ޗައިނާގެ މެދުތެރޭގެ ސިޓީއެއް ކަމަށްވާ ޗަންގްޝާގައި ސަރުކާރުގެ ޓެލެކޮމިއުނިކޭޝަން ކުންފުނީގެ އޮފީހެއް ހުންނަ އިމާރާތެއްގައި ބޮޑު އަލިފާނުގެ ހާދިސާއެއް ހިނގައިފިއެވެ.

ޗައިނާގެ ދައުލަތުގެ ޓީވީ ސީސީޓީވީން ރިޕޯޓް ކޮށްފައިވާ ގޮތުގައި، އެ އަލިފާން ރޯވި އިމާރާތުން ބޯކޮށް ދުން އަރަމުންދާއިރު، އެ އިމާރާތުގެ އެތައް ފަންގިފިލާއެއް ދަނީ ވަރަށް ބޮޑަށް އަނދަމުންނެވެ. 

މީޑިއާ ރިޕޯޓްތައް ބުނާގޮތުގައި، އެ އިމާރާތުގައި ރޯވި އަލިފާންގަނޑު ނިއްވުމަށް ފަޔާ ފައިޓަރުން ދަނީ ހަރަކާތްތެރިވަމުންނެވެ. އަދި މިހާރު އަލިފާންގަނޑު މައިތިރި ކުރެވިފައިވާ ކަމަށްވެސް އަލިފާން ނިއްވުމުގައި ހަރަކާތްތެރިވާ އިދާރާތަކާއި ހަވާލާދީ ބޭރުގެ މީޑިއާ ތަކުން ރިޕޯޓް ކުރެއެވެ.

މީގެ އިތުރުން އަލިފާނުގެ ހާދިސާ ހިނގައި ދިޔައިރުއެ އިމާރާތުގެ ތެރޭގައި ތިބި މީހުން ސަލާމަތް ކުރުމުގެ މަސައްކަތް ރެސްކިއު ޓީމްތަކުން ކޮށްފައިވާއިރު، މިހާތަނަށް މި ހާދިސާގައި އެއްވެސް މީހަކު މަރުވެފައިވާ ކަމަށް ރިޕޯޓް ކޮށްފައި ނުވާ ކަމަށްވެސް މައުލޫމާތު ލިބެއެވެ.