ހުސްވެފައިވާ ހައިކޯޓުގެ ފަނޑިޔާރުކަމަށް ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު އަލްއުސްތާޛު މުޙައްމަދު ޝަހީދުގެ ނަން ފޮނުވާފައިވަނިކޮށް ކުއްލި ގޮތަކަށް އެ ނަން ގެންގޮސްފިއެވެ.
ހައިކޯޓުގެ ފަނޑިޔާރުކަމުގެ މަގާމަށް ޝަހީދުގެ ނަން ފޮނުވުމާއެކު އެނަމަށް ގިނަ ބައެއްގެ ފާޑުކިޔުންތައް ވަނީ އަމާޒުވެފައެވެ. އެކަން އެހެން އޮއްވައި ހައިކޯޓަށް ފަނޑިޔާރުން އައްޔަނުކުރުމަށް މިރޭ ތައްޔާރުވަމުންދަނިކޮށް ޝަހީދު ވަނީ އޭނާގެ ނަން އަނބުރާ ގެންދިއުމަށް ޖޭއެސްސީއަށް ސިޓީއެއް ފޮނުއްވާފައެވެ.
ޝަހީދު ހޯމް މިނިސްޓްރީގައި ހުންނެވި މަގާމުން ވަކިވެވަދައިގެންނެވީވެސް ހައިކޯޓުގެ ފަނޑިޔާރުކަމުގެ މަގާމަށް ވަޑައިގެންނެވުމަށެވެ.
މީގެ އިތުރުން ޝަހީދު ހުވާކުރެއްވުން ހުއްޓުވުމަށްޓަކައި ކުރިން ޕީޖީ އޮފީހުގެ ވަކީލެއްގެ ގޮތުގައި މަސައްކަތް ކުރެއްވި އަހުމަދު ނައުޝާދު ވަނީ ސިވިލްކޯޓަށް މައްސަލައެއްވެސް ހުށަހަޅުއްވާފައެވެ. އަދި އެ މައްސަލަ ކޯޓުން ވަނީ ބަލައިވެސް ގަނެފައެވެ.
ހައިކޯޓުގެ ފަނޑިޔާރުކަމަށް އައްޔަނުކުރުމަށް ޖުޑީޝަލް ސާވިސް ކޮމިޝަނުން ޝަހީދުގެ ނަން ފޮނުވާފައިވަނީ ޖުލައިމަހުގެ 30 ވަނަ ދުވަހުއެވެ.
ޝަހީދުގެ އިތުރުން ދެން ހައި ކޯޓުގެ ފަނޑިޔާރުކަމަށް ހުށަހެޅުމަށް ޖޭއެސްސީން ނިންމާފައިވަނީ، ކުރީގެ ގާޒީ އަލްއުސްތާޛު ޢަބްދުﷲ ޖަމީލް މޫސާގެ ނަމެވެ. އަލްއުސްތާޛު ޢަބްދުﷲ ޖަމީލް މޫސާއަކީ ކުއްލިއްޔަތުލް ދިރާސާތުލް އިސްލާމިއްޔާއިން ބެޗްލަރ އޮފް ޝަރީޢާ އެންޑް ލޯ ވިތް އޮނަރސް ހާސިލް ކުރައްވާފައިވާ ބޭފުޅެކެވެ. އެ ބޭފުޅާ ވަނީ ފަނޑިޔާރުކަމުގައި 15 އަހަރަށްވުރެ ދިގުމުއްދަތަކަށް ޚިދުމަތް ކުރައްވާފައެވެ. އެގޮތުން ޖަމީލް ވަނީ ލ.ދަނބިދޫ މެޖިސްޓްރޭޓް ކޯޓުގެ މެޖިސްޓްރޭޓްކަމާއި، ސިވިލް ކޯޓުގެ ޤާޟީގެ މަޤާމް އަދާކުރައްވާފައެވެ.
Advertisement
This content is created and paid for by advertisers and does not involve Voice Journalists
