ރާއްޖޭގެ އެކި ސަރަހައްދުތަކުގައި ވާހަކަދައްކާ ބަހުރުވުތައް ހިމެނެނީ ދިވެހި ބަހުގެ ތެރޭގައިކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖު ޔުމްނާ މައުމޫނު ވިދާޅުވެއްޖެއެވެ. 

އެކަމަނާ މިފަދައިން ވިދާޅުވެފައިވަނީ އައްޑޫ ބަހުރުވައިން ހުކުރު ކުތުބާ ދިނުމުން އެ އަތޮޅު މީދޫ ގެ މިސްކިތެއްގައި މުދިމަކު ސަސްޕެންޑުކޮށްފައިވާ ދަނޑިވަޅެއްގައެވެ. އޭނާ ސަސްޕެންޑުކުރީ، ދިވެހި ބަސްނޫން އެހެން ބަހަކުން ޚުތުބާ ދިންކަމަށް ތުހުމަތުކޮށްފައެވެ. 

ހެރިޓޭޖު މިނިސްޓަރު ވަނީ އެކަމަނާ ކުރެއްވި ޓްވީޓެއްގައި ރާއްޖޭގައި ވާހަކަދައްކވާ އެކި ބަހުރުވަ ތަކަކީވެސް ދިވެހި ބަސްކަން ފާހަގަކުރައްވާފައެވެ. އަދި ބަހުރުވަތައް ކުރިއެރުވުމަށްޓަކައި މުއާމަލާތުތައް ކުރާނެ ފުރުސަތުތައް ދޭން ޖެހޭނެކަމަށް މިނިސްޓަރު ވިދާޅުވިއެވެ. 

އެއާއެކު މިނިސްޓަރު ޔުމްނާ ވިދާޅުވީ ބަހުރުވައަކީ ވާހަކަދައްކާ ރަށެއްގެ ނުވަތަ އަތޮޅެއްގެ މީހުންގެ ދިރިއުޅުމާއި ސަގާފަތާއި ގުޅިލާމެހިފައިވާ އޮންނަ އެއްޗެއްކަމަށެވެ. އަދި އެއީ އެރަށެއްގެ ނުވަތަ އަތޮޅެއްގެ މުހިންމު މާނަވީ ސަގާފީ ތަރިކައެއްކަމަށެވެ.

ދިވެހި ބަސް ހިމާޔަތްކޮށް ރައްކާތެރިކުރެވޭނީ ބަހުރުވަތައްވެސް ރައްކާތެރިކޮށްގެންކަމަށް މިނިސްޓަރު ވަނީ ވިދާޅުވެފައެވެ. 

ދިވެހިބަސް ނޫން އެހެން ބަހަކުން ޚުތުބާ ވިދާޅުވިކަމަށް ކަނޑައަޅާ އައްޑޫ ބަހުރުވައިން ޚުތުބާ ކިޔުއްވި އިމާމު ސަސްޕެންޑުކޮށްފައިވާއިރު، އޭނާ ވިދާޅޫވީ އައްޑޫ ބަހުން ޚުތުބާ ވިދާޅުވީ، މިސްކިތަށް އަންނަ ގިނަ ބިދޭސީންނަށް ޚިތުބާގައި ކިޔާ އެއްޗެއް ފަހުމުކޮށްދިނުމަށްކަމަށެވެ. އަދި ޚުތުބާގައި ލިޔެފައިވާ އެއްޗަކަށް އެއްވެސް ބަދަލެއް ގެނެސްފައި ނުވާނެކަމަށް އޭނާ ވަނީ ވިދާޅުވެފައެވެ.