ރާއްޖެއަށް އިންކަމް ޓެކުހުން ލިބޭ އާމްދަނީގެ 50 ޕަސެންޓް ލިބެނީ ބިދޭސީ އެކައުންޓެންޓުންގެ އަތުން ކަމަށް ރައްޔިތުންގެ މަޖިލީހުގެ މާލިއްޔަތު ކޮމެޓީގައި ހިމެނިވަޑައިގަންނަވާ ދާންދޫ ދާއިރާގެ މެންބަރު ޔައުޤޫބު ވިދާޅުވެއްޖެއެވެ.  

ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަދައްކަވަމުން ޗާޓަޑް އެކައުންޓެންޓްސް އޮފް މޯލްޑިވްސް (ސީއޭ މޯލްޑިވްސް)ގެ ރައީސް ހުސެއިން ނިޔާޒީ ވިދާޅުވީ ރާއްޖޭގައި ބިދޭސީ 4،500 މީހުން މަސައްކަތް ކުރަމުންދާ ކަމަށާ، ނަމަވެސް ސީއޭގެ މަގުސަދަކީ ފެންވަރު ރަނގަޅު އޮޑިޓަރުން އުފައްދައި ދިވެހިންނަށް މި ފުރުސަތު ހޯދައި ދިނުން ކަމަށެވެ.

"ރާއްޖޭގައި މި ދާއިރާ [އެކައުންޓިން ދާއިރާ] ގައި ދިވެހިންގެ ގިނަ ބަޔަކު ޝައުގުވެރިވޭ،" ނިޔާޒީ ވިދާޅުވި އެވެ.

ނިޔާޒީ ވިދާޅުވީ، އެކައުންޓިންގެ ދާއިރާއަށް ޝައުގުވެރިވާ ގިނަ ދިވެހިން އެބަ ތިބި ކަމަށެވެ. އަދި ސީއޭ އުފައްދައި ދިވެހިންނަށް އެ ފުރުސަތު ފަހިކޮށް ދިނުމަށް ކުރަމުންދާ މަސައްކަތްތަކުން 106 އެކައުންޓެންޓުން ސީއޭ މޯލްޑިވްސްގައި މިހާރު ރަޖިސްޓްރީކޮށްފައިވާ ކަމަށެވެ.

"މިހާރު 25 އޮޑިޓް ފާމް ރަޖިސްޓްރީކޮށްފައިވޭ. އަދި ނުވަ ސޯލް ޕްރެކްޓިޝަނާ އަށް ފުރުސަތު ދީފައިވޭ،" ނިޔާޒީ ވިދާޅުވި އެވެ.

އޭނާ ވިދާޅުވީ މި ދާއިރާ އަށް ގެނެވުނު އެންމެ މުހިންމު އެއް ބަދަލަކީ ސަރުކާރު ކުންފުނިތައް އޮޑިޓް ކުރެވޭ ގޮތަށް ދިވެހިންނަށް ފުރުސަތު ދީ ނުވަ ފާމް އަކަށް ހުއްދަ ދެމުން ކަމަށެވެ. މިހާތަނަށް މިދިޔަ އަހަރު ރާއްޖޭގެ 28 ސަރުކާރު ކުންފުނީގެ ތެރެއިން 10 ކުންފުންޏެއް އޮޑިޓް ކުރަން ދިވެހިން ހަރަކާތްތެރިވެފައިވާ ކަމަށެވެ.

އެހެންނަމަވެސް ބައެއް ސަރުކާރު ކުންފުނިތަކުން އޮޑިޓް ކުރަން ބޭރުގެ އޮޑިޓު ކުންފުނިތައް ހުންނަން ޖެހޭ ކަމަށް އަންގާ ކަމަށާ، އެ ފުރުސަތު ދިވެހި އޮޑިޓަރުންނަށް ދިނުމާއިމެދު މަޝްވަރާ ކުރައްވާ ކަމަށްވެސް ނިޔާޒީ ވިދާޅުވިއެވެ. 

"ބައެއް އެސްއޯއީސް [ސަރުކާރު] ކުންފުނިތަކުން އެބަހުރޭ ބޭރުން ލޯނު ނަގާފަ. އެހެންވެ ލައިން ބޭރުގެ ތަނަކުން އޮޑިޓް ކުރަން ޖެހޭ ކަމަށް އަންގާ. ނަމަވެސް ދިވެހި އޮޑިޓަރުންނަށް ފަހި ފުރުސަތުތަކެއް ހޯދައިދޭން ކުންފުނިތަކުގެ އެމްޑީސް / ސީއީއޯސްއާ މަޝްވަރާކޮށްގެން ކުރަން،" ނިޔާޒީ ވިދާޅުވި އެވެ.