މި ދެ ދުވަހު ސޯޝަލް މީޑިއާގެ ކޮންމެ ޕްލެޓްފޯމަކަށް ވަތް ކަމުގައި ވީނަމަވެސް ފެނިގެންދަނީ ކިންގް ސަލްމާނު މިސްކިތުގެ ފޮޓޯއަކާއި ވީޑިއޯތަކެވެ.

ރޯދަމަހުގެ ހެޔޮ އެދުމާއި ތަހުނިޔާކިޔުމަށްވެސް ފޮނުވާލާފައި ހުންނަނީ ސަލްމާނު މިސްކިތުގެ މުންނާރުގެ ފޮޓޮއެވެ. ބަލާލަން ހިތްގައުމުވީމާ އެކަންޏެއް ނޫނެވެ. އެއީ މިހާތަނަށް ރާއްޖޭގައި ހެދުނު އެފަދަ ދެވަނައެއް ނުވާ ބިނާއަކަށް ވީތީމައެވެ. އަދި ކިންގް ސަލްމާނު މިސްކިތް ހުޅުވާ، އެތަނުގައި ނަމާދުކުރުމަށް ކެތް މަދުވެފައި ތިބި އެތައް ބައެއްގެ ދިގު އިންތިޒާރަށް ނިމުން އައިސް، މިސްކިތް ބަލާލުމުގެ ފުރުސަތު ފަހިވީމައެވެ.

ފޮޓޯ ނަގާމީހުން ތަނުގެ ފޮޓޯ ނަގާ އެ ފޮޓޯތައް ސޯޝަލް މީޑިއާގައި ހިއްސާކުރަމުންދަނީ އެއީ ވަރަށް ބޮޑު ފަޚުރެއްކަމުގައި ދެކިގެންނެވެ. ސޯޝަލް މީޑިއާގައި ފޮޓޯ ހިއްސާކުރަމުން ލިޔެފައި އިން އިބާރާތްކޮޅެއްގައިވެއެވެ.

"މިއީ ފަސްތަރީގެ ހޮޓަލެއް ނޫން މިއީ ރައީސް ޔާމީން އަޅުއްވާދެއްވި ކިންގ ސަލްމާނު މިސްކިތް"

އެއާއެކު އޭނާ ވަނީ އެފަދަ ބިނާއެއް ރާއްޖޭގައި އަޅުއްވާދެއްވިކަމަށްޓަކައި ރައީސް ޔާމީންއަށް ޝުކުރު އަދާކޮށްފައެވެ. ސަލްމާނު މިސްކިތުގެ ފޮޓޯތައް ހިއްސާކުރި ހަމަ ގިނަ މީހުން މިފަދައިން ރައީސް ޔާމީންއަށް ޝުކުރު އަދާކޮށްފައި ވަނިކޮށް ފެނެއެވެ.

އެ މިސްކިތަކީ 25 މިލިއަން ޑޮލަރުގެ މަސައްކަތެކެވެ. ސައުދީ ސަރުކާރުން އެ މިސްކިތް އިމާރާތް ކުރުމަށް 14.5 މިލިއަން ޑޮލަރު ދީފައިވެއެވެ. ބާކީ ފައިސާ ހަރަދު ކޮށްފައި ވަނީ ދިވެހި ސަރުކާރުގެ ބަޖެޓުންނެވެ.

އެ މިސްކިތުގެ ފުރަތަމަ އަދި ދެވަނަ ފަންގިފިލާގައި 4،000 މީހުންނަށް ނަމާދު ކުރެވޭނެއެވެ. މީގެއިތުރުން 350 މީހުންގެ ޖާގައިގެ އޮޑިޓޯރިއަމްއަކާއި 300 މީހުންގެ ޖާގައިގެ މަލްޓި ޕާޕަސް ހޯލެއްވެސް އެ މިސްކިތުގައި ހުރެއެވެ.

މިފެށޭ ١٤٤٣ ވަނަ އަހަރުގެ ބަރަކާތްތެރި ރަމަޟާންމަހުގެ ހެޔޮއެދުމާއި މުބާރަކްބާދީ އެންމެހައި އަޚުންނާއި އުޚުތުންނަށް އަރިސްކުރަމެވެ. އަދި ރަމަޟާން މަހުގެ ހެޔޮދަރުމަ އާއި ސަވާބު އެންމެ ފުރިހަމަ ގޮތުގައި ދެއްވާންދޭވެ! آمين