ކުރީގެ ރައީސް ޔާމީނު އަބްދުލް ގައްޔޫމްގެ ވެރިކަމުގައި ރާއްޖޭގެ %80 އަށް ނަރުދަމާ ކަށަވަރު ކޮށްދިން ކަމަށް ކުރީގެ އެންވަޔަރުމަންޓް މިނިސްޓަރު ތޯރިގު އިބްރާހިމް ވިދާޅުވެއްޖެ އެވެ.
އިދިކޮޅު މައި ޕާޓީ ޕީޕީއެމްގެ ސެނެޓުގައި ހިމެނިވަޑައިގަންނަވާ ތޯރިގު މިހެން ވިދާޅުވެފައިވަނީ އޭނާ މިއަދު ކުރެއްވި ޓުވީޓެއްގައެވެ. ތޯރިގު ގެ ޓުވީޓުގައި ވިދާޅުވެފައިވަނީ ރައީސް ޔާމީންގެ ވެރިކަން ނިމުނުއިރު ދިވެހިރާއްޖޭގެ އާބާދީގެ %80 އަަށް ނަރުދަމާ ނިޒާމްގެ ޚިދުމަތް ކަށަވަރު ކޮށްދީ އާބާދީގެ %60 އަށް ސާފުފެނުގެ ނިޒާމުގެ ޚިދުމަތް ކަށަވަރު ކޮށްދެއްވާފައިވާ ކަމަށެވެ.
ތޯރިގު މިހެން ވިދާޅުވެފައި މިވަނީ މިހާރު ކުރިއަށްދާ 'ވިއަވަތި' ރާއްޖެ ކޮންފަރެންސްގައި ވާހަކަދައްކަވަމުން ރައީސް ޞާލިހް، އެމަނިކުފާނު ވެރިކަމަށް ވަޑައިގެންނެވިއިރު ރާއްޖޭގެ ގިނަ ރަށްރަށުގައި ފެނާއި ނަރުދަމާގެ ނިޒާމް ގާއިމުވެފައި ނެތް ކަމަށް ވިދާޅުވެފައި ވަނިކޮށެވެ. އަދި މި ސަރުކާރުގެ އަމާޒަކީ މި ވެރިކަން ނިމުމުގެ ކުރިން ރާއްޖޭގެ މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާގެ ހިދުމަތް ގާއިމުކުރުން ކަމަށް ވެސް ރައީސް ޞާލިހް ވިދާޅުވެފައިވެއެވެ.
ރައްދުގައި ތޯރިގު ކުރެއްވި ޓުވީޓުގައި މި ހަޤީޤަތް ދިވެހި ރައްޔިތުންނަށް އޮޅުވައެއް ނުލެވޭނެ ކަމަށްވެސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
