ރޯޑް ޑިވެލޮޕްމަންޓް ކޯޕަރޭޝަން ލިމިޓެޑްގެ ދަރަނި 2021 ވަނަ އަހަރު ނިމުނުއިރު، އިންތިހާއަށް އިތުރުވެފައިވާކަމަށް އޮޑިޓަރ ޖެނެރަލްގެ ރިޕޯޓުން ދައްކައިފިއެވެ.

އޮޑިޓަރ ޖެނެރަލް ނެރުއްވާފައިވާ އާރުޑީސީގެ 2021 ވަނަ އަހަރުގެ ފައިނޭންޝަލް އޯޑިޓް ރިޕޯޓަށް ބަލާއިރު، 2021 ވަނަ އހަަރު ކުންފުންޏަށް މާލީގޮތުން ލިބުނު ގެއްލުން ވަނީ ރެކޯޑް މިންވަރަކަށް އިތުރުވެފައެވެ. މި މުއްދަތުގެ ތެރޭގައި ކުންފުންޏަށް ލިބެންހުރި ފައިސާއަށް މާބޮޑު ބަދަލެއް އައިސްފައިނުވާއިރު، ކުންފުނީގެ ދަރަނިތައް ވަނީ އިންތިހާއަށް އިތުރުވެފައެވެ.

2020 ވަނަ އަހަރު އާރުޑީސީއަށް 41.7 މިލިއަން ރުފިޔާ ގެއްލުންވިއިރު ޖެހިގެން އައި 2021 ވަނަ އަހަރު އެކުންފުންޏަށް ވަނީ 108.1 މިލިއަން ރުފިޔާގެ ގެއްލުމެއް ލިބިފައެވެ. 2021 ވަނަ އަހަރު އިދާރީ ހަރަދުތައް 117.4 މިލިއަން ރުފިޔާގައި ހުރިއިރު، އޭގެ ކުރީ 2020 ވަނަ އަހަރު އިދާރީ ހަރަދުތައް ހުރީ 51 މިލިއަން ރުފިޔާގައެވެ. 

2021 ވަނަ ނިމުނުއިރު އާރުޑީސީގެ ޖުމްލަ ދަރަނި 323 މިލިއަން ރުފިޔާގައި ހުރިއިރު އޭގެ ކުރީ އަހަރު ނިމުނުއިރު އެ އަދަދު ހުރީ 95 މިލިއަން ރުފިޔާގައެވެ. އޮޑިޓަރ ޖެނެރަލް ނެރުއްވާފައިވާ ރިޕޯޓަށް ބަލާއިރު، އާރުޑީސީގެ ދަރަނި 2021 ވަނަ އަހަރު ނިމުނުއިރު އެހާބޮޑަށް މައްޗަށްގޮސްފައިވަނީ ކުންފުންޏަށް ގިނަ އަދަދަކަށް މުއައްޒަފުން ނަގައި މުސާރަ އާއި އިނާޔަތްތަކަށް ކުރި ހަރަދު އިތުރުވުމުންނެވެ. 2021 ވަނަ އަހަރު ނިމުނުއިރު މުއައްޒަފުންގެ އަސާސީ މުސާރަ 14 މިލިއަނުން 33 މިލިއަނަށް އިތުރުވެގެން ދިޔައިރު އިނާޔަތްތައް ވަނީ 22 މިލިއަނުން 57 މިލިއަން ރުފިޔާއަށް އިތުރުވެފައެވެ. 

އޮޑިޓަރ ޖެނެރަލްގެ ރިޕޯޓްގައި ވަނީ އެ މުއްދަތުގެ ތެރޭގައި އިތުރުވެފައިވާ ދަރަނިތަކާއި ކުރި ހަރަދުތައް ޔަގީންކުރުމަށް ބޭނުންވި ކިތާބީ ހެކި ލިބިފައިނުވާކަންވެސް ފާހަގަކޮށްފައެވެ. 

އާރުޑީސީގެ ހިސާބުތަކަށް ބަލާއިރު އެ ކުންފުންޏަކީ ފެށުނީއްސުރެވެސް ގެއްލުމުގައި ހިންގަމުން އަންނަ ކުންފުންޏެކެވެ. އާރުޑީސީގެ މިހާރުގެ މެނޭޖްމަންޓުން ވަނީ ކުންފުނި ރީފޯމްކުރުމުގެ މަސައްކަތް ފަށާފައެވެ.