ޖޫން މަހުން ފެށިގެން ޕާކިސްތާނުގެ އެކި ހިސާބުތަކަށް ކުރަމުންދާ މޫސުމީ ވިއްސާރައިގައި ކުރިމަތިވެ އެކި ޙާދިސާތަކުގައި އެތައް ހާސް ބަޔަކު ނިޔާވެ، އެ ގައުމަށް ލިބިފައިވާ ގެއްލުންތަކާއި ގުޅިގެން ޕްރޮގްރެސިވް ކޮންގްރެސް ކޯލިޝަނުން ހަމްދަރުދީ ފާޅުކޮށްފިއެވެ.
އިދިކޮޅު ކޯލިޝަނުން ބުނީ އިދިކޮޅު ކޯލިޝަންގެ ލީޑަރު ރައީސް އަބްދުﷲ ޔާމީން އަބްދުލްގައްޔޫމާއި، ކޯލިޝަންގެ ދެ ޕާޓީގެ ސެނެޓް މެމްބަރުންނާއި އާންމު މެމްބަރުންވެސް ހިމެނޭހެން ޕާކިސްތާނަށް ހަމްދަރުދީއާއި ހެޔޮ ދުއާ އަރިސްކުރާކަމަށެވެ.
އެ ކޯލިޝަންގެ ފަރާތުން ވަނީ ދިވެހިރާއްޖޭގައި ހުންނަ ޕާކިސްތާނު އެމްބަސީއަށް އިޚްތިރާމުގެ ޒޔާރަތެއްވެސް ކުރައްވާފައެވެ. އިދިކޮޅުން ބުނީ ޕާކިސްތާނަށް ލިބުނު ގެއްލުންތަކާއި ގުޅިގެން ހިތާމަކުރާކަމަށެވެ. އަދި މި ދަނޑިވަޅުގައި އިދިކޮޅު ކޯލިޝަންގެ ލީޑަރޝިޕާއި، އާންމު މެމްބަރުންގެ އިޚްތާސްތެރި ދުއާއާއި ހަމްދަރުދީ ވަނީ ޕާކިސްތާނާއި އެކުގައިކަމަށެވެ.
ޕާކިސްތާނަށް ކުރި މޫސުމީ ވިއްސާރައިގެ އަސަރު 33 މިލިޔަން މީހުންނަށް ކޮށްފައިވާ ކަމަށް އެ ޤައުމުގެ މޫސުމީ ބަދަލުތަކާ ބެހޭ ވަޒީރު ޝެރީ ރަޙުމާން ވަނީ ވިދާޅުވެފައެވެ. އެއީ އެ ޤައުމުގެ އާބާދީގެ 15 އިންސައްތައެވެ. މި އަހަރުގެ ވިއްސާރަ މޫސުގައި ކުރިމަތިވި ފެންބޮޑުވުމުގެ ހާދިސާތަކުގައި 400,000 އަށްވުރެ ގިނަ ގެ ވަނީ ހަލާކުވެފައެވެ. އަދި، 184,000 އަށްވުރެ ގިނަ މީހުން ވަނީ ގެދޮރު ނެތި، މަގުމަތިވެފައެވެ.
Advertisement
This content is created and paid for by advertisers and does not involve Voice Journalists
