މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ މި ވެރިކަމުން ފެންނަމުން މިދަނީ ސަދޫމް އިންސާފު ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުހައްމަދު ނަޝީދު (މޮސްޓާ) ވިދާޅުވެއްޖެެއެވެ. 

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޮ ނާޒިމް އަބްދުއްސައްތާރުގެ މައްޗަށް އެއްޖިންސުން ގުޅުން ހިންގި ކަން ސާބިތު ވެފައިވާއިރުވެސް އޭނާގެ މައްޗަށް އެންމެ 3 މަސް ދުވަހުގެ ހުކުމެއް އައުމުން، އެކަމަށް ފާޑުވިދާޅުވެ މޮސްޓާ ކުރެއްވި ޓުވީޓެއްގައި ވަނީ ނާޒިމް ގެ މައްޗަށް ހުކުމް ކުރި ގާޒީ އޭނާއަށް އެހާ ލުއި އަދަބެއް ދިނީ އެއީ ރައީސް ނަޝީދުގެ ކޮއްކޮއަށް ވުމުން ބިރުންތޯ ސުވާލު ކުރައްވާފައެވެ. 

އަދި މިއަދު ފަނޑިޔާރު ގެއޭ ނުވަތަ އަދުލުއިންސާފުއޭ ކިޔަން އެމްޑީީޕީ ލަދުގަންނަން ޖެހޭނެ ކަމަށް ވެސް މޮސްޓާ ވިދާޅުވިއެވެ. 

Advertisement

"އަދުލުއިންސާފު ފަނޑިޔާރުގެއިން ކޯދުލާ އުތުރި އަރަމުން އަންނަ މަންޒަރު މި ފެންނަނީ. ފަނޑިޔާރު މަނިކުފާނު ބިރު ގަތީބާ ރައީސް ނަޝީދު ގެ ކޮއްކޮވީމަ. މިއަދު އެމްޑީޕީ ލަދުގަންނަން ޖެހޭނެ ފަނޑިޔާރު ގެއޭ އަދުލުއިންސާފު ކިޔަން. ސަދޫމް އިންސާފު މިފެންނަނީ" މޮސްޓާ ވިދާޅުވިއެވެ. 

ނާޒިމް އާއި އަލަމްގިރި އާއި އެކު އެއްޖިންސުން ގުޅުން ހިންގާ މަންޒަރު ފެންނަ ވީޑިއޯއެއް އާންމުވި މައްސަލައިގައި އޭނާ ހައްޔަރު ކޮށްފައިވަނީ މިދިޔަ ޖުލައި މަހުގެ 28 ވަނަ ދުވަހުއެވެ.

އޭނާގެ ބަންދަށް ދެ ފަހަރު ކޯޓުން މުއްދަތު ޖެހުމަށްފަހު ފުލުހުން އޭނާ އޮގަސްޓް 11 ވަނަ ދުވަހު އޭނާާ ދޫކޮށްލާފައިވަނީ މައްސަލާގެ ތަހުގީގު ނިންމައި, ނާޒިމްގެ މައްޗަށް ދައުވާ ކުރުމާމެދު މަޝްވަރާ ކުރުމަށް ޕްރޮސިކިއުޓާ ޖެނަރަލްގެ އޮފީހަށް ހުށަހެޅުމަށްފަހު އިތުރަށް އޭނާ ބަންދުގައި ބެހެއްޓުމަށް ނުފެންނާތީ ކަމަށް ފުލުހުން ބުނެފައިވެއެވެ.

ގާނޫނުލްއުގޫބާތުގެ ދަށުން ނާޒިމްގެ މައްޗަށް ދައުވާ އުފުލި އިރު އެއީ މީހަކާ އިނދެ ހުރެ ކުރި ކުށަކަށް ވާނަމަ، އެ ގާނޫނުގައިވާ ގޮތުން، އެ ކުށުގެ އަސާސީ އަދަބަކީ ނުވަ މަހާއި 18 ދުވަހަށް ޖަލަށް ލުމެވެ. ނަމަވެސް ނާޒިމް އެ ކުށަށް އިއުތިރާފްވެ އެފަދަ ކުށެއް ދެން ތަކުރާރު ނުކުރާނެ ކަމަށް އޭނާ ބުނުމުން ކޯޓުން ވަނީ އޭނާގެ ހުކުމް އެއް މަހާއި 28 ދުވަހުގެ ޖަލު ހުކުމަކަށް ލުއިކޮށްދީފައެވެ. އެއަށްފަހު އެ ހުކުމް ތިން މަހާއި 26 ދުވަހަށް ގޭގައި ބަންދުކުރަން ހުކުމަކަށް ބަދަލުކޮށްފައިވަނީ ނާޒިމްގެ ފަރާތުން އެކަމަށް އެދުމުން, އެ އަދަބާ އެއްވަރުގެ އެހެން އަދަބެއް ކަނޑައެޅުމުގެ އިޚުތިޔާރު ޤާނޫނުލް ޢުޤޫބާތުން ލިބޭ ލިބުމުގެ ދަށުންނެވެ.