މާލޭގެ މައްޗަންގޯޅީގައި ހުންނަ ގެއަކަށް 1779 ކާރު ރެޖިސްޓްރީ ކޮށްފައިވާ ކަމަށާ، އެގޮތުން ރަޖިސްޓަރީ ކޮށްފައި ވަނީ ހޮޓްވީލްސް ކާރުތޯ ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުހައްމަދު ނަޝީދު (މޮސްޓާ) ސުވާލު ކުރައްވައިފިއެވެ.

ދެ ފޮރޮޅަށް ވުރެ ގިނަ ފޮރޮޅުލީ އުޅަނދުތައް ގަރާޖެއްގައި ރަޖިސްޓްރީ ކުރަން ޖެހޭ އުސޫލު ނުވަތަ އާންމުކޮށް ކިޔާ ނަމަ ގަރާޖު ސިޓީ ނިމުމަކަށް ގެންނަން ގޮވާލައި، އެއްގަމު އުޅަނދުފަހަރާ ގުޅޭ ޤާނޫނަށް މޮސްޓާ ހުށަހެޅުއްވި އިސްލާހަށް ބަހުސް ކުރައްވަމުން އޭނާ ވިދާޅުވީ، ކާރު ރަޖިސްޓަރީކޮށްދެނީ ގަރާޖަކަށް ކަމުގައެވެ. ނަމަވެސް މާލޭގައި އެއް ގެއަކަށް 1779 ކާރު ރަޖިސްޓަރީކޮށްފައިވާކަމަށެވެ. 

"މިތާ އެބަތިބި އެމީހުންގެ ގޭގޭ ގަރާޖު ވިއްކާފައި 1400, ގަރާޖު އެއްގެއިން ވިއްކާފައި. ރާއްޖޭގައި އެބަހުރި 1779 ކާރު އެއްގެއަކަށް ރަޖިސްޓަރީ ކޮށްފައި. 1779 ކާރު މައްޗަންގޯޅީ ގެއަކަށް ރަޖިސްޓަރީ ކޮށްފައި އެބައިން. 1779 ކާރުމިއީ ހޮޓްވީލް ކާރު ތަކެއްތޯ އެގެއަށް ރަޖިސްޓަރީ ކޮށްފައި މި އިންނަނީ؟" މޮސްޓާ ވިދާޅުވިއެވެ. 

މޮސްޓާ މިފަދައިން ވިދާޅުވުމާއި ގުޅިގެން ރިޔާސަތުގައި އިންނަވައި ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވަނީ، އެފަދައިން ވިދާޅުވާނަމަ އެއީ މައްޗަންގޯޅީ ކޮން ގެއެއް ކަންވެސް ހާމަކުރައްވަން ޖެހޭނެ ކަމަށް ވިދާޅުވެފައެވެ. އެހެންނަމަވެސް، މޮސްޓާ ވަނީ، މަސްލަހަތައްޓަކައި އެ މައުލޫމާތު މިވަގުތު ހާމަ ކޮށްދެވެން ނެތް ކަމަށާ، ހާމަކުރައްވަން ޖެހިއްޖެ ނަމަ ފަހުން ހާމަކުރައްވާނެ ކަމަށް ވިދާޅުވެފައެވެ. 

މިއާއެކު މޮސްޓާ ވިދާޅުވީ، ކޮންމެ މީހަކަށްވެސް މާލެއަށް ކާރު އެތެރެކުރުމުގެ ހުއްދަ އޮންނައިރު ކާރު އެތެރެކުރުމަށްފަހު އެ ކާރު ރަޖިސްޓްރީކުރަންޖެހެނީ މާލޭގެ ބިންވެރިއަކަށް ނުވަތަ މާލެއިން ބިންތައް ދިގުމުއްދަތަށް ނަގާފައިވާ ރާއްޖެތެރޭ މީހަކަށް ޖިޒީ ދައްކައިގެންކަމަށެވެ.

ކަން މިހެން ހުރިއިރު، ގަރާޖަކަށް ކާރު ރަޖިސްޓަރީކުރުމަށްފަހު އެ ކާރު އެއްވެސް ގަރާޖަކަށް އެ ކާރު ނުވެއްދޭ ކަމަށާ، ކާރު ރަޖިސްޓަރީކުރާ ވަގުތު މީހަކަށް 70،000 ރުފިޔާ ދީގެން ގަރާޖު ސިޓީއެއް ހޯދި ނަމަވެސް އެ ގަރާޖުގައި ކާރު ނުބޭއްވޭ ކަމުގައިވާނަމަ އެ ފައިސާ ދައްކަންޖެހޭ ސަބަބަކީ ކޮބައިތޯ އޭނާ ސުވާލުކުރެއްވިއެވެ.

މޮސްޓާ ވިދާޅުވީ ކާރު އެތެރެކުރުމަށް ހިފަހެއްޓުމެއް ނޯންނަ ކަމުގައިވާނަމަ އެ ކާރު އެތެރެކުރުމަށްފަހު އެ ކާރު ރަޖިސްޓަރީކުރުމަށްވެސް ހިފަހެއްޓުންތަކެއް ހުުރެގެން ނުވާނެ ކަމަށެވެ. އެހެންނޫންނަމަ އެ އުސޫލަކީ ހަމަޖެހޭ އުސޫލެއްކަމަށް ނުވާނެ ކަމުގައިވެސް އޭނާ ވިދާޅުވިއެވެ.

ޖަރާޖު ސިޓީ އުވާލުމަށް ގޮވާލައި އެއްގަމު ދަތުރުފަތުރުގެ ގާނޫނަށް އިސްލާހު ގެނައުމުގެ ބިލެއް މީގެ ކުރިންވެސް މޮސްޓާ ވަނީ މަޖިލީހަށް ހުށަހަޅުއްވާފައެވެ. އެ ބިލު މިދިޔަ އަހަރު ކޮމިޓީއިން ފާސްކުރި ނަމަވެސް މަޖިލީހުގެ ތަޅުމުން ފާސްވާ ގޮތެއް ނުވިއެވެ.

ނަމަވެސް ނަޝީދު ވަނީ މިދިޔަ ޖޫން މަހު އަނެއްކާވެސް އެ ބިލު ހުށަހަޅުއްވާފައެވެ. އަދި މިއަދު ވަނީ އެ ބިލުގެ އިބްތިދާއީ ބަހުސް އަނެއްކާވެސް ފަށައިފައެވެ.