ވ. އާރަށުގެ މުއާމަލާތާއި ގުޅިގެން ކުރީގެ ރައީސް އަބްދުﷲ ޔާމިން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމެއް ހޮނިހިރު ދުވަހަށް ތާވަލުކޮށްފިއެވެ. 

އެ މައްސަލައިގެ އަޑުއެހުމެއް މިއަދަށްވެސް ތާވަލް ކުރެވުނެވެ. އެހެން ނަމަވެސް ރައީސް ޔާމީން އާލާސްކަންފުޅާއި އުޅުއްވާތީ މިއަދުގެ އަޑުއެހުން ވަނީ ކެންސަލްކޮށްފައެވެ. 

ވ. އާރަށުގެ މައްސަލައިގައި މިހާރު ކުރިއަށްދަނީ ދިފާއުގެ ފަރާތުން ހުށައަޅާފައިވާ ހެކިންގެ ހެކިބަސް ނެގުމުގެ މަރުހަލާއެވެ. އެގޮތުން އިއްޔެގެ އަޑުއެހުމުގައި ދިފާއުގެ ފަރާތުން ހެކީގެ ގޮތުގއި ހުށައަޅާފައިވާ އަހުމަދު ނަރީޝްގެ ހެކިބަސް ވަނީ ކްރިމިނަލް ކޯޓުން ނަގާފައެވެ.

Advertisement

މި މައްސަލައިގައި ރައީސް ޔާމީންގެ ފަރާތްޕުޅުން ވަނީ ޝަފަވީ 7 ހެކި ހުށައަޅާފައެވެ. 

ދައުލަތުން ހުށައެޅި ހެކިންގެ ހެކިބަސް ނެގުން ނިންމާލަމުން، ދައުލަތުންވަނީ ރައީސް ޔާމީންގެ ފަރާތްޕުޅުން ހުށައަޅާފައިވާ ހުރިހާ ހެކިންގެ ހެކިބަސް އެއްދުވަހުން ނެގުމަށް ކޯޓުގައި އެދިފައެވެ. އަދި އެފަދައިން ކުރިއަށް ނުގެންދެވޭނަމަ، ޖެހިޖެހިގެން ހެކިބަސް ނެގުމަށް އެދިފައިވެއެވެ. 

ދައުލަތުން އެ ގޮތަށް އެދިފައިވަނީ، ހެކިންނަށް ބައްދަލުވެ، މަޝްވަރާކުރުމަށް ފުރުސަތު ނުދެއްވުމަށެވެ. އަދި ހެކި އުފެއްދުމަށް ޖާގަ ނުދިނުމަށެވެ. 

މި މައްސަލައިގައި ހޮނިހިރު ދުވަހު ތިން ހެކިންގެ ހެކިބަސް ނެގުމަސް ވަނީ ހަމަޖެހިފައެވެ. 

ވ. އާރަށުގެ މުއާމަލާތާއި ގުޅިގެން ރައީސް ޔާމީންގެ މައްޗަށް ދެ ދައުވާއެއް އުފުލާފައިވާއިރު، އެމަނިކުފާނު ވަނީ އެ ދެ ދައުވާއަށްވެސް އިންކާރުކުރައްވާފައެވެ. އަދި އެއީ ސިޔާސީ ގޮތުން އުފައްދާފައވާ ދައުވާތަކެއްކަމަށް ތަކުރާރުކޮށް އެމަނިކުފާނު ގެންދަވަނީ ތުހުމަތުކުރައްވަމުންނެވެ.