ރަށްރަށަށް ވަޑައިގެން ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ވަޑައިގެން ވެވަޑައިގެންނެވި ވައުދުފުޅުތަކުގެ ލިސްޓެއް ނެތްކަމަށް ޕްލޭނިން މިނިސްޓަރު އަހުމަދު އަސްލަމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ކުޑަ ހުވަދޫ ދާއިރާގެ މެމްބަރު އަހުމަދު އާމިރު ވަނީ ރައީސް ސޯލިހުގެ އެ ރަށަށް ވެލެއްވި އެއްވެސް ރިޔާސީ ވައުދުފުޅެއް މިހާތަނަށް ފުއްދަވާދެއްވާފައި ނުވާކަމަށެވެ. އަދި މާ އެނބޫދޫ ބިން ހިއްކުމުގެ މަޝްރޫއުވެސް މި ދައުރުގައި ނުވާނެކަމަށް ވިދާޅުވެފައިވާކަމަށެވެ. އެހެން ކަމަށް ވާއިރު، އެއްވެސް ރަށެއް ތަފާތު ކުރުމެއް ނެތި މަޝްރޫއުތައް ހިންގަވާކަމަށް ވިދާޅުވާއިރު، ދެން އެ ދާއިރާއަށް އޮތް ކަމަކީ ކޮބައިތޯ އާއި ރައީސްގެ ރިޔާސީ ވައުދުފުޅުތައް ދައުރު ނިމެންވާއިރަށް ފުއްދަވާނެތޯ އާމިރު ވަނީ އައްސަވާފައެވެ.
އެ ސުވާލަށް ޖަވާބުދެއްވަމުން، މިނިސްޓަރު ވިދާޅުވީ ކުޑަހުވަދޫ ދާއިރާއަށް އެއްވެސްކަމެއް ވެފައި ނެތްކަމަށް ވިދާޅުވުމުން އެ ސުވާލަށް އާއެކޭ ނުވަތަ ނޫނެޖޭ ޖަވާދެއްވުމަށް ދަތިފުޅުކަމަށެވެ.
މިނިސްޓަރުގެ ވާހަކައިގެ މެދުތެރެއިން އާމިރު ވަނީ ނިޒާމީ ނުގުތާއެއް ނަންގަވާފައެވެ. އަދި އޭނާ އެއްވެސް ކަމެއް މާނަކުރެއްވީ ރިޔާސީ ވައުދުފުޅުތަކަށްކަމަށް އާމިރު ވިދާޅުވިއެވެ.
އާމިރުގެ ވާހަކަތަކަށްފަހު މިނިސްޓަރަށް ފުރުސަތު އެރުވުމުގެ ކުރިން އެ މައުލޫގައި ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސްވެސް ވާހަކަފުޅުދެއްކެވިއެވެ.
ނަޝީދު ވިދާޅުވީ ރިޔާސީ ވައުދަތަކަށް ވާނީ މެނެފެސްޓޯގައި ލިޔެފައި ހުންނަ ވައުދުތައް ކަމަށެވެ. ރަށްރަށަށް ވަޑައިގެން ވާ ވައުދުތަކަކީ އަދި ރިޔާސީ ވައުދުތަކަށް ނުވާނެކަމަށް ނަޝީދު ވިދާޅުވިއެވެ.
"އިއްޒަތްތެރި މެމްބަރު ވަރަށް ގިނައިން ވިދާޅުވޭ ރިޔާސީ ވައުދުގެ ގޮތުގައި ވެފައިވާ ވައުދުތައް. އާންމު އުސޫލެއްގައި ސިޔާސީ ޕާޓީތަކުން ވެފައިވާ ވައުދުތައް އެއީ އެ ޕާޓީތަކުގެ މެނެފެސްޓޯގައި ލިޔެފައިވާ ވާހަކަތަށް. އިއްޒަތތެރި މެމްބަރުން ވިދާޅުވޭ އެވެނި ރަށަކަށް މި ވެނި ރަށަކަށް ވަޑައިގެން މި ވެނި ވާހަކައެއް ވިދާޅުވިކަމަށް އެއީ، ވައުދެއްކަމަށް. އެހެން ނަމަވެސް އަޅުގަނޑަށް ފެންނަ ފެނުމުގައި ވައުދެއްގެ ގޮތުގައި ބަލާން މި ޖެހެނީ މެނެފެސްޓޯގައި ލިޔެފައިވާ ވައުދު. މީގެ ކުރީގައި ބައެއް ޕާޓީތަކުން ވިދާޅުވެފައި އެބަހުރި ބެނާތަކުގައި ތައްގަނޑުޖެހި ކުދިން ޖެހި އެއްޗެއްކަމަށްވެސް"
މަޖިލީހުގެ ރައީސް ނަޝީދު
ރައީސް ނަޝީދުގެ ވާހަކަތަކަށްފަހު އާމިރުގެ ސުވާލަށް ޖަވާބު ދެއްވަމުން އަސްލަމް ވިދާޅުވީ ކުޑަހުވަދޫގައި 75 ހއުސިން ޔުނިޓު އެޅުމުގެ މަސައްކަތް ދާދި އަވަހަށް ޓެންޑަރ ކުރެވޭނެ ކަމަށެވެ.
އެއާއެކު އަސްލަމް ވިދާޅުވީ ރަށްރަށް ވަޑައިގެން ރައީސުލްޖުމްހޫރިއްޔާ ވައުދުވެވަޑައިގެން ކަންކަމުގެ ލިސްޓެއް މިނިސްޓަރު އަތްޕުޅުގައި ނެތްކަމަށެވެ. އެހެންކަމުން މެމްބަރު އެއްސެވި ސީދާ ސުވާލަށް ޖަވާބެއް އަރުވަން ދަތުފުޅުވާކަމަށް މިނިސްޓަރު ވިދާޅުވިއެވެ.
"ރައީސުލް ޖުމްހޫރިއްޔާ ރަށްރަށަށް ވަޑައިގެން ވީ ވައުދުތަކުގެ ލިސްޓެއް އަޅުގަނޑު އަތަކު ނެތް. އެހެން ވީމާ ސީދާ ދަންނަވަން ދަތި މިވެނި ކަމެއް ވެއްޖެޔޭ ނުވަތަ މިވެނި ކަމެއް ނުވެޔޭ"
ޕްލޭނިން މިނިސްޓަރު އަސްލަމް
ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގުވެސް ވަނީ ރައީސުލް ޖުމްހޫރިއްޔާގެ ރިޔާސީ ވައުދުފުޅެއްކަމަށްވާ މަހިބަދޫގެ ބިން ހިއްކުމާއި، މަގުތައް ހެދުމުގެ މަސައްކަތް ކުރިއަށް ނުގެންދާތީ މިނިސްޓަރަށް ސުވާލު އަމާޒުކުރައްވާފައެވެ.
ސަރުކާރުން ރަށްތައް ތަރައްގީކުރުމުގައި، ނުވަތަ މަޝްރޫއުތައް ހިންގުމުގައި ތަފާތުކުރުންތައް ގެންގުޅޭކަމަށް ތާރިގު ވަީ ވިދާޅުވެފައެވެ.
ތާރިގުގެ އެ ވާހަކަތަކަށްވެސް މިނިސްޓަރު އިންކާރުކުރެއްވިއެވެ. އަދި ވިދާޅުވީ މި ސަރުކާރުން ރަށްތައް ތަރައްގީ ކުރަމުންދަނީ އެރަށަކަށް އެންމެ ބޮޑަށް ޖެހިފައިވާ ބޭނުންތަކަށް ބަލައިގެންކަމަށެވެ.
Advertisement
This content is created and paid for by advertisers and does not involve Voice Journalists
