މިދިޔަ އަހަރުގެ މެއި މަހުގެ 6ގައި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ޓެރަރިސްޓް ހަމަލާގެ ސަބަބުން ބުރަ ބޮޑުވީ ރައްޔިތުންގެ ޖީބަށް ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
އެކަމަނާ މިހެން ވިދާޅުވީ، ވިޔަވަތި ކޮންފަރެންސްގައި ވާހަކަ ދައްކަވަމުންނެވެ. މާރިޔާ ވިދާޅުވީ، ނަޝީދަށް ދިން ހަމަލާއަށްފަހު ދިފާއީ ބާރުގެ މަސައްކަތްތައް އެތައް ގުނައެއް އިތުރުވެގެން ގޮސްފައިވާ ކަމަށާއި، ޕާސަނަލް ސެކިއުރިޓީންގެ ގޮތުގައި ކޮންމެ ބޭފުޅެއްގެ އަރިހުގައި ތިބޭ މީހުން ވެސް ގިނަވެފައިވާ ކަމަށެވެ.
މާރިޔާ ވިދާޅުވީ ހަރުކަށި ފިކުރުގެ މައްސަލަ އަކީ ރާއްޖެއަށް ދިމާވެފައިވާ އެންމެ ސީރިއަސް އެއް މައްސަލަަ ކަމަށާއި އެފަދަ އަމަލަކަށް ހުށަހެޅިދާނެ ކަމަށް ބެލެވޭ ހިސާބުން ފެށިގެން ކަމާއި ބެހޭ ފަރާތްތަކުގެ ސަމާލުކަމަށް އެކަން ގެނައުން މުހިއްމު ކަމަށެވެ.
"އެކަހަލަ ކަމެއް ހިނގީމަ ރައްޔިތުންގެ ޖީބަށްދާ ބުރަވެސް ބޮޑު. އެއިން ކަމެއް ހިނގީމަ އަޅުގަނޑުމެންގެ މީހުންގެ ކައިރީގައި ތިބޭ ޕީއެސްއުން ވެސް އިތުރުވޭ އެބަ." މާރިޔާ ވިދާޅުވިއެވެ.
މިދިޔަ އަހަރުގެ މެއި މަހުގެ 6 ވަނަ ދުވަހުގެ ރޭ ނަޝީދު އަވަހާރަކޮށްލަން ދިން ހަމަލާ ރޭވުމުގައި އިސްކޮށް އުޅުނު ކަމަށް ފުލުހުން ތުހުމަތު ކުރަނީ ހއ. މޮޅަދޫ، ބަހާރުގެ، އަލީމަނިކާއި ހއ. ހޯރަފުށި، އަލަނާސިގެ، މުހައްމަދު ތަސްލީމްގެ މައްޗަށެވެ. އެ ދެ މީހުންގެ މައްޗަށް އުފުލާފައިވަނީ ޓެރަރިސްޓް ޖަމާއަތަކަށް ތާއީދުކުރުމުގެ ކުށުގެ ދައުވާ އެވެ.
Advertisement
This content is created and paid for by advertisers and does not involve Voice Journalists
