ އިންތިޒާމު ހަމަޖެއްސުމަކީ" ޝަރީފު ވިދާޅުވިއެވެ. 

އެއާއެކު އޭނާ ވިދާޅުވީ މިހާރު ސްޓެލްކޯއިން މަސައްކަތް ކުރަމުންދަނީ އެ ސިޔާސަތާއި އެއްގޮތަށްކަމަށެވެ. 

އަދި މި ސަރުކާރު އައިފަހުން ލުއި ފަސޭހަކަމާއެކު ރައްޔިތުންނަށް ޚިދުމަތްތައް ލިބެމުންދާކަމުގެ އިހުސާސް ކޮންމެ ރައްޔިތަކަށްވެސް ކުރެވޭނެކަމަށް ޝަރީފު ވިދާޅުވިއެވެ. 

އޭގެ އިތުރުން ޝަރީފު ވިދާޅުވީ މިހާރަށްވުރެ ލުއިފަސޭހަކަމާއެކު ރައްޔިތުންނަށް ޚިދުމަތް ފޯރުކޮށްދިނުމަށް ރައީސް ސޯލިހުއަށް ދެވަނަ ދައުރެއް ދޭން ޖެހޭކަމަށެވެ. 

"އެއީ އަޅުގަނޑުމެން ކުންފުނީގެ އިލްތިމާސެއް މި ސަރުކާރުގެ ސިޔާސަތު އިތުރަށް ފުޅާކޮށް ހަރުދަނާ ކުރުމަށް އަދި ރައްޔިތުންނަށް ލާބަޔާއި މަންފާ ހޯދައި ދިނުމަށްޓަކައި މި ސަރުކާރަށް އިތުރު ދައުރެއް ދިނުމަކީ އަޅުގަނޑު ތިޔަ އެންމެ ބޭފުޅުންނަށް ކުރާ އިލްތިމާސްއެއް" ޝަރީފު ވިދާޅުވިއެވެ. 

ޝަރީފު ވަނީ އޭނާ އިލްތިމާސްކުރެއްވި ފަދައިން ކުރިއަށް އޮތް ރިޔާސީ އިންތިޚާބުގައި ރައްޔިތުން މި ސަރުކާރު ހޮވާދެއްވާނެކަމަށް އުންމީދު ކުރައްވާކަމަށް ވިދާޅުވެފައެވެ.