ސްކޫލެއްގެ ދަރިވަރުން ތަރުބިއްޔަތު ވަނީ އެ ސްކޫލެއް ހުންނަ ގޮތަކުން ނޫން ކަމަށް ވިދާޅުވެ، ހުޅުމާލެ ދެވަނަ ފިޔަވަހީގައި ހުޅުވި "ކާމިލް ދީދީ ސުކޫލް" އަށް ނިސްބަތްވަމުންދާ ފާޑުކިޔުންތަކަށް ނާއިބު ރައީސް ފައިސަލް ނަސީމް ރައްދުދެއްވައިފިއެވެ.
ދައުލަތުގެ ބަޖެޓުން 23 މިލިއަން ރުފިޔާ ހޭދަކޮށްގެން އިމާރާތް ކުރި މި ވަގުތީ ސްކޫލަށް "ޓިނު ސްކޫލް" ގެ ނަމުން ނަންދީ ގިނަ ބަޔަކު ސަރުކާރަށް ފާޑުކިޔަން ފަށާފައިވަނީ އިއްޔެ ހުޅުވި އެ ސްކޫލުގެ އިމާރާތްކުރުމުގައި ގިނަ އަދަދެއްގެ ޓިނު ބޭނުންކޮށް ވަގުތީ ހިޔާއެއްގެ ސިފަ ފެނިފައިވާތީ ކަމަށް އިދިކޮޅު ފަރާތްތަކުން ބުނެއެވެ.
ނައިބު ރައީސް މި ފާޑުކިޔުންތަކަށް ރައްދުދެއްވާފައިވަނީ ނިޝާން އިއްޒުއްދީންގެ އިއްޒަތުގެ ވެރިޔާ، އުމަރު ޒާހިރުގެ ހަނދާނުގައި ރައީސް މައުމޫން އަބްދުލްގައްޔޫމްގެ މައުމޫން ފައުންޑޭޝަނުން އުފެއްދި "އުމަރު ޒާހިރު – ނަމޫނާ ޝަހުސިއްޔަތެއް" ފޮތް ނެރެން ބޭއްވި ހަފްލާގައި ވާހަކަ ދައްކަވަމުންނެވެ.
"ސުކޫލެއްގައި ދަރިވަރުން ތަރުބިއްޔަތު ވަނީ އަދި ރީތި ސިފަތައް ކުދީންގެ ކިބައިގައި އަށަގަންނަނީ އެ ސުކޫލެއް ހަދާފައި ހުންނަ ގޮތަކުން ނޫން. ޖަހާފައި ހުންނަ މުއްޓަކުންނެއް ނޫން. ފުރާޅުގައި ޖަހާފައި ހުންނަ ޓިނާއި ކުލައަކުން ނޫން. އެހެން ނަމަވެސް އެ ސުކޫލެއްގެ، ހާއްސަކޮށް ލީޑަރެއްގެ ގައިގައި ހުންނަ މުހިންމު ސިފަތަކެއްގެ ސަބަބުން،" ފައިސަލް ވިދާޅުވި އެވެ.
ފާޑުކިޔުންތައް އަމާޒުވެފައިވާ ސްކޫލަކީ ވަގުތީ ސްކޫލެއް ނަމަވެސް ރާއްޖޭގެ އެންމެ ފުރަތަމަ ފުރަތަމަ އެޑިއުކޭޝަން މިނިސްޓަރު ހެންވޭރުގޭ އަހުމަދު ކާމިލް ދީދީގެ ނަންފުޅުގައި ހުޅުވި "ކާމިލް ދީދީ ސުކޫލް" އިމާރާތް ކޮށްފައިވާ ގޮތުން އެބޭފުޅާގެ ނަން އެ ސްކޫލަށް ދިނުމަކީ ކުރެވުނު ބޭއިންސާފެއް ކަމަށް ބައެއް ފަރާތްތަކުން ބުނެފައިވާކަން ވެސް ފާހަގަ ކޮށްލެވެއެވެ.
Advertisement
This content is created and paid for by advertisers and does not involve Voice Journalists
