ގާނޫނީ ވަކީލުކަމުގެ ހުއްދަ ދޫކުރުމާ ބެހޭ ގަވާއިދާއި ގުޅިގެން ދަސްވެނިންނަށް ވަކީލު ކަމުގެ ހުއްދު ނުލިބޭތީ އެ ގަވާއިދު އިސްލާހު ކުރުމަށް ގޮވާލައި ރައްޔިތުންގެ މަޖިލީހުގެ ކުރިމަތީގައި އިހްތިޖާޖު ކުރަންފަށައިފިއެވެ. 

މި އިހްތިޖާޖުގެ ބައިވެރިން އަންނަނީ، ގާނޫނީ ވަކީލުކަމުގެ ހުއްދަ ދޫކުރުމާ ބެހޭ ގަވާއިދު ފާސްކުރުމުގެ ކުރިން ކިޔަވަން ފަށާފައިވާ ދަރިވަރުންވެސް އެ ގަވާއިދަށް ޢަމަލު ކުރަންޖެހޭތީ ކަންބޮޑުވުންފާޅުކޮށްފައެވެ. އެގޮތުން އެ ގާނޫނު ފާސްކުރުމުގެ ކުރިން ކިޔަވަންފެށި ދަރިވަރުންވެސް ގާނޫނީ ވަކީލުކަމުގެ ހުއްދައަށް އެދުމުގެ ކުރިން، ބާ އިމްތިހާނާއި ތަމްރީނު ޕްރޮގްރާމް ފުރިހަމަ ކުރަންޖެހޭ ގޮތަށް އެ ގަވާއިދުގައި އޮންނަ އޮތުން ބަދަލުކުރުމަށް އިހްތިޖާޖުގެ ބައިވެރިން ވަނީ ގޮވާލާފައެވެ. އަދި އެފަދައިން ގަވާއިދުގައި އޮންނާތީ އެ ދަރިވަރުންނަށް ގާނޫނީ ލައިސަންސް ނުލިބި، ވަޒީފާ ލިބުމުންވެސް މަހުރޫމްވެފައިވާތީ އެ ފަރާތްތަކުން ވަނީ ކަންބޮޑުވުން ފާޅުކޮށްފައެވެ. 

މީގެ އިތުރުން، މި ސުލްހަވެރި އިހްތިޖާޖުގެ ބައިވެރިންވަނީ، ގާނޫނީ ވަކީލުކަމުގެ ހުއްދަ ދޫކުރުމާ ބެހޭ ގަވާއިދަށް އަމަލު ކުރަން ޖެހޭނީ އެ ގަވާއިދު ފާސްކުރުމުގެ ފަހުން ކިޔަވަންފެށި ދަރިވަރުން ކަމަށްވެސް ފާހަގަކޮށްފައެވެ. އެހެންކަމުން އޭގެ ކުރިން ކިޔަވަންފެށި ދަރިވަރުން އެ ގަވާއިދަށް އަމަލުކުރުންޖެހޭ ގޮތަށް އޮންނަ އޮތުން ނިމުމަކަށް ގެނައުމަށްވެސް އެފަރާތްތަކުން ވަނީ އެދިފައެވެ. 

ގާނޫނީ ފަންނުގެ ގާނޫނުގެ ދަށުން، ވަކީލުކަމުގެ ހުވާ ކުރެވެނީ 1 އަހަރުގެ ތަމްރީނު ޕްރޮގްރާމެއް ފުރިހަމަކޮށް، ބާ އިމްތިހާނުން ފާސްވުމުންނެވެ. ގާނޫނީ ވަކީލުކަމުގެ ހުއްދައަށް އެދުމުގެ ކުރިން، ބާ އިމްތިހާނާއި ތަމްރީނު ޕްރޮގްރާމް ފުރިހަމަ ކުރަންޖެހޭ ގޮތަށް، ގާނޫނީ ވަކީލުކަމުގެ ހުއްދަ ދޫކުރުމާ ބެހޭ ގަވާއިދު އެކުލަވާލީ 2019 ގަ އެވެ.

ނަމަވެސް، މިހާތަނަށް ވެސް ބާ އިމްތިހާން ބާއްވާފައި ނުވާތީ، ކިޔަވައި ނިންމާފައި ތިބި ގިނަ ބަޔަކަށް ވަކީލުކަމުގެ ލައިސެންސް ލިބޭ ގޮތް ވަނީ ނުވެފަ އެވެ.