އާޓިފިޝަލް އިންޓެލިޖެންސް (އޭއައި) ބޭނުންކޮށްގެން، ފުރިހަމައަށް މަސައްކަތްކުރާ އަދި އަމިއްލައަށް އިތުރުވުމުގެ ގާބިލުކަން ލިބިފައިވާ މުޅިން އާ ވައިރަސްތަކެއް އެމެރިކާގެ ދިރާސާވެރިން ފުރަތަމަ ފަހަރަށް ފަރުމާކޮށްފިއެވެ. މިއީ އޭއައި ބޭނުންކޮށްގެން މުޅި ޖީނޯމްއެއް ކާމިޔާބުކަމާއެކު ފަރުމާކުރި ފުރަތަމަ ފަހަރެވެ.

ސްޓެންފޯޑް ޔުނިވަރސިޓީގެ ދިރާސާވެރިން އުފެއްދި މި 16 ވައިރަހަކީ ބެކްޓީރިއާއަށް ހަމަލާދޭ ގޮތަށް ފަރުމާކޮށްފައިވާ ވައިރަސްތަކެކެވެ. މީގެ ސަބަބުން އިންސާނުންނަށް އެއްވެސް ނުރައްކަލެއް ނެތް ނަމަވެސް، މިއީ ސައިންސްގެ ދާއިރާގައި އައި ވަރަށް މުހިންމު ބަދަލެއްގެ ގޮތުގައި ތަޖުރިބާކާރުން ސިފަކުރެއެވެ. މި އީޖާދުގެ ސަބަބުން ބަލިތަކަށް ފަރުވާ ހޯދުމުގެ އާ ދައުރެއް ފެށިގެންދާނެ ކަމަށް ބެލެވެއެވެ.

ސްޓެންފޯޑް ޔުނިވަރސިޓީގެ އެސިސްޓެންޓް ޕްރޮފެސަރ ބްރަޔަން ހީ ބީބީސީއަށް މައުލޫމާތު ދެއްވަމުން ވިދާޅުވީ، މިއީ ޖެނެރޭޓިވް އޭއައި ބޭނުންކޮށްގެން މުޅި ޖީނޯމްއެއް ފަރުމާކުރި ފުރަތަމަ ފަހަރު ކަމަށެވެ. މި ޓެކްނޮލޮޖީ މަސައްކަތް ކުރަނީ ޗެޓްޖީޕީޓީ ފަދަ ލާޖް ލޭންގުއޭޖް މޮޑެލްތަކާ އެއްގޮތަށެވެ. ނަމަވެސް މި މޮޑެލްތަކުން އަކުރުތަކުގެ ބަދަލުގައި އުފައްދަނީ ދިރުންތަކުގެ ބަހުރުވަ ނުވަތަ ޖެނެޓިކް ކޯޑުތަކެވެ.

ސްޓެންފޯޑް ޔުނިވަރސިޓީގެ އެސިސްޓެންޓް ޕްރޮފެސަރ ބްރަޔަން ހީ އާއި އެކުގައި މަސައްކަތްކުރާ މުވައްޒަފެއް 

"އީވޯ1" (Evo1) އަދި "އީވޯ2" (Evo2) ގެ ނަމުން ނަންދެވިފައިވާ މި އޭއައި މޮޑެލްތައް ތަމްރީނުކޮށްފައިވަނީ ވައިރަސް، ބެކްޓީރިއާ، ގަސްގަހާގެހި އަދި އިންސާނުންގެ ޖެނެޓިކް ކޯޑުތައް ބޭނުންކޮށްގެންނެވެ. ދިރާސާވެރިން އޭއައި ބޭނުންކޮށްގެން 302 ފަރުމާއެއް ތައްޔާރުކުރިއިރު، އޭގެ ތެރެއިން 16 ވައިރަހެއް ވަނީ އީ-ކޯލައި (E. coli) ބެކްޓީރިއާ މަރާލުމުގައި ކާމިޔާބު ނަތީޖާއެއް ދައްކާފައެވެ.

މި ކުރިއެރުމާއެކު، އެންޓިބަޔޮޓިކަށް ނުގުޑާ ބެކްޓީރިއާތަކަށް ފަރުވާކުރުމުގެ އާ މަގުތަކެއް ފަހިވެގެންދާނެއެވެ.

ނަމަވެސް، ބައެއް ތަޖުރިބާކާރުން ވަނީ މިފަދަ ޓެކްނޮލޮޖީއެއްގެ ސަބަބުން ކުރިމަތިވެދާނެ ސަލާމަތީ ނުރައްކާތަކާ މެދު ކަންބޮޑުވުން ފާޅުކޮށްފައެވެ. ޖޯންސް ހޮޕްކިންސް ސެންޓަރު ފޯ ހެލްތު ސެކިއުރިޓީގެ ތަޖުރިބާކާރުން ވިދާޅުވި ގޮތުގައި، މި އީޖާދުގެ ސަބަބުން ބަޔޯސޭފްޓީ އަދި ބަޔޯސެކިއުރިޓީއާ ގުޅޭ ސުވާލުތަކެއް އުފެދެއެވެ. އަދި ނުރައްކާތެރި ބަލިތައް އުފެއްދުމަށް މި ޓެކްނޮލޮޖީ ނަހަމަ ގޮތުގައި ބޭނުންކޮށްފާނެ ކަމުގެ ބިރު އެބައޮތެވެ.

އެހެންނަމަވެސް، ދިރާސާވެރިން ވިދާޅުވަނީ މި މަސައްކަތް ކުރިއަށް ގެންގޮސްފައިވަނީ ވަރަށް ވަރުގަދަ ސަލާމަތީ ފިޔަވަޅުތަކަކާއެކު ރައްކާތެރި ލެބޯޓްރީއެއްގައި ކަމަށެވެ. އަދި މި ޓެކްނޮލޮޖީގެ ބޭނުމަކީ އިންސާނުންގެ ދުޅަހެޔޮކަން އިތުރުކުރުމާއި، އާ ފަރުވާތައް ހޯދުން ކަމަށްވެސް އެ މީހުން ފާހަގަކުރެއެވެ.

ސްޕެއިންގެ ޕޮމްޕޭ ފަބްރާ ޔުނިވަރސިޓީގެ ޕްރޮފެސަރ މާކް ގުއެލް ވިދާޅުވި ގޮތުގައި، މިއީ ތާރީޚުގައި ފުރަތަމަ ފަހަރަށް ކޮމްޕިއުޓަރެއްގެ އެހީގައި ދިރުންތައް ފަރުމާކުރަން ފެށުނު އުންމީދީ ވަގުތެކެވެ. މިއީ އިންސާނިއްޔަތަށް ކުރިމަތިވެފައިވާ ބޮޑެތި ގޮންޖެހުންތަކަށް ހައްލު ހޯދުމަށް ހުޅުވުނު މުހިންމު ދޮރެކެވެ.