ދިވެހިރާއްޖޭގެ މިނިވަންކަމާއި ގައުމީ ސަލާމަތަށް އޮތް އެންމެ ބޮޑު ނުރައްކަލަކީ އިންޑިޔާގެ ނުފޫޒު އިމެއް، މިނެއްނެތި އޮތުން ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެެވެ.
ނުރަސްމީ ދަތުރުފުޅެއްގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިންޑިއާއަށް ވަޑައިގެންނެވުމާއި ގުޅިގެން ޝިޔާމް ކުރެއްވި ޓުވީޓެއްގައި ވިދާޅުވީ، ‏ދިވެހިރާއްޖޭގެ މިނިވަންކަމާ ޤައުމީ ސަލާމަތަށް މިއަދުއޮތް އެންމެބޮޑު ނުރައްކަލަކީ މި ޤައުމުގެ ދާޚިލީ އަދި ޚާރިޖީ ކަންކަމަށް އަވަށްޓެރި އިންޑިޔާގެ ނުފޫޒު އިމެއް އަދި މިނެއްނެތި ވަދެފައިވާ މިންވަރުކަމަށެވެ. އަދި އެކަމާމެދު ބަހެއްބުނަން އަދުގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ސަރުކާރު ނުކުޅެދި ހުރިހާގޮތަކުން ކަސްތޮޅު އެޅިފައިވާ މިންވަރު ކަމަށްވެސް ވިދާޅުވިއެވެ. 

ނުރަސްމީ ދަތުރުފުޅެއްގައި ރައީސް ނަޝީދު އިންޑިއާއަށް ވަޑައިގަންނަވާ ކަމަށް މަޖިލީހުގެ އިދާރާއިން ހާމަކުރެއްވީ އިއްޔެ އެވެ. އެމަނިކުފާނު އިންޑިއާއަށް ވަޑައިގެން ވަޑައިގެންފައި ވަނިކޮށް، ދިވެހިރާއްޖޭގެ ފޮރިން މިނިސްޓަރު އަދި އދ. ގެ އާންމު މަޖިލީހުގެ ރައީސް، ޝާހިދުވެސް އިންޑިއާއަށް ވަޑައިގަންނެވުމަށް ވަނީ ހަމަޖެހިފައެވެ. 

އދ. އިން ބުނެފައިވާ ގޮތުގައި ޝާހިދުގެ މި ދަތުރުފުޅުގައި އިންޑިއާގެ ނައިބު ރައީސް ޖަގްދީބް ދަންކަރު އަދި ފޮރިން ސެކެޓްރީ ވިނޭ ކްވަޓްރާ އާއި ބައްދަލުކުރުމަށް ވަނީ ހަމަޖެހިފައެވެ. އަދި އދ. ގެ އާންމު މަޖިލީހުގައި ހިނގަމުންދާ ބައެއް މައްސަލަތަކާއި ގުޅޭ މަޝްވަރާތައް ޝާހިދު އެބޭފުޅުންނާއި ކުރައްވާނެ ކަމަށްވެސް އދ. އިން ބުނެފައިވެއެވެ.