ބ. އޭދަފުށީ ކައުންސިލުން ރައީސުލްކުމްހުރިއްޔާ އިބްރާހިމް މުހައްމަދު ޞާލިހް އަދި ކުރީގެ ރައީސް ޔާމީން އަބްދުލްގައްޔޫމާއި ބައްދަލު ކޮށްފިއެވެ.
އޭދަފުށީ ކައުންސިލުން ރައީސް ޞާލިހް އާއި ބައްދަލު ކޮށްފައިވަނީ އިއްޔެ މެންދުރު ފަހު ރައީސް އޮފީހުގައެވެ. މި ބައްދަލުވުމުގައި އޭދަފުށީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުންވެސް ބައިވެރިވެފައިވެއެވެ. މި ބައްދަލުވުމަށްފަހު ރައީސް ޞާލިހް ކުރެއްވި ޓްވީޓެއްގައި ވިދާޅުވެފައިވަނީ އޭދަފުށީ ކައުންސިލާއި އ.ތ.މ ކޮމިޓީއާ ބައްދަލުކޮށް މިއަދު ރަށުގެ ކަންކަމާ ގުޅޭ ގޮތުން ވަނީ މަޝްވަރާކޮށްފައިވާ ކަމަށެވެ، އަދި އޭދަފުށީ ކައުންސިލުން އެންމެ ބޮޑަށް ފާހަގަކުރި އެއްކަމަކީ އެ ރަށުގެ ގޮނޑުދޮށް ހިމާޔަތްކުރުމުގެ މައްސަލަ ކަމަށްވެސް ރައީސް ޞާލިހް ވަނީ ވިދާޅުވެފައެވެ.
އޭދަފުށީ ކައުންސިލް އަދި އަންހެނުންގެ ކޮމިޓީގެ މެންބަރުން ކުރީގެ ރައީސް ޔާމީނާއި ބައްދަލުކޮށްފައިވަނީ ރޭގެ ވަގުތެއްގައި ޕީޕީއެމްގެ އޮފީހުގައެވެ. ރައީސް ޔާމީނަކީ އަންނަ އަހަރުގެ ރިޔާސީ އިންތިހާބުގައި އިދިކޮޅުން ވާދަކުރައްވާ ކެންޑިޑޭޓުކަން ފާހަގަ ކޮށްލެވެއެވެ.
ޕީޕީއެމް އިން ކުރި ޓުވީޓެއްގައި ބުނެފައިވަނީ ރޭގެ ބައްދަލުވުމުގައި އޭދަފުށީގެ ޙާލަތާ ގުޅޭގޮތުންނާއި ޕާޓީގެ ހަރަކާތްތައް އިތުރަށް ފުޅާ ކުރެއްވުމަށް މަޝްވަރާކުރެވުނު ކަމަށެވެ.
ބ. އަތޮޅުގެ ވެރިކަންކުރާ އަދި އެންމެ އާބާދީ ބޮޑު ރަށް ކަމުގައިވާ އޭދަފުއްޓަކީ ރައީސް ޔާމީނުގެ ވެރިކަމުގައި އަދި މި ވެރިކަމުގައިވެސް ހާއްސަ ސަމާލުކަމެއް ދެވުނު ރަށެއްކަން ފާހަގަ ކޮށްލެވެއެވެ.
Advertisement
This content is created and paid for by advertisers and does not involve Voice Journalists
