2019 ވަނަ އަހަރުގެ ޑިސެމްބަރު މަހުގެ ފަހުކޮޅު ޗައިނާގެ ވޫހާން ސިޓީއިން ފެތުރެން ފެށި ގޮތް ނޭނގޭ ރޯގާއަކާއެކު މުޅި ދުނިޔެ އަށް ސިހުން ގެނުވިއެވެ. އެތާ ދުވަސްކޮޅެއް ފަހުން އެ ވައިރަހަށް ކޯވިޑް-19 ގެ ނަމުން ނަންދީ އެއީ އާލަމީ ވަބާއެއްގެ ގޮތުގައި ކަނޑައެޅިގެންދިޔައެވެ. އެއާއެކު ހުރިހާ ގައުމަކުންވެސް އެ ވައިރަހާއި ހަނގުރާމަކުރުމަށް ތައްޔާރުވާން ފެށިއެވެ. ބަލި ފެތުރުން ކޮންޓްރޯލުކުރުމަށް ވަރުގަދަ ޕްރޮޓޮކޯލުތަކެއް ހެދިއެވެ.

ދިވެހި ސަރުކާރުންވެސް ދުނިޔޭގެ ގައުމުތަކާއި އެއް ހަމައެއްގައި ކޯވިޑްގެ އާލަމީ ވަބާއާއި ދެކޮޅަށް މަސައްކަތް ފަށައިގަތެވެ. ދިވެހި ރައްޔިތުން ކޯވިޑްގެ ބަލިމަޑިކަމުން ސަލާމަތްކުރުމަށް ސިއްހީ ނިޒާމުގެ ހަކަތަ އިތުރުކުރުމުގެ މަސައްކަތް ސަރުކާރުން ފަށައިގަތެވެ.

ކޯވިޑްއަކީ އާދައިގެ ރޯގާއެއް ނަމަވެސް، ބަލީގެ އަލާމަތްތައް ބޮޑުވެއްޖެކަމަށްވާނަމަ މީހާ ވެންޓިލޭޓަރަށް ލާން ޖެހޭ ހިސާބަށްވެސް ގެންދެއެވެ. ބަލީގައި ނިޔާވަނީ ހާލަތު އެންމެ ބޮޑަށް ގޯސްވެގެންދާ މީހުންކަމަށްވާތީ ސަރުކާރުން ބުނަމުން ދިޔައީ އެންމެ ބޮޑު އަހަންމިއްޔަތުކަމެއް ދެނީ، އެންމެ ގޯސް ހާލަތުގައި ގިނަ ބަޔަކަށް ފަރުވާދިނުމަށް ބޭނުންވާނެ ވެންޓިލޭޓަރުތައް ހަމަކުރުމަށްކަމަށެވެ.

އެހެން ނަމަވެސް ކޯވިޑް ނަވާރައިން އަރައިގަތުމަށް ދިވެހިރާއްޖެ މި ކަޑައްތުކުރި ރާސްތާގައި ބޮޑު ހަތަރު ރާޅާއި ކުރިމަތިލިއުރުވެސް އެންމެ ގޯސް ހާލަތުގައި ރައްޔިތުންނަށް ފަރުވާދޭން ހޯދަން ބުނި ވެންޓިލޭޓަރުތައް ސަރުކާރަކަށް ރައްޔިތުންނާއި ހަމަޔަށް ގެނެސްދެވިފައެއް ނުވެއެވެ.

ކޯވިޑްގެ ފުރަތަމަ ރާޅު މައިތިރިވުމާއެކު، ކޯވިޑްގެ ނަމުގައި ސަރުކާރުގެ އިދާރާތަކުން ކޮށްފައިވާ ޚަރަދުތަކުގެ އޯޑިޓް ރިޕޯޓުތަކުން ހާމަވެގެންދިޔައީ ވަކިން ބޮޑަށް ފިއްކަދައިގެންދާ ޒާތުގެ ވާހަކައެކެވެ. އޭރު ހުންނެވި އޮޑިޓަރ ޖެނެރަލް ހަސަން ޒިޔަތު ނެރުއްވި ކޯވިޑް ރިޕޯޓުގައި ބުނެފައިވާގޮތުން ވެންޓިލޭޓަރުގަތުމުގެ ނަމުގައި ޑުބާއީގެ ކުންފުންޏަކާއެކު އެއްބަސްވުމެއް ހަދާފައިވަނީ ގަވައިދާއި ޚިލާފަށެވެ. އަދި އެއީ ކޮރަޕްޝަނަށް މަގުފަހިވާގޮތަށް ހަދާފައިވާ އެއްބަސްވުމެކެވެ.

ކޯވިޑްގެ ހާލަތު ރާއްޖެއާއި ބައްދަލުކުރުމާއި ގުޅިގެން ރާއްޖޭގެ އާބާދީއަށް ބަލައި ހާލަތަށް ބޭނުންވާ 145 ވެންޓިލޭޓަރު ގަތުމުގެ މަސައްކަތް ސަރުކާރުން ފަށާފައިވާކަން އިއުލާނުކޮށްފައިވެއެވެ. ވެންޓިލޭޓަރުތައް ހޯދުމަށް ޖުމްލަ ތިން ކުންފުންޏަކާއެކު ސަރުކާރުން އެއްބަސްވުން ހެދިއެވެ. އޯޑިޓް ރިޕޯޓުގައި ފާހަގަކޮށްފައިވާ ޑުބާއީ ކުންފުންޏަކީ އޭގެ ތެރެއިން އެއް ކުންފުންޏެވެ.

އެ ކުންފުންޏާއެކު ހެދި އެއްބަސްވުމުގެ ދަށުން އެޑްވާންސްގެ ގޮތުގައި ވެންޓިލޭޓަރުތައް ގަތުމުގެ އަގުގެ 90 އިންސައްތައަށް ވާ 30.4 މިލިއަން ރުފިޔާވެސް ދައްކާފައިވާކަން އޯޑިޓް ރިޕޯޓުން ފާހަގަކޮށްފައި އޮތެވެ. ސަރުކާރުން އޭރު ބުނީ ޑުބާއީ ކުންފުންޏާއި އެކު ވެންޓިލޭޓަރުތައް ގަތުމަށް ސޮއިކުރީ ދުނިޔޭގެ ސިއްހަތު ޖަމުއިއްޔާގެ ލަފާގެ މަތިންކަމަށެވެ. އެހެން ނަމަވެސް އޯޑިޓް ރިޕޯޓު އެކަންވެސް ދޮގުކުރެއެވެ. އަދި އެ ކުންފުންޏާއި އެކު އެއްބަސްވުން ހަދާފައިވަނީ ޑަބްލިއުއެޗްއޯއިން ދީގެން ނޫންކަމަށާއި، އެކަންކޮށްފައިވަނީ ޑަބްލައިއުއެޗްއޯއިން ރާއްޖެއަށް ކަނޑައަޅުއްވާފައި ހުންނަވާ ސަފީރުގެ އަމިއްލަ ހައިސިއްޔަތުންކަން ބަޔާންކޮށްފައިވެއެވެ. އޭގެ އިތުރުން ޑުބާއީ ކުންފުންޏާއެކު އެއްބަސްވުން ހެދީ އެ ކުންފުންޏަކީ މާލީ ގޮތުންނާއި ފަންނ ގޮތުން ގާބިލް ކުންފުންޏެއްތޯ ބަލާ ކަށަވަރުކޮށްފައި ނޫންކަންވެސް އޯޑިޓް ރިޕޯޓުގައި ވަނީ ހާމަކޮށްފައެވެ.

އޯޑިޓް ރިޕޯޓާއި ގުޅިގެން ހިންގި އިތުރު ތަހުގީގުތަކުން ވެންޓިލޭޓަރުތައް ގަތުމުގެ ނަމުގައި ބޮޑު ކޮރަޕްޝަނެއް ހިންގާފައިވާކަން އޭސީސީއިން ވަނީ ހާމަކޮށްފައެވެ. އަދި އޭރު ހުންނެވި ހެލްތު މިނިސްޓަރ އަމީނު ހިމެނިވަޑައިގަންނަވާ ގޮތަށް 11 މީހުންގެ މައްޗަށް ދައުވާ އުފުލުމަށް އޭސީސީއިން ޕްރޮސެކިއުޓަރ ޖެނެރަލްގެ އޮފީހަށްވެސް ފޮނުވާފައިވެއެވެ. އެހެން ނަމަވެސް ހާމަކަން ބޮޑުކޮށް ފެންނަން އޮތް މި މައްސަލައިގައި އުންސުރު ހަމަނުވާކަމަށް ޕީޖީއިން ކަނޑައެޅިއެވެ. އެ ހިސާބުން ކޯވިޑްގެ ބަލި މަޑުކަމުގެ ތެރޭގައި ރައްޔިތުން ގެތަކުގައި ބަންދުކޮށްފައި ބޭތިއްބުމަށްފަހު ސަރުކާރުން ހިންގި އެ ބިޔަ ކޮަޕްޝަންގެ މައްސަލަވެސް ހިނދިން ދިޔައީއެވެ.