ގެއެއްގެ ތެރޭގައި ހިނގު ހަމަނުޖެހުމެއްގެ ތެރެއިން ގެއިން ބޭރަށް އުކި އެއްޗެހި ތަކުން ޖެހި ގިނަ އަދަދެއްގެ އުޅަނދު ތަކަކަށް ގެއްލުންވެއްޖެއެވެ. 

ހިޔާ ފުލެޓުގެ ހަތަރުވަނަ ޓަވަރުގެ 17 ވަނަ ފަންގިފިލާގައި ހުރި އެޕާޓްމެންޓެއްގައި ހިނގި މި ހަމަނުޖެހުމާއި ގުޅިގެން އެ އެޕާޓްމަންޓް މަތިން އެކި އެއްޗެހި ތިރިއަށް ވަނީ އުކާފައެވެ. އޭގެ ތެރޭގައި ގޭގައި ގެންގުޅޭ ތަކެއްޗާއި އެނޫންވެސް އެކި ސާމާނު ހިމެނެއެވެ. އަދި އެ އެއްޗެހިތައް ޖެހިގެން ފުލެޓް ތިރީގައި ހުރި ބައެއް އުޅަނދު ތަކަށް ވަނީ ބޮޑެތި ގެއްލުން ވެފައެވެ. 

އެއްޗެހި ތަކުގެ އިތުރުން، އެ ހަމަނުޖެހުމުގެ ތެރެއިން ކުޑަ ކުއްޖަކުވެސް ބެލްކަނީ އިން ބޭރަށް އެއްލާލަން މަސައްކަތް ކޮށްފައިވާ ކަމަށް މަންޒަރު ދުށް ފަރާތްތަކުން "ވޮއިސް" އަށް މައުލޫމާތު ދީފައިވެއެވެ. އެހެންނަމަވެސް، އެ އެޕާޓްމަންޓް ގައި ހުރި މީހަކު އެކުއްޖާ ސަލާމަތް ކޮށްފައިވާ ކަމަށްވެސް މައުލޫމާތު ލިބެއެވެ.

Advertisement

މި މައްސަލަ އާއި ގުޅިގެން ފުލުހުން ބުނީ، ހުޅުމާލޭ ހިޔާ ފުލެޓް ހަތަރުވަނަ ޓަވަރު ކައިރީ ޕާކުކޮށްފައި ހުރި އުޅަނދު ތަކަކަށް ގެއްލުން ލިބިފައިވާ ކަމުގެ ރިޕޯޓް މިއަދު 12:53 ހާއިރު އެ އިދާރާއަށް ލިބިފައިވާކަމަށެވެ. 

އަދި އެ މައްސަލަ އާއި ގުޅިގެން އިތުރަށް ބަލަންޖެހޭ ކަންކަން ބަލަމުން އަންނަ ކަމަށްވެސް ފުލުހުން ބުނެފައިވެއެވެ.