ފީފާގެ ބޮޑެތި މުބާރާތްތައް ޕްރައިވެޓް އިންވެސްޓްމެންޓަށް ހުޅުވާލުމުގެ ހުށަހެޅުން އަނބުރާ ގެންދިޔަ ނަމަވެސް ފިރިހެނުންނާއި އަންހެނުންގެ ވޯލްޑް ކަޕް ބޮއިކޮޓް ކުރުމުގެ ނިންމުން ދެމެހެއްޓުމަށް ޔޫރަޕުގެ ފުޓުބޯޅައިގެ ބެލެނިވެރި ޖަމިއްޔާ ޔުއެފާއިން ބުރާސްފަތި ދުވަހު ނިންމައިފިއެވެ.

ޔުއެފާއިން މިދިޔަ ހަފުތާގައި ފީފާގެ މުބާރާތްތައް ބޮއިކޮޓް ކުރާނެ ކަމުގެ އިންޒާރު ދީފައިވާއިރު އެ އިންޒާރަކީ ފީފާއިން އެ ޕްލޭން ހުއްޓައިލުމުގައި މައިގަނޑު ސަބަބު ކަމަށް ވަނީ ބެލެވިފައެވެ. ނަމަވެސް ބޮއިކޮޓް ނެގުމަށް ޔުއެފާއިން ކަނޑައެޅީ ދެ ޝަރުތެކެވެ. އެ ޖަމިއްޔާއިން ބުރާސްފަތި ދުވަހު ނެރުނު ބަޔާނުގައި ބުނީ އެ ދެ ޝަރުތު ފުރިހަމަ ނުވާ ކަމަށެވެ.

ޔުއެފާގެ ބަޔާނުގައި ބުނީ "ޔުއެފާގެ އެސޯސިއޭޝަންތަކުން ފީފާގެ މުބާރާތްތަކުގައި ބައިވެރި ނުވުމާ ގުޅޭ ގޮތުން ދެ ޝަރުތެއް ވަރަށް ސާފުކޮށް ކަނޑައެޅި" ކަމަށެވެ. "ފުރަތަމައީ ބޮޑެތި މުބާރާތްތައް ވިއްކައިލުމުގެ ހުށަހެޅުން އަނބުރާ ގެންދިޔުން. ދެވަނައީ މި ގޮތަށް ކުޅިވަރު ހަލާކުކޮށްލުމުގެ މަސައްކަތެއް ދެން ދުވަހަކުވެސް ނުކުރާނެ ކަމުގެ ޔަގީންކަން ދިނުން" ކަމަށް އެ ބަޔާނުގައިވެއެވެ.

ޔުއެފާއިން އިތުރަށް ބުނީ "ހޮނިހިރު ދުވަހުގެ ބަޔާނުގައި ޖިއާނީ އިންފަންޓީނޯގެ ރައީސް ކަމާ މެދު އިތުބާރު ގެއްލިފައިވާ ކަމަށް ސާފުކޮށް ބުނެފައިވާނެ. އެ ސްޓޭންޑު ދެމިއޮތް" ކަމަށެވެ.

ފީފާއިން މިދިޔަ ހަފުތާ އަންގާރަ ދުވަހު ހުށަހެޅި ޕްލޭނުގައި ވޯލްޑް ކަޕާއި ކްލަބް ވޯލްޑް ކަޕް ފަދަ މުބާރާތްތައް ހިންގަން ވިޔަފާރި ސަބްސިޑިއަރީއެއް، ފީފާ ފޯވާޑް އެންޓަޕްރައިޒް (އެފްއެފްއީ)ގެ ނަމުގައި އުފައްދައި 20 ބިލިއަން ޑޮލަރުގެ ވެލުއޭޝަނެއްގެ މައްޗަށް 4.2 ބިލިއަން ޑޮލަރު ހޯދުން ހިމެނެއެވެ.

މި ޕްލޭން ފާސްވި ނަމަ ފީފާގެ 211 މެންބަރު އެސޯސިއޭޝަނަށް 2027 ގެ ކުރީކޮޅު އެއްފަހަރާ 20 މިލިއަން ޑޮލަރު ލިބި 2027-2030 ގެ ސައިކަލުގައި ފަންޑިން 8 މިލިއަން ޑޮލަރުން 20 މިލިއަން ޑޮލަރަށް އިތުރުވާ ގޮތަށް ވަނީ ރާވައިފައެވެ. ދުނިޔޭގެ އެކި ކަންކޮޅުތަކުން ލިބުނު ފާޑުކިޔުންތަކާ ގުޅިގެން އިންފަންޓީނޯ ވަނީ ދުވަސްކޮޅެއް ފަހުން އެ ހުށަހެޅުން ދޫކޮށްލައިފައެވެ.