ނިއުޔޯކް ސިޓީގެ ކާރޫބާރޫ ބޮޑު ސަބްވޭތަކުން ދަތުރުކުރާ މީހުންނަށް، ގިނަ ބައެއްގެ ފޯނުތަކުން ފާހަގަަކުރެވޭ އާދަޔާޚިލާފު ކަމެއް އޮންނަ ކަމަށްވެއެވެ. އެއީ ފޯނުގެ ސްކްރީނުގެ އަރިމަތީގައި "ނަށަމުންދާ" ކުދިކުދި ތިކިތަކެކެވެ. މިއީ ހަމައެކަނި ސްކްރީން ސޭވަރެއް ނޫނެވެ. މިއީ ދަތުރުމަތީގައި ބޯއެނބުރުމާއި މޭނުބައިކުރުން ތަހައްމަލުކުރާ މީހުންނަށް އެޕަލް އިން ތައާރަފުކުރި އާދަޔާޚިލާފު ފަރުވާއެކެވެ.

މި ތިކިތަކަކީ އައިފޯނުގެ ސެޓިންގްސްގައި ހިމެނޭ "ވެހިކަލް މޯޝަން ކިއުސް" ނަމަކަށް ކިޔާ ފީޗަރެކެވެ. މި ފީޗަރުން ފޯނުގައި ހުންނަ 'އެކްސެލެރޯމީޓަރު' ބޭނުންކޮށްގެން، އުޅަނދު ދަތުރުކުރާ މިސްރާބަށް ސްކްރީނުގައިވާ ތިކިތައް ހަރަކާތްތެރި ކުރުވައެވެ. މިސާލަކަށް ކާރު ކަނާތަށް އަނބުރާލައިފިނަމަ، ސްކްރީނުގައިވާ ތިކިތައް ވެސް އެއާ އެއްގޮތަށް ދަތުރުކުރާނެއެވެ.

މޯޝަން ސިކްނެސް ދިމާވާ ސަބަބާ ބެހޭގޮތުން ތަޖުރިބާކާރުންގެ މެދުގައި ތަފާތު ޚިޔާލުތައް ހުރެއެވެ. ބައެއް މާހިރުން ބުނާގޮތުގައި މިއީ "ސެންސަރީ ކޮންފްލިކްޓް" ނުވަތަ އޮޅުން އެރުމެކެވެ. އަދި އަހަރެމެންގެ ތެރެއިން ގިނަ މީހުންނަކީ ދަތުރުމަތީގައި އަބަދު ފޯނަށް ބަލަން ތިބޭ ބަޔަކަށްވާއިރު، އެފަދަ މީހުންގެ ސިކުންޑިއަށް މި އޮޅުން އަރައެވެ. 

އެގޮތުން ދަތުރުމަތީގައި ފޯނުގެ ސްކްރީނަށް ބަލަން އިނުމުން އިންސާނާގެ "އިނާ އިޔާ“ އަށް އިހުސާސްވާ ހަރަކާތްތަކާއި، ލޮލަށް ފެންނަ މަންޒަރުތަކާ ދިމާނުވަނީއެވެ. ހަށިގަނޑަށް ހަރަކާތްތައް އިހުސާސްވީ ނަމަވެސް ލޮލަށް ފެންނަނީ ހުއްޓިފައިވާ ސްކްރީނެކެވެ. ނަމަވެސް އައިފޯނުގެ މި ތިކިތައް ފެންނަ ފީޗާ އޮން ކޮށްލުމުން، ލޮލަށްވެސް ހަރަކާތްތައް ފެންނަން ފަށައެވެ. އެހެންކަމުން ސިކުނޑިއަށް އަރާ އޮޅުންބޮޅުން ކުޑަވެ، ބޮލަށް އެނބުރުން އެރުމުން ސަލާމަތްކޮށްދެއެވެ.

ސްޓެންފޯޑް ޔުނިވަރސިޓީގެ ކްލިނިކަލް އެސޯސިއޭޓް ޕްރޮފެސަރ ކްރިސްޓަން ސްޓީނަރސަން ވިދާޅުވާ ގޮތުގައި، މި އޮޅުން އެރުމުގެ ސަބަބުން ހަށިގަނޑަށް ގަބޫލުކުރެވެނީ ވިހަ އެއްޗެއް ކެވިފައިވާ ކަމަށެވެ. އެހެންކަމުން ހަށިގަނޑުން އެ ވިހަ ބޭރުކުރުމަށްޓަކައި ހޮޑުލަވާ ގޮތް ވަނީއެވެ. އައިފޯނުގެ މި ތިކިތަކުގެ ސަބަބުން، ހަށިގަނޑު ހަރަކާތްތެރިވާ ގޮތުގެ 'ވިޝުއަލް ފީޑްބެކް' ސިކުނޑިއަށް ލިއްބައިދީ، ބޯއެނބުރުން ކުޑަކޮށްދެއެވެ.

ބައެއް މީހުންނަށް މިއީ "މުޢުޖިޒާތެއް" ފަދަ ކަމެކެވެ. ނިއުޔޯކްގެ ކިއުރޭޓަރެއް ކަމަށްވާ ޒެންޑީ ބްރޮކެޓް ބުނާގޮތުގައި މިއީ އޭނާގެ ދިރިއުޅުމަށް އައި ބޮޑު ބަދަލެކެވެ. އަދި އޮޓޯމޯބައިލް ނޫހެއްގެ އެޑިޓަރު ރޯރީ ކެރޯލް ބުނިގޮތުގައި، އޭނާގެ މުޅި އުމުރުގައި ދިމާވި ބޯއެނބުރުމުގެ މައްސަލައަށް މި ތިކިތަކުގެ ސަބަބުން ވަރަށް ބޮޑު ހައްލެއް ލިބިއްޖެއެވެ.

މި ފީޗަރު ބޭނުންކުރުމަށްޓަކައި އަންނަނިވި ފިޔަވަޅުތައް އަޅާށެވެ:

ފޯނުގެ Settings އަށް ވަންނާށެވެ.

Accessibility އަށް ފިއްތާލާށެވެ.

Motion އަށް ގޮސް Vehicle Motion Cues ހުޅުވާލާށެވެ.

މީގެ އިތުރުން މި ތިކިތަކުގެ ކުލައާއި ސައިޒު ވެސް ބަދަލުކުރެވެއެވެ. އެންޑްރޮއިޑް ފޯނުތަކުގައި ވެސް ބައެއް އެޕްލިކޭޝަންތައް ބޭނުންކޮށްގެން މިކަން ކުރެވޭއިރު، ގޫގްލް ޕިކްސެލް ފޯނުތަކަށް ވެސް މި ފީޗަރު ވަރަށް އަވަހަށް އަންނާނެ ކަމަށް ބެލެވެއެވެ.

ޓެކްނޮލޮޖީ މިދަނީ އަޅުގަނޑުމެންގެ ދިރިއުޅުމުގެ ކޮންމެ ވަގުތަކަށް ނުފޫޒު ފޯރުވަމުންނެވެ. ބޯއެނބުރުމުގެ މައްސަލައަށް ލިބުނު މި ހައްލަކީ ފޯނަށް ބަލަން ތިބޭ ވަގުތު އިތުރުކޮށްދޭ ކަމެކެވެ. އެހެންކަމުން ބައެއް މީހުން ދެކޭގޮތުގައި ބޯއެނބުރުމުން ސަލާމަތްވުމަށް އޮތް އެންމެ ރަނގަޅު ގޮތަކީ ފޯނު ބާއްވާލުމަށްފަހު، ދަތުރުގެ ހިތްގައިމުކަން އިހުސާސްކުރުމެވެ.