ރިސޯޓުތަކުން ފޮނުވާ ރިޕޯޓުތަކަށް ބަރޯސާނުވެ ކަމާ ގުޅުންހުރި އިދާރާތަކުން ރިސޯޓުތަކުގައި ތިބީ ކިހާ ދިވެހިންނެއްތޯ ބަލާ ޔަގީންކުރަން ޖެހޭކަމަށް ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރު ވިދާޅުވެއްޖެއެވެ.
އާމިރު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ތިން ވަނަ ދައުރުގެ 13 ވަނަ ޖަލްސާގައި، ވަޒީފާއި ބެހޭ ގާނޫނަށް އިސްލާހު ގެނައުމަށް ހުށައަޅާފައިވާ ބިލަށް ބަހުސްކުރައްވަމުންނެވެ.
އޭނާ ވިދާޅުވީ މިހާރުވެސް ގިނަ ރިސޯޓުތަކުގައި ގެންގުޅެނީ ބިދޭސީ މަސައްކަތްތެރިންކަމަށެވެ. ރިސޯޓުތަކުން ފޮނުވާ ރިޕޯޓުތަކުގައި ދިވެހި މަސައްކަތެރިންގެ އަދަދު އޮޅުވާލާފައި ހުންނަކަމަށް އޭނާ ވިދާޅުވިއެވެ. އަދި ރިސޯޓުތަކުން ފޮނުވާ ރިޕޯޓުތަކަށް ބަރޯސާ ވުމުގެ ބަދަލުގައި ކަމާ ގުޅުންހުރި އިދާރާތަކުން އެކަންކަން ރަނގަޅަށް ބެލުމަށްވެސް އޭނާ ވަނީ ގޮވާލައްވާފައެވެ.
"މަދު ރިސޯޓުތަކެއް ފިޔަވައި، ގިނަ ރިސޯޓުތަކުގައި އަދިވެސް ގިނަ އިންސައްތަ ވަޒީފާ އަދާކުރަމުންދަނީ ބިދޭސީން. ކޮންމެ މީހަކުވެސް ރިޕޯޓު ފޮނުވާލާއިރުގައި، ތިމަންނަގެ ރިސޯޓުގައި 60 ނުވަތަ 70 އިންސައްތަ ދިވެހިން ތިބޭނެކަމަށް ވިދާޅުވިއެއް ކަމަކު، ކަމާގުޅުންހުރި ފަރާތްތަކުން ބައްލަވާލައްވާ އެހެން އެ ވިދާޅުވާ ރިސޯޓުތަކުގައި ކިތައް ޕަސެންޓުތޯ ދިވެހިން ތިބީ"
ކުޑަހުވަދޫ ދާއިރާގެ މެމްބަރު އަހުމަދު އާމިރު
އާމިރު ވިދާޅުވީ ހައްގު އުޖޫރައިގެ ވާހަކައަކީ ސިޔާސީ ފަރާތްތަކުން، ސިޔާސީ ބޭނުމަށް ދައްކަމުންދާ ވާހަކައެއްކަމަށެވެ. ރިސޯޓުތަކުގައި މަސައްކަތްކުރާ ފަރާތްތަކަށް މިނިމަމް ވޭޖު ކަނޑައަޅާފައި ވީނަމަވެސް، އެއީ އެ ފަރާތްތަކުގެ ހައްގު އުޖޫރަ ނޫންކަމަށް ބުނަމުންދާ ކަމަށާއި، ރިސޯޓުގައ މަސައްކަތްކުރާ ފަރާތްތަކުގެ އުޖޫރައާއި ގުޅިގެން ހުރި ޝަކުވާތައް އިންތިހާއަށް އޮތްކަން އޭނާ ފަހަގަކުރެއްވިއެވެ.
ފަތުރުވެރިކަމުގެ ސިނާއަތަކީ ރާއްޖެއަށް އެންމެ ބޮޑު އާމްދަނީއެއް ލިބޭ ސިނާއަތަށްވާއިރު، މި ސިނާއަތުގައި ދިވެހި މަސައްކަތްތެރިން މަދުވުމަކީ ކަންބޮޑުވުމެއްކަމަށާއި، ދިވެހިންނަށް އޮތް ފުރުސަތުތައް ބަލާ، އެ ފުރުސަތުތައް އިތުރުކުރުމަށް މަސައްކަތްކުރުމަކީ ކޮންމެހެން ކުރަން ޖެހޭ ކަމެއްކަމަށް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
