ފުރަމާލޭގައި މިނީ ބަހުގެ ޚިދުމަތް ފަށާއިރު، ހަތަރު ގެޓަގަރީގެ މީހުންނަށް ހިލޭ އެ ޚިދުމަތް ފޯރުކޮށްދިނުމަށް ނިންމައިފިއެވެ. 

އެގޮތުން ސަރުކާރުން ވަނީ 65 އަހަރުން މަތީގެ މީހުންނާއި، އުމުރުން 3 އަހަރު ނުފުރޭ ކުދިންގެ އިތުރުން ޚާއްސަ އެހީއަށް ބޭނުންވާ ފަރާތްތަކަށްވެސް ބިނީ ބަސްދަތުރު ހިލޭ ކުރެވޭނެ އިންތިޒާމުތައް ހަމަޖައްސާފައެވެ. އަދި ހަމައެހެންމެ ޔުނީފޯމު އަޅައިގެން ތިބޭ ސުކޫލު ދަރިވަރިންނަށްވެސް ބަހުގައި ހިލޭ ދަތުރުކުރެވޭނެކަމަށް ސަރުކާރުން ވަނީ ބުނެފައެވެ. 

މާދަމާ މިނީ ބަހުގެ ޚިދުމަތް ފަށާއިރު، އެކަމަށްޓަކައި މާލޭގެ ބޮޑެތި މަގުތަކުގައި ޕާކުކޮށްފައި ހުރި ސައިކަލުތައް ނަގާ ވަނީ ހުސްކޮށްފައެވެ. 

މާލޭ ސިޓީކައުންސިލުން ވަނީ މަގުމަތީގައި ޕާކުކޮށްފައި ހުރި ސައިކަލުތައް ނަގާފައެވެ. އަދި ސައިކަލުތައް ޕާކުކުރާނެ ޕާކިން ޒޯނުތަކެއްވެސް ހަދާފައެވެ. 

މިނީ ބަހަކީ މި ސަރުކާރުގެ 100 ދުވަހުގެ ވައުދެކެވެ. އެކި ފަހަރު އެކި ސަބަބުތަކާހުރެ، އެ ޚިދުމަތް ފެށުން ލަސްވެގެން ދިޔަނަމަވެސް މާދަމާ އެ ޚިދުމަތް ފެށުމާއެކު، ދަތުރުފަތުރުކުރުމށް ބޮޑެތި ލުއި ފަސޭހަތަކެއް ލިބިގެންދާނެކަމަށް ޓްރާންސްޕޯޓު މިނިސްޓްރީއިން ވަނީ ބުނެފައެވެ.