ނޯތު ހާބަރުން އިތުރު ފީއެއް ނުނަގާނެ، ޖާގަ ލިބި އިތުރަށް ވާނީ ފަސޭހަ
މޯލްޑިވްސް ޕޯޓްސް ލިމިޑިޓް (އެމްޕީއެލް) ގެ ނޯތު ހާބަރުން މިހާރު ނަގަމުންދާ ފީތަކުގެ އިތުރުން އެއްވެސް ފީއެއް ނެގުމަށް އެ ކުންފުނިން ނިންމާފައިނުވާ ކަމަށް ބުނެފި އެވެ.
އެމްޕީއެލް އިން އެކަން ހާމަކުރީ ނޯތް ހާބަރު އިތުރަށް ތަރައްގީކޮށް ފީ ބޮޑުކުރަން ނިންމާފައިވާ ކަމަށް ބުނެ ދެކެވޭ ވާހަކަތަކާއި ގުޅިގެންނެވެ.
އެ ކުންފުނީގެ ސީއީއޯ ޑީސީޕީ ރިޓަޔާޑް މުޙައްމަދު ރިޝްވާން ވިދާޅުވީ ނޯތު ޕޯޓްގެ ސަރަހައްދަށް އިތުރު ކުރެވުނު ސަރަހައްދު ތަރުތީބުކޮށް، އިންތިޒާމް ކުރުމުގެ މަސައްކަތް މިހާރު ކުރަމުންދާ ކަމަށެވެ. އަދި ނޯތު ހާބަރުން މިހާރު ނަގަމުންދާ ފީތަކުގެ އިތުރުން އެއްވެސް ފީއެއް ނެގުމަށް ނިންމާފައިނުވާ ކަމަށެވެ.
"މި ސަރަހައްދު ތަރުތީބުކުރެވުމުން، މަސް ދޯނި ފަހަރަށް އިތުރު ޖާގަ ލިބި، އިތުރު ލުއިފަސޭހަތަކެއް ލިބިގެންދާނެ. އަދި އަތޮޅުތަކަށް މުދާ އުފުލާ އުޅަނދުތަކަށް މުދާ ބޭލުމާއި އެރުވުމުގެ މަސައްކަތްތައްވެސް މިހާރަށްވުރެ އަވަހަށް ކުރެވޭނެ މަގު ފަހިވެގެންދާނެ," ރިޝްވާން ވިދާޅުވި އެވެ.
މީގެ އިތުރުން، މި ގެނެވޭ ބަދަލުތަކާއެކު މި ސަރަހައްދުގައި ގަވައިދާ ހިލާފަށް ވިޔަފާރި ކުރަމުންދާ ބިދޭސީންގެ މައްސަލައަށް ހައްލެއް ލިބި، އެ ސަރަހައްދު ބެލެހެއްޓުމުގެ އިންތިޒާމްތައް އިތުރަށް ހަރުދަނާ ކުރެވޭނެ ކަމަށް ސީއީއޯ ވިދާޅުވި އެވެ. މި ބަދަލުގެ ސަބަބުން، މަސްވެރިންނާއި އޮޑިވެރިންނަށް މިހާރަށްވުރެ އަވަސް، ލުއިފަސޭހަ ހިދުމަތެއް ފޯރުކޮށްދެވޭނެ ކަމުގެ ޔަގީންކަން ވެސް ރިޝްވާން ވަނީ ދެއްވާފަ އެވެ.
Advertisement
This content is created and paid for by advertisers and does not involve Voice Journalists
