ބައިނަލްއަޤްވާމީ ޔޯގާ ދުވަހު ހިންގި ހަމަނުޖެހުންތަކާއި ގުޅިގެން ހައްޔަރުކުރި ދީނީ އިލްމުވެރިޔާ އައްޝައިހް ފަޟްލޫން މުހައްމަދު ބަންދުން ދޫކޮށްލުމަށް ކްރިމިނަލް ކޯޓުން ކުރި ހުކުމް ހައިކޯޓުން ބާތިލްކޮށްފިއެވެ.

ބައިނަލްއަޤްވާމީ ޔޯގާ ދުވަސް ފާހަގަކުރަން ޔޫތު މިނިސްޓްރީ އާއި އިންޑިއާ ހައި ކޮމިޝަނާއި އިންޑިއަން ކަލްޗަރަލް ސެންޓަރުން މިދިޔަ މަހުގެ 21 ވަނަ ދުވަހު ގަލޮޅު ދަނޑުގައި ބޭއްވި ހަރަކާތް ކުރިއަށްދިޔަ ވަގުތު އެ ތަނަށް ވަދެ ހިންގި ހަމަނުޖެހުމާ ގުޅިގެން ޝެއިޚް ފަޒްލޫން ހައްޔަރުކޮށްފައިވަނީ މިދިޔަ މަހުގެ 22 ވަނަ ދުވަހުގެ ރޭގަނޑުގެ ވަގުތެއްގައެވެ.

އެއަށްފަހު ޝެއިޚްގެ ބަންދުގެ މުއްދަތު އެތައް ފަހަރެއްގެ މަތިން އިތުރު ކުރުމަށްފަހު، ޖުލައި 21 ވަނަ ދުވަހު ޝަރުތުތަކަކާއިއެކު އޭނާ ބަންދުން ދޫކޮށްލަން ކްރިމިނަލް ކޯޓުން ވަނީ އަމުރު ކޮށްފައެވެ. އެގޮތުން އެ ކޯޓުން ޝަރުތު ކޮށްފައިވަނީ، މާލެއިން އަދި ރާއްޖެއިން ބޭރަށްދާނަމަ ކޯޓަށް އެންގުމަށާއި, އެޑްރެސް ބަދަލުވެއްޖެނަމަ އެކަން ވެސް އެންގުމަށާއި, ފުުލުހުންގެ ތަޙްޤީޤަށް އެއްބާރުލުން ދިނުމަަށެވެ.

ކްރިމިނަލް ކޯޓުން ޝަރުތުތަކަކާއެކު ފަޒްލޫން ދޫކޮށްލަން ނިންމި ނިންމުން ބަދަލުކޮށް ޝަރީއަތް ނިމެންދެން އޭނާ ބަންދުކުރުމަށް އެދި އެ މައްސަލަ ހައިކޯޓުގައި އިސްތިއުނާފުކުރަން ޕްރޮސެކިއުޓާ ޖެނެރަލްގެ އޮފީހުން ހުށަހެޅީ މިދިޔަމަހުގެ 25 ގައެވެ.

އެ މައްސަލައިގައި ފުރަތަަމަ ހައިކޯޓުން ނިންމީ ފަޟްލޫން ބަންދުން ދޫކޮށްލަން ދަށު ކޯޓުން ކުރި އަމުރުގައި މައްސަލައެއް ނެތް ކަމަށާ، އަދި އެ އަމުރު ބާތިލުކުރަންޖެހޭ އެއްވެސް ސަބަބެއް ދައުލަތުން ހުށަހަޅާފައިނުވާ ކަމަށެވެ.

އެހެން ނަމަވެސް، އެ ނިންމުން މުރާޖާކޮށް، ހައިކޯޓުން އެ މައްސަލަ ބަލައިގަނެ މައްސަލައިގެ އަޑު އެހުންތައް ނިމި މިއަދު ވަނީ ފަޒްލޫން ގެ މައްޗަށް ހުކުމް އިއްވާފައެވެ. އެގޮތުން ކުރި، ހުކުމުގައި ކްރިމިނަލް ކޯޓުން ޝެއިޚް ބަންދުން ދޫކޮށްލުމަށް ނިންމީ ރަނގަޅަށް ނޫން ކަމަށް ކަނޑައަޅައި، އެ ނިންމުން ހައިކޯޓުން ވަނީ ބާތިލްކޮށްފަ އެވެ.