އެކި ފަރާތްތަކާ މަސައްކަތް ހަވާލުކުރަން ޖެހޭނީ "ކާށިއަޅަން ރުކަށް އަރާނެ މީހަކު ހޯދާ އުސޫލަކުން ނޫން" ކަމަށް ބުނެ، ދައުލަތުގެ މީޑިއާ ޕީއެސްއެމް އަށް ހައިކޯޓުގެ ހުކުމެއްގައި ފާޑުކިޔައިފިއެވެ. 

ޕީއެސްއެމްގެ އެދުމަށް ބިގް ބޮކްސްގެ ފަރާތުން ޕީއެސްއެމްގައި 2018 ވަނަ އަހަރު ޕޮލިސް ޕޯސްޓެއް ހެދި ކަމަށް ބުނެ 2.3 މިިލިއަން ރުފިޔާ ހޯދަން 2019 ވަނަ އަހަރު އެ ފަރާތުން އެދުމުން، އެ ފައިސާ ދޭން ޕީއެސްއެމުން ދެކޮޅު ހެދީ އެކަމާ ބެހޭ ލިޔުންތައް އެ ކުންފުނީގައި ނެތުމުންނާއި އެފަދަ ތަނެއް އިމާރާތް ނުކުރާ ކަމަށް ބުނެ އެވެ. އެ މައްސަލަ ބިގް ބޮކްސް ގެ ފަރާތުން ސިވިލް ކޯޓުގައި ހުށަހަޅާފައިވާއިރު ސިވިލް ކޯޓުން ނިންމާފައި އޮތީ އެ މަސައްކަތް ހަވާލުކުރިކަން އެނގޭނެ ހެއްކެއް ނެތުމުން އެ ފައިސާ ނަގައި ނުދެވޭނެ ކަމަށެވެ.

ސިވިލް ކޯޓުގެ މި ނިންމުން ހައިކޯޓުގައި ބިގް ބޮކްސްގެ ފަރާތުން އިސްތިއުނާފް ކޮށްފައިވާއިރު ހައި ކޯޓުން ވެސް އިއްޔެ ނިންމީ ސިވިލްގެ އެ ހުކުމް ރަނގަޅު ކަމަށެވެ.

ހައިކޯޓުން އެ މައްސަލަ ބެއްލެވި ބެންޗުގައި ހިމެނިވަޑައިގަންނަވަނީ ފަނޑިޔާރު ހުސައިން މަޒީދާއި، ފަނޑިޔާރު ޝުއައިބު ހުސައިން ޒަކަރިއްޔާ އަދި ފަނޑިޔާރު ހުޒައިފާ މުހައްމަދެވެ.

މި މައްސަލާގެ ހުކުމުގައި ފަނޑިޔާރު ހުސައިން މަޒީދު ލިޔުއްވާފައިވަނީ ޕަބްލިކް ސަރވިސް މީޑިއާއިން އާމްދަނީއާއި މާލީ އެހީ ހޯދާ ގޮތްތަކުގެ ތެރޭގައި ދައުލަތުގެ ބަޖެޓުން ކޮންމެ އަހަރަކު ދޭ ފައިސާއާއި، ޕަބްލިކް ސަރވިސް މީޑިއާ ތަރައްޤީކުރުމަށް ބޭނުންވާ މުހިންމު ކަންތައްތަކާއި ގުޅިގެން ދައުލަތުންދޭ އެހީއާއި، ޕަބްލިކް ސަރވިސް މީޑިއާ ތަރައްޤީކުރުމަށް ބޭނުންވާ މުހިންމު ކަންތައްތަކާއި ގުޅިގެން ދައުލަތުގެ ފަރާތުން ގެރެންޓީކޮށްދީގެން ހޯދާ ލޯނުގެ ފައިސާވެސް ހިމެނޭކަން ޕަބްލިކް ސަރވިސް މީޑިއާގެ ގާނޫނު އެނގޭކަމަށެވެ. ވުމާއެކު ޕީއެސްއެމަކީ ދައުލަތުގެ ބަޖެޓުން ހަރަދު ކޮށްގެން ހިންގާ ތަނަކަށް ވާއިރު، އެ ތަނުގެ ފައިސާއާ ބެހޭ ކަންކަން ހިނގަން ޖެހޭނީ މާލިއްޔަތު ގަވާއިދާ އެއްގޮތަށް ކަމަށްވެސް އެ ހުކުމުގައި ބުނެފައިވެއެވެ.

އެކަމަކު އެ ކުންފުނީގެ ފަރާތުން ފައިސާ ހޯދުމުގެ އިތުރު ހަތަރު މައްސަލައެއް ހައި ކޯޓުގައި މިހާރު ވެސް އެބައޮތްކަމަށާ، ޕީއެސްއެމުން އެކި ފަރާތްތަކާ މަސައްކަތް ހަވާލު ކުރަންވާނީ ކާށި އަޅަން މީހުން ހޮވާ އުސޫލުން ނޫން ކަމަށް ފަނޑިޔާރު ހުސައިން މަޒީދު އެ ހުކުމުގެ ލިޔުއްވާފައިވެއެވެ.

"ޕަބްލިކް ސާވިސް މީޑިއާގެ ފަރާތުން އެކި ފަރާތްތައް މެދުވެރިކޮށް ހޯދާ ހިދުމަތްތަކަކީ ވިޔަފާރިވެރިއަކު ކޮންޓެއިނާ އެއް ހުސްކުރުމަށް ނުވަތަ ފިހާރައަކަށް މުދާ ވައްދަން މަގުމަތިން މަޖޫރީއަކު ހޯދާހެން ކުރެވިގެންވާނެ ކަންކަމެއް ނޫނެވެ،" ފަނޑިޔާރު މަޒީދުގެ ރައުޔުގައިވެ އެވެ.

"އެހެން އިބާރާތަކުން ބުނާ ނަމަ، މީހަކު އޭނާގެ ގޯތީގައި ހުރި ރުކަކުން ކާށިއަޅަން ރުކަށް އަރައިދޭނެ މީހަކު ހޯދާ ފަދައަކުން ކުރެވިދާނެ ކަމެއް ކަމުގައި ނުދެކެމެވެ."

ފަނޑިޔާރު މަޒީދު ލިޔުއްވާފައިވާ ގޮތުން ޕީއެސްއެމްގެ އިސްވެރިން ބޭނުންހާ ގޮތަކަށް ފައިސާ ހަރަދުކޮށް، މުއާމަލާތް ކުރުމުގެ ފުރުސަތު އޮވެގެން ނުވާނެ އެވެ. އެފަދަ ކަމެއް ކުރީ އެ ތަނުގެ ވެރިއަކު ކަމަށް ވިޔަސް ނުވަތަ މުވައްޒަަފަކު ކަމަށް ވިޔަސް، ކަމާބެހޭ އިދާރާތަކުން ފިޔަވަޅު އަޅަންޖެހޭނެ ކަމަށް އޭނާ ވިދާޅުވި އެވެ.