ކުރީގެ ރައީސް އަބްދުﷲ ޔާމީން އަބްދުލްގައްޔޫމު ޖަލަށްލާނެކަމުގެ އިޝާރާތެއް ހޯމް މިނިސްޓަރު އިމްރާނު އަބްދުﷲ ދެއްވައިފިއެވެ.
އޭނަ އެފަދައިން އިޝާރާތްކުރައްވާ ވާހަކަދައްކަވާފައިވަނީ މޯލްޑިވްސް ކަރެކްޝަނަަލް ސަރވިސްގެ 51 ވަނަ އަހަރީ ދުވަހުގެ ޚާއްސަ ޖަލްސާގައި ވާހަކަދައްކަވަމުންނެވެ.
އެ ރަސްމިއްޔާތުގައި ވާހަކަދައްކަވަމުން އޭނާ ވިދާޅުވީ އަމާޒަކީ ކަރެކްޝަންސްގެ ބެލުމުގެ ދަށުގައި ޖަލުތަކުގައި ތިބޭ ހުރިހާ ގައިދީންނަކީ ރިހިބިލިޓޭޓް ވާންޖެހޭނެ މީހުން ކަމުގައި ހެދުން ކަމަށެވެ.
ރައީސް ޔާމީން ޖަލަށް ލިޔަސް އެ އުސޫލަށް ތަބާވާން ޖެހިވަޑައިގަންނަވާނެކަމަށާއި، ގައިދީން ރިހިބިލިޓޭޝަން ޕްރޮގްރާމު ފުރިހަމަކުރައްވަން ޖެހިވަޑައިގަންނަވާނެކަމަށް ހޯމް މިނިސްޓަރު އިމްރާނު ވިދާޅުވިއެވެ. މައްސަލައެއް އޮވެގެން ޖަލަށް ދިޔުމުން އަނބުރާ މުޖުތަމައު އަށް އަންނަން ވާނީ އެތަނުގެ އެތެރެއިން ކޮންމެވެސް ޕްރޮގްރާމެއްގައި ބައިވެރިވެ އިސްލާހީ ފިލާވަޅެއް ލިބިގެން ކަމަށްވެސް އިމްރާން ވިދާޅުވި އެވެ.
ރައީސް ޔާމީން ރިހިބިލިޓޭޝަން ޕްރޮގްރާމު ފުރިހަމަ ކުރައްވަން ޖެހިވަޑައިގަންނަވާނެކަމަށް އިމްރާނު ވިދާޅުވެފައިވާއިރު، ރައީސް ޔާމީންގެ މައްޗަށް އުފުލާފައިވާ ދައުވާގެ ޝަރީއަތެއް ކްރިމިނަލް ކޯޓުގައި ކުރިއަށްދާކަން ފާހަގަކޮށްލެވެއެވެ.
އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދޫކުރުމުގެ މުއާމަލާތާއި ގުޅިގެން އެމަނިކުފާނުގެ މައްޗަށް ދެ ދައުވާއެއް އުފުލާ، އެ މައްސަލައިގެ އަޑުއެހުންތައް މިހާރު ކްރިމިނަލް ކޯޓުގައި ކުރިއަށްދާއިރު، ހަމަ އެ ޚިޔާނާތުގެ ދަށުން ފުއްގިރި ކުއްޔަށް ދިން މުއާމަލާތާއި ގުޅޭ މައްސަލައެއްވެސް ކޯޓުގައި އޮތްކަން ފާހަގަކޮށްލެވެއެވެ.
އެހެން ނަަމަވެސް އެ ޚިޔާނާތައި ގުޅުވާ ކޮށްފައިވާ ތުހުމަތުތައް އަދި އެމަނިކުފާނުގެ މައްޗަށް ސާބިތެއް ނުވެއެވެ.
Advertisement
This content is created and paid for by advertisers and does not involve Voice Journalists
