ރާއްޖޭގެ ފިލްމް އުފައްދާ ކުންފުންޏެއް ކަމަށްވާ ޑާކްރެއިން އެންޓަޓެއިންމަންޓުން، ޖަމިއްޔަތުއް ސަލަފުގެ ޗީފް މާކެޓިންގ އޮފިސަރ، ޢަލީ ރަމީޒުގެ ހުއްދަ ހޯދުމެއްނެތި އޭނާގެ އަމިއްލަ ލަވައެއް، އެހެން މީހަކު ލައްވާ ކިޔުއްވައި އެ ކުންފުނީގެ ފިލްމެއްގައި ހިމަނަން މަސައްކަތް ކުރާތީ އެފަރާތްތަކާއި މެދު ގާނޫނީ ފިޔަވަޅު އަޅާނެ ކަމަށް ބުނެ އިންޒާރު ދެއްވައިފިއެވެ. 

ޢަލީ ރަމީޒު މިއަދު ފޭސްބުކް ގައި ލިޔުއްވި ޕޯސްޓެއްގައި ބުނީ، ރާއްޖޭގެ ފިލްމު އުފައްދާ ކުންފުންޏަކުން އޭނާގެ އަމިއްލަ އުފެއްދުމެއް (ލަވައެއް) އޭނާ ކައިރީ އަހާލުމެއްވެސް ނެތި އެހެން މީހަކު ލައްވާ ކިޔުއްވައި، އޭގެ ރިމިކްސް ހަދައި، އޭގެ ވީޑިއޯ ހަދާފައިވާ ކަމަށެވެ. އަދި އެ ލަވަ އެމީހުންގެ ފިލްމަކަށް ލުމަށްވެސް މަސައްކަތް ކުރަމުންދާ ކަމަށް، މީސްމީޑިއާގެ އެކި ޚަބަރުތަކުންނާއި، އެ ކުންފުނީގެ ފޭސްބުކް ޕޭޖުންވެސް އޭނާއަށް ކަށަވަރުވެފައިވާކަމަށް ޢަލީ ރަމީޒު ވިދާޅުވިއެވެ.

"މިފަދައިން އަޅުގަނޑުގެ ޕްރޮޑަކްޝަންތައް ބޭނުންކުރާ ފަރާތްތަކާއިމެދު ޝަރުޢީ އަދި ގާނޫނީ ފިޔަވަޅު އަޅަން އަޅުގަނޑު ފަސް ނުޖެހޭނެ ވާހަކަ ދަންނަވަން. ވީމާ މީހުންގެ ހައްގު ތަކަށް އިހްތިރާމްކޮށް، މިފަދައިން ކަންތައް ނުކުރުމަށް އެންމެހައި ފަރާތްތަކަށް ދަންނަވަން." ޢަލީ ރަމީޒުގެ ޕޯސްޓުގައި ލިޔެފައިވެއެވެ. 

މީގެ އިތުރުން، ފިލްމު ކުޅުމުގެ ނަމުގައި ބިންމަތި ފަސާދަކުރުން ހުއްޓާލައި، ހެއްދެވި ފަރާތަށް ބިރުވެތި ވުމަށްވެސް ޢަލީ ރަމީޒުގެ އެ ޕޯސްޓުގައި ވަނީ ނަސޭހަތްތެރިވެފައެވެ. 

ޢަލީ ރަމީޒު މިފަދައިން ޕޯސްޓެއް ކުރައްވާފައި މިވަނީ އޭނާ ކުރިން ލަވަ ކިޔައި އުޅުނު އިރު ކިޔާފައިވާ ލަވައެއް ކަމަށްވާ "ލޮލަކަށް ނިންޖެއް ނާދޭ" ލަވަ ޑާކްރެއިން އެންޓަޓެއިންމަންޓުން އުފައްދާ ފިލްމެއްގައި ބޭނުން ކުރުމަށް، އެހެން ލަވަކިޔުން ތެރިއެއް ލައްވައި ކިޔުއްވައި، އެ ލަވަ އެ ފިލްމުގައި ބޭނުން ކުރާނެ ކަން އެ ކުންފުނިން އިއުލާން ކޮށްފައިވަނިކޮށެވެ. 

މީގެ ކުރިން ލަވަ ކިޔައި އުޅުނު ނަމަވެސް، ލަވަ ކިޔުން ހުއްޓާ ލުމަށްފަހު ޢަލީ ރަމީޒު އަންނަނީ އޭނާގެ އެއްވެސް ލަވައެއް، އަދި މިއުޒިކާއި ގުޅުން ހުރި އޭނާގެ އެއްވެސް އުފެއްދުމެއް، އެއްވެސް ގޮތަކަށް ބޭނުން ނުކުރުމަށް ތަކުރާރުކޮށް އިލްތިމާސް ކުރަމުންނެވެ. އަދި އޭނާއަށް ތާއީދު ކުރާ ފަރާތެއް ނަމަ، އޭނާގެ އެއްވެސް ލަވައެއް އަޑު ނޭހުމަށްވެސް އޭނާ ވަނީ އާއްމުންގެ ކިބައިން އެދިފައެވެ.