ކްރޮސް ސަބްސިޑީ އުސޫލުން ރަށް ނުވަތަ ފަޅު ކުއްޔަށް ދިނުމަށް ލީޒް އެކުއިޒިޝަން ކޮސްޓް ކަނޑައެޅުމަށް އެކުލަވާލާފައިވާ މިންގަނޑު އިސްލާޙުކޮށް، އެ އުސޫލުގެ ދަށުން ރަށް ނުވަތަ ފަޅު ކުއްޔަށް ހިފަން ދައްކަން ޖެހޭ އަގު ކުޑަކޮށްފި އެވެ.
ކްރޮސް ސަބްސިޑީގެ ގޮތުގައި ފަތުރުވެރިކަމުގެ ބޭނުމަށް ރަށް، ބިން ނުވަތަ ފަޅު ކުއްޔަށް ދިނުމާބެހޭ ގަވާއިދުގެ ދަށުން، ކްރޮސް ސަބްސިޑީ އުސޫލުން ރަށް ނުވަތަ ފަޅު ކުއްޔަށް ދިނުމަށް ލީޒް އެކުއިޒިޝަން ކޮސްޓް ކަނޑައެޅުމަށް އެކުލަވާލާފައިވާ މިންގަނޑު އިސްލާޙުކޮށް އައު އަގުތައް ޓޫރިޒަމް މިނިސްޓްރީން އިއްޔެ ވަނީ ހާމަކޮށްފައެވެ.
އައު އަގު ތަކާއި އެކު ޓޫރިޒަމް މިނިސްޓްރީން ކުރި އިއުލާން ކުރި އިއުލާނުގައި ބުނީ، ލީޒް އެކުއިޒިޝަން ކޮސްޓް ކަނޑައެޅުމުގެ މިންގަނޑަކީ އެ ސަރަޙައްދަކުން ރަށް ނުވަތަ ބިން ނުވަތަ ފަޅު ކުއްޔަށް ދޫކުރާއިރު ލީޒް އެކުއިޒިޝަން ކޮސްޓުގެ ގޮތުގައި ނެގޭނެ އެންމެ ކުޑަ މިންވަރު ހިސާބުކުރުމުގެ މިންގަނޑު ކަމަށެވެ.
އަދި އެ ސަރަޙައްދެއްގައި ހިމެނޭ އެކިއެކި ރަށްރަށް ނުވަތަ ބިން ނުވަތަ ފަޅުތަކަށް ނަގާ ލީޒް އެކުއިޒިޝަން ކޮސްޓްގެ މިންވަރު ނިންމާނީ އިއުލާން ކުރި މިންގަނޑުން ހިސާބުކުރުމުން ޖެހޭ މިންވަރަށްވުރެ މަދުނުވާ ގޮތަށް އެ ރަށެއް /ބިމެއް /ފަޅެއް ހޯދުމަށް ޝައުޤުވެރިވާ ފަރާތަކާއެކު ކުރެވޭ ނެގޯސިއޭޝަންތަކުގެ ތެރެއިން ކަމަށް ވެސް އިއުލާނުގައި ބުނެފައިވެ އެވެ.
އަލަށް ގެނެވުނު ބަދަލާއެކު ހއ.، ހދ.، ޏ. އަދި ސ. އަތޮޅުގެ ބޭސް ރޭޓަކީ 500،000 ޑޮލަރެވެ. ކުރިން އެއަތޮޅުތަކުގެ ބޭސްރޭޓަކީ އެއްމިލިއަން ޑޮލަރެވެ.
ށ. ތ. އަދި ލ. އަތޮޅުގެ ރަށްރަށުގެ މިހާރުގެ ބޭސް ރޭޓަކީ އެއް މިލިއަން ޑޮލަރެވެ. ހެކްޓަރަކަށް ޖެހޭ އަގަކީ އެއް ލައްކަ ޑޮލަރެވެ. ކުރިން އެއަތޮޅުތަކުގެ ބޭސް ރޭޓަކީ 1.5 މިލިއަން ޑޮލަރެވެ.
ނ. ރ. ބ. އަދި ޅ. އަތޮޅުގެ ރަށްރަށުގެ ބޭސް ރޭޓަކީ ދެ މިލިއަން ޑޮލަރެވެ. ކުރިން އެއަތޮޅުތަކުގެ ބޭސް ރޭޓަކީ ތިން މިލިއަން ޑޮލަރެވެ. ހެކްޓަރު ރޭޓަކީ ތިން ލައްކަ ޑޮލަރެވެ.
މީގެ އިތުރުން އެންމެ ބޮޑު އަގު ކަނޑައަޅާފައިވާ މާލެ އަތޮޅުގެ ބޭސް ރޭޓަކީ ތިން މިލިއަން ޑޮލަރެވެ. ނަމަވެސް މިއީ ކުރިއާއި އަޅައިބަލާއިރު ބޮޑު ހެޔޮވުމެކެވެ. ކުރިން މާލެ އަތޮޅުގެ ބޭސް ރޭޓަކީ ފަސް މިލިއަން ޑޮލަރެވެ.
އއ. އދ. އަދި ވ. އަތޮޅުގެ ރަށްރަށުގެ ބޭސް ރޭޓަކީ ދެ މިލިއަން ޑޮލަރެވެ. ކުރިން އެއީ ތިން މިލިއަން ޑޮލަރުގެ ބޭސް ރޭޓެއް އޮތް އަތޮޅުތަކެކެވެ. މިހާރު ހެކްޓަރު ރޭޓަކީ 450،000 ޑޮލަރެވެ.
މީގެ އިތުރުން، މ. ފ. އަދި ދ. އަތޮޅުގެ ރަށްރަށުގެ ބޭސްރޭޓް 1.5 މިލިއަން ޑޮލަރަށް ކުޑަކޮށްފައިވާއިރު ހެކްޓަރު ރޭޓަކީ ދެ ލައްކަ ޑޮލަރެވެ.
ގއ. އަދި ގދ.ގެ ރަށްރަށުގެ ބޭސްރޭޓަކީ 750،000 ޑޮލަރެވެ. ހެކްޓަރު ރޭޓަކީ 75،000 ޑޮލަރެވެ. ސައިޒް ޕްރިމިއަމްގެ ގޮތުގައި 20 ހެކްޓަރާއި 40 ހެކްޓަރާ ދެމެދުގެ ރަށްރަށުން ފަސް ލައްކަ ޑޮލަރު އަދި 40 ހެކްޓަރަށްވުރެ ބޮޑު ނަމަ ދެ މިލިއަން ޑޮލަރެވެ.
Advertisement
This content is created and paid for by advertisers and does not involve Voice Journalists
