އުއްތަމަފަނޑިޔާރަކު އައްޔަނުކުރުން: ލިސްޓްގެ ކުރީގައި ޣަނީއާ އަބްދުﷲ
އުއްތަމަފަނޑިޔާރުގެ މަގާމަށް ހުޅުވާލި ފުރުސަތުގައި އެ މަގާމަށް ކުރިމަތިލެއްވި ބޭފުޅުންގެ ނަންތައް ޖުޑީޝަލް ސާވިސް ކޮމިޝަނުން ތަރުތީބުކޮށް ރައީސަށް ލަފާ އަރުވަން ތައްޔާރުވެއްޖެ އެވެ.
އުއްތަމަ ފަނޑިޔާރު ކަމަށް ހުޅުވާލީ އެ މަގާމުގައި ހުންނެވި އަހުމަދު މުތަސިމް އަދުނާން ފަނޑިޔާރުކަމުގެ މަގާމުން ޝަރަފްވެރިކަމާއެކު ރިޓަޔާ ކުރެއްވުމުންނެވެ.
ޖޭއެސްސީން ބުނި ގޮތުގައި އެ މަގާމަށް ތިން ބޭފުޅަކު ވަނީ ކުރިމަތިލާފަ އެވެ. އެއީ;
* އަބްދުﷲ މުހައްމަދު - ފެމެލީ ކޯޓްގެ ގާޒީ, ކްރިމިނަލް ކޯޓްގެ ކުރީގެ އިސް ގާޒީ
* ޝުޖާއު އުސްމާން - ހައިކޯޓްގެ ކުރީގެ އިސް ފަނޑިޔާރު
* އަބްދުލްޣަނީ މުހައްމަދު - ސުޕްރީމް ކޯޓްގެ ކުރީގެ ފަނޑިޔާރު
ޖޭއެސްސީން މިހާރު ވަނީ އެ ބޭފުޅުންގެ ނަންތައް ތަރުތީބު ކޮށްފަަ އެވެ. އެނގިފައިވާ ގޮތުގައި ލިސްޓްގައި އިސްކަން ދީފައި އޮތީ އަބްދުލްޣަނީ މުހައްމަދަށެވެ. ދެން އަބްދުﷲ މުހައްމަދަށެވެ.
ނަމަވެސް ރައީސަށް ފެނިވަޑައިގަންނަވާ ގޮތަކަށް ލިސްޓް ތަރުތީބުކޮށް މަޖިލީހަށް ފޮނުވާނެ އެވެ.
މި ބޭފުޅުންގެ ތެރެއިން ފަނޑިޔާރު ކަމުގައި މިހާތަނަށް ދެމި ހުންނެވީ ފެމެލީ ކޯޓްގެ ފަނޑިޔާރު އަބްދުﷲ މުހައްމަދު އެވެ. ޝުޖާއު އުސްމާން މަގާމުން އިސްތިއުފާ ދެއްވީ 2020 ވަނަ އަހަރު އެވެ. އެއީ އޭރު އޮތް ރައްޔިތުންގެ މަޖިލީހަށް ޝުޖާއު ވަކިކުރެއްވުމަށް ޖޭއެސްސީން މައްސަލަ ފޮނުވުމުންނެވެ. އިސްތިއުފާ ނުދެއްވި ނަމަ މަޖިލީހުން އޭނާ ވަކި ކުރައްވާނެ އެެވެ. ސުޕްރީމް ކޯޓްގެ ކުރީގެ ފަނޑިޔާރު އަބްދުލްޣަނީ މުހައްމަދު މަގާމުން ވަކިކުރެއްވީ 2019 ވަނަ އަހަރު އެވެ.
އުއްތަމަ ފަނޑިޔާރު މުއުތަސިމްއަކީ ރާއްޖޭގައި ޝަރަފްވެރިކަމާއެކު މަގާމުން ރިޓަޔާ ކުރެއްވި ފުރަތަމަ އުއްތަމަ ފަނޑިޔާރަށެވެ. މީގެ ކުރިން އައްޔަންކުރެއްވި ހުރިހާ އުއްތަމަ ފަނޑިޔާރުންނަކީ މަގާމުން ދުރުކުރެއްވި ބޭފުޅުންނެވެ.
އުއްތަމަ ފަނޑިޔާރުކަމުގެ މަގާމަށް މުއުތަސިމް ރިޓަޔާ ކުރެއްވުމާއި ގުޅިގެން ސުޕްރީމް ކޯޓު ވަގުތީ ގޮތުން ހިންގުމުގެ ޒިންމާ ފަނޑިޔާރު އަބްދުالله ހަމީދުއާ ވަނީ ހަވާލުކޮށްފަ އެވެ.
Advertisement
This content is created and paid for by advertisers and does not involve Voice Journalists
