ދިވެހިން އެންމެ ލޯބިވާ ކުޅިވަރު، ފުޓްބޯޅައިގެ ފޭރާން ވީދި ހަލާކުވެގެން ދާއިރުވެސް ޔޫތު މިނިސްޓަރު އަހުމަދު މަހުލޫފް ހުންނަވަނީ ބަލަހައްޓައިގެން ކަމަށް ބުނެ ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމް ކަންބޮޑުވުން ފާޅުކޮށްފިއެވެ. 

އާޒިމް މިފަދައިން ވިދާޅުވެފައި ވަނީ، ގައުމީ އަންހެން ފުޓްބޯޅަ ޓީމުގެ ކުރީގެ ކޯޗު ސާބިއާގެ ޑޭވޯ ބާބާ އަށް ހަ ލައްކައެއް ހާ ރުފިޔާ ދޭން ފީފާގެ ފުޓްބޯލް ޓްރައިބިއުނަލުން އެފްއޭއެމަށް އެންގުމާއި ގުޅިގެން ކުރެއްވި ޓްވީޓެއްގައެވެ.

އެކަމާއި ގުޅިގެން އާޒިމް ކުރެއްވި ޓުވީޓެއްގައި ވިދާޅުވީ، ދިވެހި ފުޓްބޯޅައިގެ ފޭރާން ވީދި ހަލާކުވެގެން ދާއިރުވެސް ޔޫތު މިނިސްޓަރު މަހުލޫފާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ހުންނަވަނީ ބަލަހައްޓައިގެން ކަމަށެވެ.

"އެފް.އޭ.އެމް ގާނޫނުތަކާ ގަވާއިދުތަކާ ދިމާ އިދިކޮޅަށް ހިންގާއިރުވެސް ފިޔަވަޅު ނާޅާ، ތިޔަ ތިއްބަވަނީ ކީއްވެތޯ؟" އާޒިމް ސުވާލު ކުރައްވާފައިވެއެވެ.

ގައުމީ އަންހެން ފުޓްބޯޅަ ޓީމުގެ ކުރީގެ ކޯޗު ސާބިއާގެ ޑޭވޯ ރާއްޖޭގެ ކޯޗު ކަމުގައި ހޭދަ ކުރި މުއްދަތުގައި ދޭން ޖެހޭ މުސާރަ ދީފައި ނުވުމުން އޭނާގެ ފަރާތުން ފީފާ އަށް ވަނީ މައްސަލަ ހުށަހަޅާފައެވެ. އެ މައްސަލަ ބެލުމަށް ފަހު ފީފާގެ ޕްލޭއާ ސްޓްޓަސް ޗެމްބާއިން މިދިޔަ މަހު 16 ގައި އެފްއޭއެމަށް އަންގާފައިވަނީ މިއަހަރު ޖެނުއަރީން ފެށިގެން ޖުލައި މަހުގެ ނިޔަލަށް ޑޭވޯ އަށް ދޭން ޖެހޭ މުސާރަ ދިނުމަށެވެ. އަދި އެ ފައިސާ 45 ދުވަހުގެ ތެރޭގައި އެފްއޭއެމް އިން ނުދައްކައިފިނަމަ، ފީފާއިން އެފްއޭއެމަށް ދޫކުރާ ޑިވެލޮޕްމެންޓް ފަންޑުން އެ ފައިސާ އުނި ކުރާނެ އެވެ.

ރާއްޖޭގެ ކޯޗު ކަމަށް، ޑޭވޯ ހަމަޖެއްސީ މި އަހަރު ޖެނުއަރީގަ އެވެ. އޭނާ އާ އެކު އެއްބަސްވުން ހެދީ ކިހާ މުއްދަތަކަށް ކަމެއް އޭރު ވެސް އެފްއޭއެމުން ހާމަކޮށްފަ އެއް ނުވެ އެވެ. ޑޭވޯ ތަމްސީލު ކުރާ އެޖެންޓް ކުންފުނި، ދެކުނު ކޮރެއާގެ ޕީއެންޖޭ ކޯޕަރޭޝަނުން ބުނީ، އެފްއޭއެމުން ޑޭވޯ އާއެކު އެއްބަސްވުން ހެދީ ޖެނުއަރީ 2023 ގެ ނިޔަލަށް ކަމަށެވެ.