ޔަމަނުގެ ހޫތީން ސައޫދީ އަރަބިއްޔާގެ ދެކުނުގެ ސަރަހައްދެއް ކަމަށްވާ ނަޖްރާންއަށް ދިން ހަމަލާތަކެއްގައި 11 އާންމުން ޒަޚަމްވެފައިވާ ކަމަށް ސައޫދީ އިސްވެ އޮންނަ ކޯލިޝަނުން ހާމަކޮށްފިއެވެ.
ސައޫދީ ކޯލިޝަންގެ ތަރުޖަމާނު ތުރުކީ އަލް-މާލިކީ ހުކުރު ދުވަހު ވިދާޅުވި ގޮތުގައި، މިދިޔަ ބުރާސްފަތި ދުވަހު ދިން މި ހަމަލާތަކުގައި ޒަޚަމްވި މީހުންގެ ތެރޭގައި ސައޫދީގެ ހަތް މީހުން ހިމެނެއެވެ. އޭގެ ތެރޭގައި އަންހެނަކާއި ހަތަރު އަހަރުގެ ކުޑަކުއްޖަކު ހިމެނެއެވެ. މީގެ އިތުރުން މި ހަމަލާގައި މިސްރުގެ ދެ މީހުންނާއި، ޔަމަނުގެ މީހެއްގެ އިތުރުން ޕާކިސްތާނުގެ މީހަކަށް އަނިޔާވެފައިވާ ކަމަށް އޭނާ ވިދާޅުވިއެވެ.
އަލް-މާލިކީ ވިދާޅުވީ، ހޫތީން މި ހަމަލާ ދީފައިވަނީ އާންމުން ދިރިއުޅޭ ސަރަހައްދުތަކަށް އަމާޒުކޮށް ވަކި ބެލުމެއް ނެތި ފޮނުވާލި ހަތިޔާރު ބޭނުންކޮށްގެންނެވެ. މިއީ ބައިނަލްއަގުވާމީ އިންސާނީ ގާނޫނުތަކާ ކަނޑައެޅިގެން ޚިލާފަށް، ގަސްދުގައި އާންމުންނާއި އާންމު ވަސީލަތްތަކަށް އަމާޒުކޮށް ދީފައިވާ ހަމަލާއެއް ކަމަށް އޭނާ ތުހުމަތު ކުރެއްވިއެވެ.
އަދި އާންމުން އިތުރު ހަމަލާތަކުން ރައްކާތެރިކުރުމަށްޓަކައި ހޫޘީންނަށް ހުރަސްއެޅުމުގެ ގޮތުން އަޅަންޖެހޭ "ދިފާއީ ފިޔަވަޅުތައް" ކޯލިޝަނުން ކުރިއަށް އޮތް ތަނުގައިވެސް އަޅަމުންދާނެ ކަމަށް އޭނާ ވިދާޅުވިއެވެ.
ފަހަކަށް އައިސް ސައޫދީ އަރަބިއްޔާއާއި ހޫތީންނާ ދެމެދު އޮތް ނުތަނަވަސްކަން ވަނީ ވަރަށް ބޮޑަށް އިތުރުވެފައެވެ. މިއީ ރަތް ކަނޑުގައި ސައޫދީގެ އުޅަނދުފަހަރާއި އަސްކަރީ އަމާޒުތަކަށް ހޫތީން ދެމުންދާ ހަމަލާތަކާއި، އެ ސަރަހައްދު ބަންދުކުރާނެ ކަމަށް ބުނެ ހޫތީން ދެމުންދާ އިންޒާރުތަކާ ގުޅިގެން އުފެދިފައިވާ ނުތަނަވަސްކަމެކެވެ.
ހޫތީންގެ މި ހަމަލާތަކަށް ރައްދު ދިނުމުގެ ގޮތުން ސައޫދީން ވަނީ ޔަމަނުގައި ހުރި ހޫތީންގެ އަސްކަރީ މަރުކަޒުތަކަށް އަމާޒުކޮށް ވައިގެ މަގުން ވަރުގަދަ ހަމަލާތަކެއް ދީފައެވެ.
Advertisement
This content is created and paid for by advertisers and does not involve Voice Journalists
