ހުޅުމާލޭ ދެވަނަ ފިޔަވަހީގައި ހުޅުވި ޕްރައިމަރީ ސުކޫލާއެކު ދަރިވަރުންނާއި ބެލެނިވެރިންނަށް ބޮޑެތި ލުއިފަސޭހަތަކެއް ލިބިގެންދާނެކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
ގިނަ ދުވަސްތަކަށްފަހު ހުޅުމާލޭ ެވަނަ ފިޔަވަހީގައި ޕްރައިމަރީއަށް ކިޔަވައިދޭ ކާމިލް ދީދީ ޕްރިމަރީ ސުކޫލު ވަނީ ހުޅުވާފައެވެ.
އެ ސުކޫލުގެ ދަރިވަރުންނާއެކު އެޑިއުކޭޝަން މިނިސްޓަރު ޑރ. އައިޝަތު އަލީ އާއި ނައިބު ރައީސް ފައިސަލް ނަސީމު ވަނީ ވަގުތުކޮޅެއް ހޭދަކުރައްވާފައެވެ.
އެފަހުން މިނިސްޓަރު ދެއްވި އިންޓަރވިއުއެއްގައި ވިދާޅުވީ، ހުޅުމާލޭގެ ދެވަނަ ފިޔަވަހީގައި ހުޅުވި ސުކޫލާއެކު، ބަހަށް މަޑުކުރަން ޖެހުމާއި، ދުރަށް ހިނގަންޖެހުން ފަދަ ތަކުލީފުތަކަށް ހައްލެއް ލިބިގެންދާނެކަމަށެވެ. ސުކޫލު ހުޅުވުމުގެ ސަބަބުން ހިޔާ ފްލެޓުތަކުގައި ދިރިއުޅޭ ފަރާތްތަކަށް ވަރަށް ބޮޑެތި ލުއިތަކެއް ލިބިގެންދާނެކަމަށް މިނިސްޓަރު ވިދާޅުވިއެވެ.
"އަޅުގަނޑު މިހާރު ގަބޫލުކުރާ ގޮތުގައި، ބެލެނިވެރިންނަށް މާ ދުރަށް ދާކަށް ނުޖެހޭނެ ކުދިން ގޮވައިގެންނެއް، ގާތްގަނޑަކަށް މިނެޓެއް ދެމިނެޓެއްވަރު ހިނގާލާފައި އެމީހުންނަށް އައިސް ދަރިވަރުން ސުކޫލަށް ލެވޭނެ. އޭގެ އިތުރުން ބަހަށް މަޑުކޮށްގެން ތިބެން ޖެހުމާއި، އެ ހުރިހާ ކަމަކަށް ވަރަށް ބޮޑު ފަސޭހައެއް ލިބިގެންދާނެ ސުކޫލުގެ ސަބަބުން" މިނިސްޓަރު ވިދާޅުވިއެވެ.
ހުޅުމާލޭގައި ހުޅުވި ޕްރައިމަރީ ސުކޫލަކީ ގްރޭޑު އެކަކުން ފެށިގެން ހަޔައަށް ކިވައިދޭ ސުކޫލެކެވެ. އަދި މިހާރު އެ ސުކޫލުގައި 824 ދަރިވަރުން ކިޔަވަމުންދާކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު އިތުރަށް ވިދާޅުވީ މިއަހަރު ތެރޭގައި ހުޅުމާލޭގެ ދެވަނަ ފިޔަވަހީގައި ޕްރީ ސުކޫލެއްވެސް ހުޅުވިގެންދާނެކަމަށެވެ. އަދި އެ ސުކޫލާއެކުވެސް އިތުރު ފަސޭހަތަކެއް ދަރިވަރުންނާއި ބެލެނިވެރިންނަށް ލިބިގެންދާނެކަމަށް ގަބޫލުކުރައްވާކަމަށް މިނިސްޓަރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
