ރައްޔިތުންގެ މަޖިލީހުގެ މެންބަރުންނާއި އަދި އެންމެހައި އިދާރާތަކުގައި މަސައްކަތް ކުރާ ފަރާތްތަކާއި އެންމެންވެސް، ބަލަނީ އެމީހެއްގެ ޖީބަށް ވަންނަނީ ކިހާވަރެއްތޯ ކަމަށް ރައްޔިތުންގެ މަޖިލީހުގެ ވިލިފުށީ ދާއިރާގެ މެންބަރު ހަސަން އަފީފް ވިދާޅުވެއްޖެއެވެ.
ގަރާޖު ސިޓީ އުވައިލެއްވުމަށް ރަައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުޙައްމަދު ނަޝީދު (މޮސްޓާ) ހުށަހަޅުއްވާފައިވާ އެއްގަމު އުޅަނދުފަހަރާ ގުޅޭ ޤާނޫނުގެ އިސްލާހަށް ބަހުސްކުރައްވަމުން އަފީފް ވިދާޅުވީ، ދަތުރުފަތުގެ ނިޒާމުގެ ވާހަކަ ދައްކާއިރު އެންމެ ބޮޑަށް ދެކެވޭ ވާހައަކީ ކޮރަޕްޝަންގެ ވާހަކަ ކަމަށެވެ. ސަރުކާރުން ކޮރަޕްޝަން ރީޒޯ ޓޮލަރެންސްގެ ސިޔާސަތެއް ގެންގުޅޭއިރު، ކޮރަޕްޝަން ހިންގާ މީހުންނަށް އެސިޔާސަތު ނުހިނގާކަމަށެވެ.
މިއާއެކު އަފީފް ވިދާޅުވީ ޓްރާސްޕޯޓް މިނިސްޓްރީ ތެރެއިން ހިންގާ ކޮރަޕްޝަންގެ ވަހަތަކަކީ ތަކުރާރުކޮށް އަޑުއިވޭ ވާހަތަކެއް ނަމަވެސް، މިނިސްޓަރުން ކޯފާވާނެތީ، އެފަދަ ވާހަކަތައް ދައްކަން މެންބަރުންނަށްވެސް ނުކެރޭކަމަށެވެ. އަދި އެފަދަ ކަން ކަން ބަލަން ތިބޭ އިދާރާތަކަށްވެސް އެ މައްސަލަ ނުބެލޭކަމަށް އަފީފް ވިދާޅުވިއެވެ.
ޓްރާންސްޕޯޓް މިނިސްޓްރީން ގަރާޖު ސިޓީއަށް އެތައް ބައިވަރު ފައިސާ ނަގައިގެން ވެހިކަލްތައް ރަޖިސްޓްރީ ކުރާކަމީވެސް ބޮޑު މައްސަލައެއްކަން ފާހަގަކުރައްވައި އަފީފް އިތުރަށް ވިދާޅުވީ، މިނިސްޓްރީގައި ތިއްބެވި ބޭފުޅުންވެސް އަދި މާލެ ސިޓީގައި ތިއްބެވި ބޭފުޅުންވެސް، އަދި މަޖިލީހުގެ މެންބަރުންވެސް ބަލަނީ އަމިއްލަ މަންފާއަށް އަމިއްލަ ޖީބަށް ވަންނަ އަދަދު ހޯދުމަށް ކަމަށެވެ.
"މިއީ މިއަދު އަޅުގަނޑުމެންނަށް ޖެހިގެން އުޅޭ މައްސަލަ އަކީ. އެންމެންވެސް މި ބަލަނީ ހަމައެގޮތަށް. އަޅުގަނޑުމެންވެސް މި ބަލަނީ ހަމައެގޮތަށް. އަޅުގަނޑުމެންގެ ޖީބަށް ކިހާވަރެއްތޯ ވަންނަނީ. މިއީ އަޅުގަނޑުމެންގެ މައްސަލަ އަކީ މިއީ."
ރައްޔިތުންގެ މަޖިލީހުގެ ވިލިފުށީ ދާއިރާގެ މެންބަރު ހަސަން އަފީފް
އަފީފު ވިދާޅުވީ ކޮރަޕްޝަން މައްސަލަތަކާއި އެނޫންވެސް މައްސަލަތައް ހުއްޓުވުމަކީ މަޖިލީހުގެވެސް ޒިންމާއެއް ކަމަށާ، ކަމާބެހޭ އިދާރާތަކުން، މަޖިލީހުން ހަދާފައިވާ ގާނޫނުތައް ތަންފީޒުކުރޭތޯ މަޖިލީހުން ޔަގީން ކުރަންވާނެ ކަމަށެވެ. އެހެންކަމުން ކޮރަޕްޝަން އިތުރު ވުމުގެ ޒިންމާ މަޖިލީހުން ނަގަން ޖެހޭ ކަމަށާ، ކޮރަޕްޝަން އިތުރު ވަނީ މަޖިލީހުން ކުރަންޖެހޭ ކަންކަން މަޖިލީހަށް ނުކުރެވޭތީ ކަމަށްވެސް އޭނާ ވިދާޅުވިއެވެ.
"އަޅުގަނޑުމެން އަބަދުވެސް ބަލަނީ މިނިސްޓަރު ކޯފާވޭތޯ. މިނިސްޓަރު ކައިރީ އަހައިގެން ކޮންކަމެއްތޯ އަޅުގަނޑަށް ލިބެން އޮތީ. ކޮން ކަމެއްތޯ އަޅުގަނޑުގެ ދާއިރާއަށް ކޮށްދެވޭނީ. މި މިނިސްޓަރ ތޯ އަޅުގަނޑުމެން މިތަނަށް ފޮނުވާފައި މި ތިވީ؟ އަޅުގަނޑުމެން ރައްޔިތުންނަށް ޚިދުމަތް ކޮށްދޭން ނޫންތޯ މިތަނަށް އައިސް މިތިބީ. މިނިސްޓަރުންނަށް ޚިދުމަތް ކޮށްދޭންތޯ މިތަނަށް އައިސް މިތިބީ؟" އަފީފު ވިދާޅުވިއެވެ.
އަފީފް ވިދާޅުވީ، އެފަދަ ވިސްނުން މެންބަރުންވެ ހުންނެވިހާ ހިނދަކު، ކޮރަޕްޝަނާއި އަދި އެނޫންވެސް މައްސަލަތައް ހައްލު ނުކުރެވޭނެ ކަމަށެވެ.
Advertisement
This content is created and paid for by advertisers and does not involve Voice Journalists
